Read Mandinka Yesaya 30 Bible Online

Yesaya 30 - Mandinka bible

Yesaya 30

¹Yaawe* ye a bankee le ko: “Kooroo be boyi la n na ñiŋ dindiŋ balannaalu kaŋ ne, moolu mennu ka ì fansuŋ feeroolu taamandi mennu maŋ ke n taa ti, ka kambeŋo siti meŋ maŋ ke n na lafoo ti, ka junuboo sapi ñoo kaŋ.

²Ì ka taa Misira, ì buka n na yaamaroo ñini, ka taa maakoyiroo ñini Firawoona bulu, fo ì si tara Misira la tankoo koto.

³Bari Firawoona la maakoyiroo be naa ke la ì ye malu kuwo le ti, Misira la tankoo si naa ke ì ye dooyaaroo ti.

⁴Ì la kiilaalu futata Misira bankoo kaŋ ñaa-wo-ñaa, Sowani niŋ Hanesi saatewolu to,

⁵Yahuuda bee be malu la le, kaatu wo moolu te ì nafaa la, ì te ì maakoyi noo la feŋ ne to, fo niŋ ì ye maloo niŋ dooyaaroo naati ì ye.”

⁶Ñiŋ kiilaariyaa kumoo le fota Nekefu* tundoo daafeŋolu la kuwo to: Ñiŋ kiilaalu ka taa niŋ banku le la, ì be bataa niŋ niitooroo taki la daameŋ. Jata kewolu niŋ jata musoolu le be siloo kaŋ, daŋaroolu niŋ capatoolu. Ì ye faloolu niŋ ñonkomoolu dunindi ì la naafuloo la, ka ì samba wo banku nafantaŋo to.

⁷Misira la maakoyiroo te nafaa soto la ì ye. Wo to saayiŋ, ŋa a kumandi Rahabu[45] sooneeyaariŋo le la.

⁸Saayiŋ taa, i ye a safee ì ñaa la, walaa bala, i ye a ke ì ye kitaaboo fanaa kono, fo a si ke ì ye seede koyoo ti fo abadaa.

⁹Ñinnu mu balannaalu le ti, moolu mennu ka faniyaa fo. Ì buka paree ka i lamoyi Yaawe la yaamaroo la.

¹⁰Ì ka a fo jerilaalu ye le ko, “Ali kana jeroo ke kotenke!” Ì ka a fo annabiyomoolu fanaa ye le ko, “Ali kana tooñaa fo ntolu ye! Ali kuma diimaalu fo ǹ ye, ali ka neeneeri kumoo bankee ǹ ye!

¹¹Ali bo tooñaa siloo kaŋ, ali jenke wo siloo ye, aduŋ ali si i foño ka Banisirayila la Senuŋ Baa la kumoo fo ǹ ye.”

¹²Wo to saayiŋ, Banisirayila la Senuŋ Baa ye ñiŋ ne fo ko: “Bayiri ali balanta a la ñiŋ kiilaariyaa kumoo la le, ka moo mantoora, wo le mu ali la jikiraŋo ti, neeneeroo, wo le mu ali la semberaŋo ti,

¹³ñiŋ junuboo be ke la ali ye le ko tata sansaŋ jaŋo meŋ farata, a be laamaariŋ, kataba kiliŋ a ye naa boyi piram.

¹⁴A be teyiŋ-teyiŋ na le ko daandiŋo, a bee ye nunku lep, ali te teyindaŋ kiliŋ soto la, ka dimbaa bii a la ka bo sinkiroo to, waraŋ ka jiyo bii a la ka bo jiibindaa kono.”

¹⁵Maarii Yaawe, Banisirayila la Senuŋ Baa ye ñiŋ ne fo ko, “Niŋ ali tuubita ali ye tenkuŋ, wo le mu ali la kiisoo ti. Niŋ ali naata n kaŋ tenkuŋo kono, ali ye lannoo soto, wo le be ke la ali la semboo ti.” Bari ali maŋ soŋ.

¹⁶Ali ko, “Hanii, m̀ be sele la suwoolu le kaŋ ŋà bori.” Haa, ali si bori! Ali ko, “M̀ be bori la le,” aduŋ, “M̀ be sele la suu tariŋolu le kaŋ.” Ali bayindilaalu fanaa be tariyaa la wo le ñaama.

¹⁷Moo wuli kiliŋ be bori la le, moo kiliŋo silaŋñaa kamma la, moo luulu silaŋñaa kamma la, ali bee be bori la le, ali ye ke ko bandeeri dokoo meŋ dammaa tuta konkoo kaŋ santo, waraŋ taamanseeri dokoo meŋ dammaa tuta konkoriŋo kaŋ.

¹⁸Hani wo, Yaawe be hameriŋ ne ka hiina ali ma, a pareeta le ka balafaa yitandi ali la, kaatu Yaawe mu Alla le ti meŋ tilinta. Seewoo be moolu le ye mennu ka ì jikoo loo a kaŋ.

¹⁹Hee Siyoninkoolu*, alitolu mennu be sabatiriŋ Yerusalaamu, ali te kumboo la kotenke. Niŋ ali kumboota maakoyiroo la, a be hiinoo yitandi la ali la a ñaama le. Niŋ a ye a moyi doroŋ, a be ali jaabi la le.

²⁰Yaawe ye a la kuluuroo domoroo niŋ toorandiroo jiyo dii ali la ñaa-wo-ñaa, hani wo ate meŋ mu ali karammoo ti, a te a faŋ maabo la ali ma kotenke, ali be a je la le.

²¹Niŋ ali jenketa ka bo siloo kaŋ, bulubaa la waraŋ maraa la, ali tuloo be a kumakaŋo moyi la ali kooma le ko, “Ñiŋ ne mu siloo ti, ali taama niŋ a la.”

²²Ali be ali la jalaŋolu tiñaa la le, ali ye mennu muuri kodiforoo niŋ sanoo la. Ali be ì fayi la le ko feŋ nooriŋo, ali ye a fo ì ye ko, “Ali taa jana.”

²³Yaawe be samaa jindi la ali la fiifeŋolu kaŋ ne, siimaŋo meŋ be faliŋ na bankoo kaŋ si beteyaa, a ye siyaa. Wo luŋo la, ali la ninsi koorewolu be daañiniŋo ke la dulaa fanuriŋ baalu le to.

²⁴Ninsoolu niŋ faloolu mennu ka bankoo sene, ì si beeyaŋ domori koomaa domo, ì ye meŋ tenteŋ a feeraŋo niŋ a kooraŋo la.

²⁵Wo faari luŋ baa la, niŋ tata jaŋolu be boyi la, boloŋolu si woyi konko jaŋolu bee kaŋ, aniŋ konkoriŋolu bee.

²⁶Niŋ Yaawe be a la moolu la baramoo jaara la, ka bataariŋolu la dimiŋolu jaara, karoo si mala ko tiloo. Tiloo la maloo si lafaa ko siiñaa woorowula ko tili woorowula kemperiŋo maloo.

²⁷A juubee, Yaawe bota naŋ dulaa jaŋ ne, a la kamfaa niijii kaŋo ka munta le ko dimbaa niŋ siisii budubudoo, kamfaa kumoo le be faariŋ a daa kono, a neŋo ka mala ko dimbaa.

²⁸A niijii foñoo ka munta le ko waamoo meŋ futata kaŋo to. A ka bankoolu tenteŋ kasaara tamewo le kono. A ka karafee juloo bula moolu ŋaaŋaa la ka ì filindi.

²⁹Banisirayilankoolu, ali be denkiloo laa la le suutoo, ko niŋ ali be luŋ buuñaariŋo le juura kaŋ. Ali jusoolu si tara laariŋ, ko niŋ moolu niŋ footaŋ kumakaŋolu ka taa Yaawe la Konkoo[46] kaŋ, Yaawe, Banisirayila la Semberaŋ Beroo.

³⁰Yaawe be moolu moyindi la a kaŋ kallankeeyaariŋo* la le, aduŋ ì be a je la le, a busari buloo be jii kaŋ naŋ duuma, a niŋ kamfaa baa niŋ dimbaa wuleŋo, saŋ feteŋo, turubaadoo aniŋ saŋ beroo.

³¹Asiriyankoolu kijoo be teyi la le, niŋ ì ye Yaawe kaŋo moyi, niŋ a ye ì kele niŋ a la dokoo la.

³²Yaawe ye lipari-wo-lipari laa ì kaŋ a la mantooralaŋ dokoo la, wo niŋ tantaŋolu niŋ kooraalu kumakaŋo le be taa ñoo la. A buloo be teekariŋ santo le ka ì kele.

³³Tooñaa, ì meeta Tofeti[47] parendi kaŋ ne, ì ye a parendi mansa[48] le kamma. A dinkoo bee mu dimbaa le ti, ì ye a fanundi ka a dinkandi. Loo niŋ dimbaa be fuumariŋ a kono. Yaawe la niijii foñoo meŋ malariŋo ka woyi naŋ, a be a hilihilindi la le.