Read Mandinka Yesaya 34 Bible Online

Yesaya 34 - Mandinka bible

Yesaya 34

¹Alitolu bantala bankoolu*, ali kata naŋ, ali ye i lamoyi. Moolu, ali ali tuloo loo. Duniyaa si a moyi, aniŋ a konokono feŋolu bee, duniyaa aniŋ mennu bee be baluuriŋ a kono.

²Yaawe* be kamfaariŋ bantala bankoolu bee kamma le, a jusoo be kandiriŋ ì la kelediŋ kafoolu bee le kamma. A be ì kasaara la le fereŋ, a ye ì dii ka taa ì kanateyi.

³Ì furewolu be tara la fayiriŋ ne, ì ye tara sunkaŋ na, konkoolu bee si tara faariŋ ì yeloo la.

⁴Saŋo santo malafeŋolu si yooyi, saŋ fatoo si moromoro, looloolu bee si joloŋ, ko yiri jamba jaariŋo ka joloŋ ñaameŋ, ko sooto diŋ nororiŋo ka joloŋ ñaameŋ.

⁵N na kiitindiri hawusaroo* ñeeliriŋo le be saŋo santo. A fele, saayiŋ a ka naa jii Edomunkoolu le kaŋ, ŋa mennu kiitindi ka ì faa.

⁶Yaawe la hawusaroo ñeelita yeloo la le, a fuumata keŋo la, saajiiriŋolu niŋ baalu keŋo, saakotoŋ kookiloolu keŋo. Yaawe be sadaa* le bo kaŋ Bosira,[49] kanateyiri baa, Edomu bankoo kaŋ.

⁷Ì niŋ daakoyoolu le be faa la ñoo la, tuuraariŋolu niŋ tuuraa baalu. Ì la bankoo be faa la yeloo le la, dulaa bee ye tara faariŋ keŋo la.

⁸Yaawe ye kiisandiroo parendi Siyoni* ye le, aniŋ saŋo meŋ na a be a la kuwo makatoo bayi la.

⁹Boloŋolu mennu be Edomu be yelema la manoo le ti, bankoo ye yelema solifa munkoo* ti. Bankoo muumee bee si jani ko manoo.

¹⁰A be tu la malariŋ ne suuto tili, a te faa la, a siisiyo be tii la santo le fo abadaa. Ka bo jamaani ka taa jamaani, a be tara la kenseŋyaariŋ ne, moo nene te tambi la niŋ jee la kotenke.

¹¹Sonkosonkoolu niŋ kiikiyaŋolu le be sabati la jee, kiikiyaŋ caraatoolu niŋ kaanaalu le be ñaŋo ke la jee. Yaawe be jee la kuwo sumaŋ na le ka a dundi ñoo to, a ye a la kuwo peesa ka jee jakasi.

¹²Ì be bankoo kumandi la Banku Mansantaŋo le la. A maralilaalu bee be yeemaŋ na le.

¹³Ŋaniŋolu le be faliŋ na a mansa buŋolu kaŋ, ñaamoolu ye tara falindiŋ tatoolu kaŋ. A be ke la kunkuwuloolu sabatidulaa le ti, a ye ke kiikiyaŋolu la dinkiraa ti.

¹⁴Keñewuloo* daafeŋolu niŋ suluwolu si beŋ, minaŋolu si kali kuma jee, suuto daafeŋolu fanaa si jee ke ì la taradulaa ti, ka dulaa ñini ì faŋolu ye, ì be i dahaa la daameŋ.

¹⁵Kiikiyaŋolu be ñaŋo ke la jee le, ì ye kiloo laa jee, ì ye a teyi, ì ye ì diŋolu topatoo ì faŋo dampaŋo koto. Seeliŋolu fanaa be beŋ na jee le, ì bee niŋ ì kafuñoo.

¹⁶Ali Yaawe la kitaaboo kono juubee, ali ye a karaŋ. Feŋ ne te manki la ñiŋ daafeŋolu kono, feŋ te foo la a mooñoo la jee, kaatu a faŋo daa le ye yaamaroo dii, aduŋ a la Nooroo le ye ì kafu ñoo kaŋ.

¹⁷A faŋo ye alikuuroo* ke ì la kuwo to le, a faŋo buloo le ye Edomu talaa ì teema. A be tara la ì bulu le fo abadaa, ì ye tara sabatiriŋ jee, ka bo jamaani ka taa jamaani.