Read Mandinka Yesaya 3 Bible Online

Yesaya 3 - Mandinka bible

Yesaya 3

¹Saayiŋ, Yaawe* Alihawaa Maariyo* pareeta le ka munafaŋ feŋolu bee taa Yerusalaamunkoolu niŋ Yahuuda moolu bulu, domoroo niŋ jiyo bee, aniŋ ì ka jiki mennu la.

²A be ì la kelejawaroolu niŋ ì la kelediŋolu buusi la ì la le, ì la kiitindirilaalu, annabiyomoolu, juubeerilaalu, alifaalu,

³ka taa kelediŋ ñaatonkoolu aniŋ makaamatiyolu, yaamarilaalu, mecetiyolu, aniŋ saabutiyolu.

⁴A be kambaanendiŋolu le ke la ì la ñaatonkoolu ti, dindiŋ meseŋolu ye ì mara.

⁵Moolu be ñoo mantoora la le, moo si boyi a ñoŋ moo kaŋ, siiñoo, a siiñoo kaŋ. Fondinkewolu si i loo alifaalu fee, moo kenseŋolu si jutunnayaa tiliŋ buuñaa moolu la.

⁶Wo luŋo la, moo doolu be taa le, ka ì baadiŋo muta, ka a fo ko, “Ite ye dendika baa soto le, i si ke ǹ na ñaatonkoo ti, i si mara ǹ na ñiŋ tumbuŋ tuŋo ma.”

⁷Bari a be woosii la le, a ye a fo ì ye ko, “Nte te ali la baramoo jaara noo la! M maŋ domoroo niŋ feetoofatoo soto n na buŋo kono, ali ka a fo ko, ŋa ke ali la ñaatonkoo ti.”

⁸Yerusalaamu be jiijaa kaŋ ne, Yahuuda be boyi kaŋ, kaatu ì fokumoolu niŋ ì kekuwolu ka Yaawe le sooki, ka balaŋo tiliŋ a la semboo niŋ waroo la.

⁹Ì mankutoo le keta ì seedoo ti. Ì ka tintiŋ ì faŋolu la junuboolu la le ko Sodomunkoolu, ì buka a maabo. Kooroo be boyi la ì kaŋ ne, ì ye maasiiboo naati ì faŋolu kaŋ.

¹⁰Yaawe ko, “A fo moo tilindiŋolu ye ko, ì la kuwolu be beteyaa la le, kaatu ì ye meŋ dookuu, ì be i munafaŋ na a la le.

¹¹Bari kooroo be moo kuruŋolu ye, maasiiboo be naa boyi la ì kaŋ ne. Ì ye meŋ dookuu, ì be ì joo la wo le la.

¹²Hee, n na moolu, dindiŋolu ye ali mantoora le, musoolu keta ali la maralilaalu ti. Ali la ñaatonkoolu le ye ali filindi, ì ye ali koo dindi siloo la.”

¹³Yaawe ye a la siiraŋo taa kiitiidulaa to le, aduŋ a pareeta le ka bankoolu kiitindi.

¹⁴Yaawe pareeta le, ka a la moolu la alifaalu niŋ ì la ñaatonkoolu kiitindi. A ko, “Alitolu le ye wayini* yiri kankaŋo kasaara! Ali ye feŋolu mennu buusi fuwaaroolu bulu, wolu le be ali la buŋolu kono.

¹⁵Ali ye muŋ kuu le ke teŋ, ka n na moolu mantoora aniŋ ka fuwaaroolu halaki?” Yaawe Alihawaa Maariyo le ye a fo.

¹⁶Yaawe ko, “Siyoni* musoolu ye ì faŋ wara le. Niŋ ì be taama kaŋ, ì be ì kaŋolu fayiŋ-fayiŋ na, ì be ì ñaalu yelemandi la, ì be taama la kepeti-kepeti, ñara feŋolu be kuma la ì siŋolu bala.”

¹⁷Saayiŋ, Maariyo be maadiŋ kuuraŋo le ke la Siyoni musoolu kuŋolu bala, a be ì bala kenseŋo laa la banta.

¹⁸Wo luŋo la, Maariyo be ì la ñaroolu buusi la le, buluto ñaroolu, kunto ñaroolu, aniŋ kanto ñaroolu mennu ka muluŋ ko karibo kutoo,

¹⁹tulutotaalu niŋ yooroolu, kuŋ muurilaŋolu,

²⁰tikoolu, sinto ceenoolu, teesitiraŋolu, karabaanijii kaboolu aniŋ safoolu,

²¹tampurilaŋ konnaalu niŋ nuntokonnaalu,

²²dendika ñiimaalu, dendika baalu, muurilaŋ faanoolu, kalipewolu,

²³famfelendaŋolu, dendika feemaalu, fayindiŋolu, aniŋ ì la kaaloolu.

²⁴Sunkaŋo le be seeroo la palaasoo taa la, teesitiraŋ ñiimaa be yelema la julu kotoo le ti, kuŋ ñarandoo ye yelema kuŋ nunkoo ti, paree ñiimaa ye yelema booto funtu duŋo ti, muluŋ ñiimaa si yelema maloo ti.

²⁵Yerusalaamu, hawusaroo* le be i la kewolu faa la, i la kelejawaroolu ye faa kele wuloo kono.

²⁶Saatee dundaŋ daa faŋo be woosii la le ka kumboo, saatewo faŋo be muluŋ na le ko musoo, meŋ kiideeriŋo be siiriŋ bankoo to.