Read Mandinka Yesaya 33 Bible Online

Yesaya 33 - Mandinka bible

Yesaya 33

¹Kooroo be boyi la ite kasaaralilaa kaŋ ne, moo maŋ ite meŋ kasaara. Kooroo be boyi la ite jamfaalaa kaŋ ne, moo maŋ ite meŋ jamfaa. Niŋ i ye i foño kasaaraloo la, hani wo, i be kasaara la le. Niŋ i ye i foño jamfaamooyaa la, wo to le jamfaa kuwo be naa ke la i la.

²Hee Yaawe*, hiina ǹ na, ŋà ǹ jikoo loo i kaŋ ne. Semboo dii ǹ na luŋ-wo-luŋ, i si ke ǹ tankandirilaa ti, ǹ na niikuyaa waatoo.

³I sari kaŋo ka a tinna le moolu ye bori, niŋ i wulita i sembe baa la, bankoolu bee ka janjaŋ ne.

⁴Niŋ wo keta, ì si ñapi jawoolu la feŋolu kaŋ komeŋ kuntiŋ ñatoolu. Feŋ-wo-feŋ keta ì taa ti, ì si a bee buusi ì bulu.

⁵Yaawe warata le, aduŋ a be sabatiriŋ santo le. A be Siyoni* ke la tiliŋo niŋ tooñaa dinkiraa le ti.

⁶Ate le be ke la ali la waatoo fondamaŋ bambandiŋo ti, kiisoo, ñaameŋo aniŋ londoo diilaa. Yaawe ñaasilaŋo, wo le mu ali la naafuloo ti.

⁷A juubee, kee fatiŋolu be maakoyiroo kumboo kaŋ mbeedoolu kaŋ ñaameŋ, aduŋ kiilaalu mennu lafita kayiroo sabatindi la, fanaa wuurita le kendeke.

⁸Mbeedoolu kenseŋyaata, hani tambilaa kiliŋ te siloolu kaŋ. Kambeŋo tiñaata moolu teema, ì jututa a seedoolu la, ì maŋ moo-wo-moo le horoma.

⁹Bankoo be sunu la le komeŋ hadamadiŋo, a ye tiñaa. Hani Libanooni yiri sutoolu be malu la le, ì ye jaa. Saroni kunku betoolu be muluŋ na le ko keñewuloo*, Basani niŋ Karimeli yiroolu bee be ì jamboolu joloŋ na le.

¹⁰Saayiŋ Yaawe ko, “M be wuli la le, m be buuñaa la le, m be n na kallankeeyaa* yitandi la le.

¹¹Bankoolu, ali la feeroo ka munta le ko fuufulewo, aduŋ a koolaa be naa ke la ñaama jaara kenseŋ ne ti. Ali niijii foñoo be ke la dimbaa le ti, meŋ be ali faŋolu jani la, fo ali ye keremu.

¹²Moolu be jani la le, ì ye nunku komeŋ lasi munkoo, aniŋ ka ke ko ŋaniŋ sutu jasiriŋo, dimbaa be naa duŋ na meŋ na.

¹³Alitolu mennu be jamfariŋ, ali naa a juubee ŋa meŋ ke, mennu be sutiyaariŋ, ali soŋ n na semboo la.”

¹⁴Junubelaalu mennu be Siyoni, kijoo farata le. Jarajaroo dunta Alla sookilaalu la. Ì ko, “Jumaa le be ntolu kono, meŋ niŋ Yaawe la dimbaa si tara noo ñoo kaŋ? Jumaa le be ntolu kono, meŋ si tara noo dimbaa dendeŋo la, meŋ buka faa noo?”

¹⁵Moo meŋ kekuwolu tilinta, aniŋ a fokumoolu ka ke tooñaa ti, meŋ buka sotoo ke tapaleeyaa kono, meŋ buka dukoo muta, meŋ ka a tuloo kaasi feeroolu la ka moo faa, aniŋ ka a ñaa kaasi kuu kuruŋ kewo la,

¹⁶wo le be ke la moo ti, meŋ be tara la tankoo kono. Tatoo meŋ be konkoo kaŋ, be ke la a ye tankaraŋo le ti. A be domoroo soto la le, aduŋ jiyo te a dasa la.

¹⁷Ali faŋo ñaa be Mansa Kallankewo je la le, aduŋ ali be a la bankoo dulaa jamfariŋolu bee je la le.

¹⁸Wo to ali hakiloo be bula la silaŋo la le meŋ laata ali kaŋ nuŋ, ali si a fo ko, “Wo moo lee meŋ ka ǹ na feŋolu yaatee? Wo moo lee, meŋ ka ǹ na feŋolu peesa? Wo moo lee, meŋ ka ǹ na tatoolu konti?”

¹⁹Ali te wo faŋ wara moolu je la kotenke, mennu ka kaŋ siifaalu fo, ali buka mennu moyi noo, aniŋ ka diyaamu ko mennu neŋo kadata, ali te mennu fahaamu noo la.

²⁰Siyoni juubee, ǹ ka ǹ na diina beŋolu kidimandi daameŋ. Ali be a je la le, Yerusalaamu be tara la tenkuŋo meŋ kono, ko tiriliisoo* meŋ pikaloolu te wutu la a noo to, aniŋ meŋ juloolu te kuntu noo la muumeeke.

²¹Yaawe be a la sembe waroo yitandi la ǹ na jee le to. Baa fanuŋo aniŋ boloŋ baa be tara la jee le. Bari hani wo ǹ jawoolu te kele kuluŋolu jiba noo la jee, sako kuluŋ baalu si tambi jee.

²²Yaawe le mu ǹ na kiitiikuntulaa ti, Yaawe le mu ǹ na ñaatonkoo ti. Yaawe le mu ǹ na mansoo ti. Ate le be ǹ tanka la.

²³Bari ǹ jawoolu la kuluŋo juloo maŋ bambaŋ, a dokoolu ka jiijaa le, aduŋ a foño mutaraŋ faanoo maŋ fanu. Wo to, ñapinkaŋ feŋ jamaa be talaŋ-talaŋ na le, lanjuurutoolu faŋolu ye doo soto jee.

²⁴Moo te tara la Siyoni meŋ be a fo la ko, “N saasaata le.” Moolu mennu be sabatiriŋ jee, ì la junuboolu be kafari la le.