Read Mandinka Yesaya 29 Bible Online

Yesaya 29 - Mandinka bible

Yesaya 29

¹Ariyeli, Ariyeli,[43] kooroo be boyi la i kaŋ ne, ite saatewo, Dawuda sabatita meŋ to. Saŋ-wo-saŋ ali si taa ali la ñiŋ juuraloolu la.

²Bari hani wo, m be toora kuwo naati la Ariyeli kaŋ ne. A si kumboo a ye woosii, a si ke n ye komeŋ sadaajanidulaa*.[44]

³M be i suki la karoo bee le la, ŋa i murubeŋ niŋ tatoolu la, ŋa i suki sansaŋo la.

⁴I boyiriŋo, i si kuma ka bo bankoo duuma-duuma naŋ, i la kumoolu ye finti naŋ buutoo duuma. I kaŋo be bo la naŋ bankoo kono le komeŋ mañamafeŋo, aduŋ i la diyaamoo be ke la dumburoo le ti naŋ buutoo kono.

⁵Bari ñiŋ bee ñaa-wo-ñaa, i jawu jurumoo be naa ke la le ko kankaŋ kenseŋo, tilimbali kafu jurumoo ye tii ko fuufulewo.

⁶Wo loo to, Yaawe* Alihawaa Maariyo* si i kiisa. A niŋ saŋ feteŋ baa le be naa ñoo la, banku jarajara baa, foño saŋara baa, turubaadoo, aniŋ kasaarali dimbaa neŋolu.

⁷Bituŋ bankoolu bee la kafoolu mennu ka Ariyeli kele ka a niŋ a la tatoo boyinkaŋ, ka a detendi. Ì bee be ke la le ko siiboo, ka yeemaŋ ko suuto jeroo.

⁸Bankoolu bee la kafoolu mennu ka Siyoni* Konkoo kele, be ke la le ko, niŋ konkotoo siiboota, a be domoroo la, bari a konkootoo ye naa wuli, komeŋ niŋ mindootoo siiboota, a be miŋo la, bari mindoo jawoo maŋ bo a la.

⁹Ali ali faŋolu hakilintaŋyandi doroŋ, ali ye hakilintaŋyaa. Ali ali faŋolu finkindi, ali ye finki. Ali ye siira, bari a te ke la doloo ti. Ali ye timili-tamali, wayini* te a saabu la.

¹⁰Kaatu ko, Yaawe ye siinoo baa le kupi ali kaŋ, aduŋ annabiyomoolu mennu keta ali jerilaŋ ñaalu ti, a ye wolu ñaalu tawuŋ ne, jerilaalu mennu keta ali kuŋolu ti, a ye wolu kuŋolu suki.

¹¹N na ñiŋ jeroo muumewo keta ali ye le ko kitaabu notoriŋo. Niŋ ì ye a dii moo la meŋ ye karaŋo noo, ì ko a ye ko, “Ñiŋ karaŋ baŋ,” a be a fo la le ko, “N te a noo la, kaatu a be notoriŋ ne.”

¹²Waraŋ niŋ ì ye kitaaboo ñiŋ dii moo la, meŋ maŋ karaŋo noo, ì ko, “Dukaree ñiŋ karaŋ ǹ ye,” a be ì jaabi la le ko, “Nte maŋ karaŋo noo.”

¹³Yaawe ko: “Ñiŋ moolu ka m batu ì daalu doroŋ ne la, ì ka m buuñaa ì neŋ kolomoo doroŋ ne la, bari ì sondomoolu jamfata n na le. Niŋ ì be m batu la, ì ka bula hadamadiŋolu la yaamaroo le nooma, ì ye meŋ karaŋ ì kuŋ fee.

¹⁴Wo to saayiŋ, m be jaakaloo laa la ñiŋ moolu kaŋ ne kotenke, dewuŋ ye laa dewuŋ kaŋ. Moo ñaamendiŋolu la ñaameŋo si yeemaŋ, hakilidiyaa ye maabo hakilimaalu ma.”

¹⁵Kooroo be moolu le ye mennu ye a kata baake, ka ì la yaamaroolu maabo Yaawe ma. Ì ka ì la kebaaroolu ke diboo kono, ì ka a fo ko, “Jumaa le ka ǹ je? Jumaa le be a loŋ na, ǹ ka meŋ ke?”

¹⁶Ali ka kuwolu kunna faliŋ ne, ko niŋ boodaalaa faŋo falinta potoo ti. Fo meŋ dadaata si a fo noo a dadaalaa ye, “I maŋ n dadaa”? Daandiŋo si a fo noo a dadaalaa ye ñaadii le ko, “I maŋ feŋ loŋ”?

¹⁷Tooñaa, a te mee la faŋ, Libanooni sutoo si yelema ka ke doodulaa kendiŋo ti, doodulaa kendiŋo ye ke ko sutu yiriwaariŋo.

¹⁸Wo luŋo la tulu sukiriŋolu si moo moyi, a be kitaaboo karaŋ na, aduŋ finkintewolu be i je la le, ì te tara la fiŋo niŋ diboo kono.

¹⁹Yaawe be moo toorariŋolu kontaanindi la le kotenke, aduŋ fentaŋolu be seewoo la Banisirayila la Senuŋ Baa la kuwo to le.

²⁰Moo tooralaalu te tara la baluwo to kotenke, Alla ñaawalilaalu siyo si baŋ, aduŋ mennu ñaa ka tu looriŋ ka kuu jawoo ke,

²¹mennu la kumoo ka moo nondi, ì ka moo feere, meŋ ka kiitii kuntoo ke saatee dundaŋ daa* to, ì ka moo tilindiŋo la boloo buusi a la ì la seedenduriyaa la, wo moolu bee si faa.

²²Wo to saayiŋ, Yaawe meŋ ye Iburayima kumakaa, a ye ñiŋ ne fo Yaakuba lasiloo moolu la kuwo to ko: “Malu kuwo te laa la Yaakuba koomalankoolu kaŋ kotenke, ka ì ñaadaalu furayindi.

²³Kaatu ko, niŋ ì koomalankoolu ye a je, m be meŋ ke la ì kono, wo be a tinna le ì ye n too horoma. Ì be Banisirayila la Senuŋ Baa horoma la le. Banisirayila la Alla ñaasilaŋo be tara la ì la le.

²⁴Mennu hakiloo jakasita, ì si naa fahaamuroo soto, mennu ka woosii kalantaŋo ke, ì fanaa be soŋ na le ka karandi.”