Read Mandinka Yesaya 32 Bible Online

Yesaya 32 - Mandinka bible

Yesaya 32

¹A juubee, mansa be soto la le, meŋ be maraloo ke la tiliŋo kono, aduŋ a la maralilaalu be tooñaa le taamandi la.

²Ì meŋ-wo-meŋ be ke la moolu ye le ko taradulaa, ka ì tankandi foñoo la, aniŋ ka maabodulaa soto, niŋ burufatoo naata. Ì be ke la le ko boloŋo, meŋ ka woyi keñewuloo* kono, aniŋ bere konkoo niiniyo kene kenseŋo kono.

³Wo to, moolu mennu ñaalu ye jeroo ke, ñaalu te biti la kotenke, aduŋ moolu mennu tuloolu ka moyiroo ke, si i lamoyi.

⁴Moo caawuriŋo sondomoo be fahaamuroo ke la le, bibilaa ye kumoo fo, a ye koyi.

⁵Ì te toolewo kumandi la moo kummaa la kotenke, sako ka tapalewo buuñaa.

⁶Kaatu toolewo ka tooleeyaa diyaamoo le ke, aduŋ a sondomoo ka tara feeroo le siti kaŋ, ka kuu jawoo baara. A buka tara Alla la kuu to, aduŋ a ka kuu sotobaloo le fo Yaawe* la karoo la. A ka konkotoo konkoriŋo tu jee le, a ka mindootoo bali jiyo la.

⁷Tapalewo ka tapaleeyaa doroŋ ne taamandi, aniŋ ka kuu jawoo kurukuru. A ka fuwaaroolu kasaara a la faniyaa kumoo le la, hani a ye a tara wo fentaŋolu be tooñaa siloo le kaŋ.

⁸Bari moo kendoo ka feere kendoo le taamandi, aduŋ a ka loo kuu kendoo le kaŋ.

⁹Alitolu musu dahaariŋolu, ali i paree ka i lamoyi n na. Alitolu dimmusoolu mennu be siikuuriŋ, ali ali tuloo loo n na kumoo la.

¹⁰Janniŋ sanji kiliŋ alitolu mennu be siikuuriŋ, be jarajara la le, siimaŋ katitaa te soto la, aduŋ ali la wayini* yiroolu te diŋ na.

¹¹Alitolu musu dahaariŋolu, ali jarajara, ali maamaŋ alitolu dimmusoolu mennu be siikuuriŋ. Ali ali la duŋ feŋolu wura, ali ye booto funtoo siti ali tewo la faanoo ti, ka ali la niikuyaa yitandi.

¹²Ali ali sisoo lipa niitooroo kamma, kaatu kene jambandiriŋo kasaarata le, aniŋ wayini yiri kankaŋolu.

¹³Ŋaniŋ sutoolu le be faliŋ kaŋ n na moolu la bankoo kaŋ. Ali woosii moolu la kuwo la, mennu be kontaaniriŋ nuŋ saatee seewooriŋo kono.

¹⁴Mansabuŋo kenseŋo le be tu la jee, saatee duuriŋo ye tara kiideeriŋ. Tatoo niŋ kantari buŋo be ke la daafeŋolu la dinkiraa le ti fo abadaa. Faloolu si i bidibidi jee, a ye ke beeyaŋolu ye daañini dulaa ti,

¹⁵fo janniŋ Alla la Nooroo be jii la ǹ kaŋ naŋ ka bo santo, keñewuloo ye ke banku kendiŋo ti, banku kendiŋo ye dibi yiri sutoo la.

¹⁶Tiliŋo ye taama keñewuloo kono, tooñaa ye sabati banku kendiŋolu to.

¹⁷Tiliŋo be naa ke la kayiroo le ti, aduŋ tiliŋo fanaa be naa tenkuŋo le naati la aniŋ lannoo fo abadaa.

¹⁸Hani wo, samberoo be jii la yiri sutoo kaŋ ne, a ye jee bee kasaara ka taa fo saatewo, bari n na moolu be tara la sabatiriŋ dinkiraa tenkundiŋo le to, koridaa tankariŋolu kono, aniŋ foñondiŋ dulaalu, moo te ì batandi la daameŋ.

²⁰Seewoo be moo le ye, meŋ ye a la fiifeŋolu fii boloŋ daalu to, a si a la ninsoolu niŋ a la faloolu bula, ka ì daañini daa-wo-daa.