Read Mandinka Yesaya 40 Bible Online

Yesaya 40 - Mandinka bible

Yesaya 40

¹Ali la Alla ko:[50] “Ali n na moolu sabarindi, ali ye ì jusoo ñabu.

²Ali diyaamu kuu Yerusalaamunkoolu ye ka a fo ì ye ko, ì la dookuu koleŋo banta le. N yamfata ì la junube kuwo la le. Ì ye ì la junuboo jooroo soto a ñaama le famfaŋ, ka bo nte Yaawe* bulu.”

³Moo kumakaŋo be sari kaŋ ko: “Ali Yaawe la siloo parendi keñewuloo* kono. Ali sila fanuŋo tembendi ǹ na Alla ye.

⁴Wulumbaŋolu bee ye saareŋ, konko baalu niŋ konkoriŋolu bee ye jii, dulaa tembebaloo ye tembe, kene ñankariŋo ye seneyaa.

⁵Yaawe la kallankeeyaa* be lankenema la le, hadamadiŋolu bee ye a je ñoo la. Yaawe faŋo le ye a fo.”

⁶Kumakaŋo ko, “Kankulaari ke.” N ko, “N ñanta muŋ ne kankulaa la?” A ko, “Hadamadiŋolu bee be le ko ñaamoo, ì la ñiiñaa be le ko wulakono firoo.

⁷Ñaamoo ka noro le, a firoolu ye joloŋ, kaatu Yaawe la niijii foñoo le ka futa ì ma. Tooñaa-tooñaa, hadamadiŋolu mu ñaamoo le ti!

⁸Ñaamoo ka noro le, a firoolu ye joloŋ, bari ǹ na Alla la kumoo ka tu looriŋ ne fo abadaa.”

⁹Ite meŋ ka kibaari diimaa naati Siyoni*, sele konko jaŋo santo, ite meŋ ka kibaari diimaa naati Yerusalaamu, sari kendeke, sari santo, aduŋ i kana sila. A fo Yahuuda saatee moolu ye ko, “Ali la Alla fele!”

¹⁰A juubee, Maarii Yaawe niŋ semboo le ka naa, aduŋ a niŋ wo semboo le be maraloo ke la. A la jooroo be a bulu le, aduŋ a niŋ nafaa le ka naa.

¹¹A ka a la moolu topatoo le ko kantarilaa ka koorewo kanta ñaameŋ. A ka saajiiriŋolu katandi a faŋo la le, ì ye tara a kara la. A ka saajii dimbaalu kenkeŋ kuuke le.

¹²Jumaa le si baajiyo sumaŋ noo niŋ a buluñaa la, waraŋ ka saŋ fatoolu la waroo sumaŋ niŋ a buluteetee la? Jumaa le si ñiŋ duniyaa kankaŋo bee sumaŋ noo niŋ sinsiŋo la, waraŋ ka konko baalu niŋ konkoriŋolu peesa niŋ peesarilaŋo la?

¹³Jumaa le ye Yaawe miiroolu loŋ, waraŋ ka ke a yaamarilaa ti?

¹⁴Yaawe ye jumaa le ñininkaa ka kuwolu bo a ye ñoo to? Waraŋ ka sila tilindiŋo yitandi a la? Jumaa le ye a karandi londoo la kuwo la, waraŋ ka fahaamuroo siloo yitandi a la?

¹⁵Tooñaa-tooñaa, bankoolu ka muluŋ a ñaa koto le ko jii tondoo, meŋ be keraŋo kono, ì ka muluŋ ne ko, niŋ i ye kankaŋo ke peesarilaŋo kaŋ. A ka baajooyoolu peesa le, ì ka feeyaa a fee ko banku kesoo.

¹⁶Libanooni yiroolu maŋ kaañaŋ ka a la sadaalu* jani, sako a daafeŋolu si a la jani sadaalu daafaa noo.

¹⁷Bankoolu bee maŋ ke a ñaa koto feŋ ti, ì maŋ nafaa soto ate fee, ì maŋ ke tuus ti.

¹⁸Wo to saayiŋ, ali be jumaa le niŋ Alla tembendi la? Ali be a niŋ muŋ ne misaali la?

¹⁹Numoo le ka jalaŋolu dadaa, aduŋ sani tunkannaa le ka a muuri niŋ sanoo la, a ye kodiforo kantotaa dadaa a ye.

²⁰Fuwaaroo meŋ maŋ sanoo waraŋ kodiforoo soto, ka yiroo le ñini meŋ te tiñaa la. A ka leserilaa bulu koyiriŋo le ñini ka jalaŋo dadaa a ye, meŋ te busandi la.

²¹Fo ali maŋ a loŋ baŋ? Ali maŋ a moyi? Fo ì maŋ a fo ali ye, kabiriŋ foloodulaa to? Fo ali maŋ a loŋ baŋ, kabiriŋ duniyaa foloota?

²²A be siiriŋ mansasiiraŋo le kaŋ duniyaa bee santo la, aduŋ moolu ka munta a fee le ko jatatoŋolu. A ye saŋ fatoolu waree le ko ridoo, aduŋ a ka a wanka le ko tiriliisoo*, ka ke sabatidulaa ti.

²³A ka maralilaalu la kuwolu jindi le, a ka duniyaa kantiyolu buruka.

²⁴Ì ka muluŋ ne ko fiifeŋo meŋ pareeta suluduŋo la. Niŋ a wulita doroŋ, Yaawe niijii foñoo ye a bee norondi, turubaadoo ye naa a samba komeŋ fuufulewo.

²⁵Senuŋ Baa ko, “Ali be n niŋ jumaa le laa la? Waraŋ ali be n niŋ jumaa le kaañandi la?”

²⁶Ali ali ñaa ke saŋo santo, ali ye a juubee! Jumaa le ye looloolu daa? Ate le ka ì bee kiliŋ-kiliŋ fintindi, a ye too dii ì bee la. Alla la sembe waroo niŋ a la kallankeeyaa le ye a tinna, hani kiliŋ maŋ manki.

²⁷Alitolu Banisirayilankoolu, Yaakuba koomalankoolu, muŋ ne ye a tinna, ali ka tu la woosii la ka a fo ko, “Yaawe buka ǹ na bataalu je, a ka a ñaa kaasi le, kuu tilimbaloolu ye ke ǹ na”?

²⁸Fo ali maŋ a loŋ? Ali maŋ a moyi? Yaawe le mu badaa-badaa Alla ti, meŋ ye duniyaa tonkoŋ naanoo bee daa. A buka bataa sako a si lamfu, aduŋ moo le te a la fahaamuroo daŋo loŋ noo la.

²⁹A ka semboo dii moo bataariŋolu la le, aduŋ a ka lamfuriŋolu bambandi.

³⁰Hani fondinkee bambandiŋolu ka bataa le fo ì ye lamfu, aduŋ fondinkee mereŋolu ka taki le, ì ye boyi.

³¹Bari moolu mennu ye ì jikoo loo Yaawe kaŋ, ì be bambaŋ kuu la le. Ì ye ke ko seeliŋo ka tii santo ñaameŋ. Ì be tara la bori la le, ì te ketu la, ì be taama la le, ì te kori la.