Read Mandinka Yesaya 38 Bible Online

Yesaya 38 - Mandinka bible

Yesaya 38

¹Wo waatoo la, Hesekiya naata kuuraŋ baake, fo a be naa faa la. Amosi dinkewo Annabilayi Yesaya taata a yaa, a ko a ye ko, “Yaawe* ko i ye i la bunkono kuwolu bo ñoo to, kaatu i be faa la le, i te kendeyaa la.”

²Bituŋ Hesekiya ye a ñaa tiliŋ bumbaloo la, a duwaata ka Yaawe daani ko,

³“M Maarii Yaawe, ŋa i daani i si ñiŋ juubee ko, n taamata i ñaa koto tiliŋo le la, aniŋ sondome seneyaa, aduŋ m baarata kuwolu le la mennu beteyaata i fee.” Bituŋ a kumboota kendeke.

⁴Yaawe la kumoo naata Yesaya kaŋ ka a fo a ye ko,

⁵“Taa i ye a fo Hesekiya ye, nte Yaawe, a bonsuŋ Dawuda la Alla ko, ŋa a la duwaa moyi le, aduŋ ŋa a ñaajiyo je le. Saayiŋ, m be sanji taŋ niŋ luulu le lafaa la a siyo kaŋ.

⁶M be ate niŋ ñiŋ saatewo bee le tankandi la Asiriya mansa ma. M be loo la ñiŋ saatewo ye le.

⁷Nte Yaawe ye meŋ laahidi, m be a ke la le. Ñiŋ ne be ke la i ye taamanseeroo ti:

⁸M be niiniyo, tiloo ye meŋ dii, murundi la kooma le fo simfaañaa taŋ, Ahasi la selenselendaŋo kaŋ.” Bituŋ tiloo muruta kooma simfaañaa taŋo la, a jiita nuŋ meŋ na.

⁹Hesekiya, Yahuuda mansa la duwaa le mu ñiŋ ti, a ye meŋ ke, kabiriŋ a saasaata, bituŋ a naata kendeyaa a la saasaa to. A ko:

¹⁰Ŋa ñiŋ ne miira m faŋ ma ko, m be n taŋ niŋ fula waatoo meŋ na, saayaa be n na daa konkoŋ na le, ka n na baluwo toomaa bee buusi m bulu.

¹¹Ŋa a miira le fanaa ko, n te Yaawe je la kotenke, baluuriŋolu kono duniyaa jaŋ. N te hadamadiŋ je la kotenke, waraŋ n niŋ moolu ye tara ñoo kaŋ, mennu be baluuriŋ ñiŋ duniyaa kono.

¹²Ì ye n na buŋo taa m bulu le, aduŋ ì ye a kafu ñoo ma le, ko kantarilaa la jembereŋo. Ko daarilaa ka a ke ñaameŋ, ŋa n na baluwo moromoro wo le ñaama ko bayi faanoo. N kuntuta daarilaŋ dokoo bala le ko bayoo. Suuto tili, n ka tu a miira la le ko, Maariyo be naa n na baluwo daŋ na le.

¹³N ka tu m miira la le fo fanoo ye ke. A ye n kuloolu bee kati le ko jatoo. Suuto tili, n ka tu a miira la le ko, Maariyo be naa n na baluwo daŋ na le.

¹⁴N woosiita le ko kunoo, n woosiita ko puraa la woosiyo. N ñaa korita juubeeroo la saŋo santo le. Hee Maariyo, m bataata le, naa n deemaa.

¹⁵Bari n si muŋ ne fo noo? A ye laahidoo dii le, aduŋ a ye meŋ fo, a ye a ke le. M buka siinoo noo fereŋ, kaatu n niyo kuyaata le.

¹⁶Maariyo, i ye baluwo dii mennu la, ì be baluu la le. Ñiŋ kuwolu bee kono, n niyo ye baluwo soto le, i ye n kendeyandi keseŋ, aduŋ i si n tentendi ka baluu.

¹⁷Tooñaa, ka dimiŋ baa ñiŋ muña, keta n ye kendeyaa le ti. I ye i la kanoo yitandi n na le, ka n tankandi kasaaroo dinkoo ma. I ye n na junuboolu bee fayi i kooma le.

¹⁸Moolu mennu be kaburoo kono, te i jayi la noo, moo te i tentu noo la saayaa kono, kaburukononkoolu te ì jikoo loo noo la i la tiliŋo kaŋ.

¹⁹Baluuriŋolu mennu be baluuriŋ, ì ka i jayi le ko ŋa a ke ñaameŋ bii, faalu ka i la tiliŋo seyinkaŋ ì diŋolu ye le.

²⁰Yaawe be n tankandi la le, aduŋ m̀ be suukuwolu laa la kooraalu le la, Yaawe Batudulaa Buŋo* to, m̀ baluu tiloolu bee la.

²¹Bituŋ Yesaya ko, “Ali sooto diŋ tuuriŋo dadaa, ali ye a ke maadiŋo ñiŋ to fo a si kendeyaa.”

²²Hesekiya ye Yesaya ñininkaa le ko, “Muŋ ne be ke la taamanseeroo ti ko, m be taa Yaawe Batudulaa Buŋo to le?”