Read Mandinka Yesaya 42 Bible Online

Yesaya 42 - Mandinka bible

Yesaya 42

¹Yaawe* ko: “N na dookuulaa fele, ŋa meŋ na kuwo bambandi. Ŋa ate le tomboŋ, aduŋ a la kuwo ye n seewoo le. M be n na Nooroo jindi la a kaŋ ne, aduŋ a be kiitii tilindiŋo naati la bankoolu kaŋ ne.

²A te sari la, waraŋ ka wuuri sako ka a kaŋo sikandi mbeedoolu kaŋ.

³A te ñaama kala nukujiriŋ kati la, aduŋ a te saraba dubendiŋ faa la. A be kiitii tilindiŋo naati la moolu bee le ye tiliŋo kono.

⁴A te keerikeeri la waraŋ ka jikilateyi, fo niŋ a ye tiliŋo londi ñiŋ duniyaa kono. Moolu mennu be banku jamfariŋolu to, be tara la ñaaniriŋ a la luwaalu le la.”

⁵Yaawe Alla ye saŋ fatoolu daa le, a ye ì wanka, a ye bankoo daa aniŋ a konokono feŋolu bee. Ate le fanaa ye niyo ke duniyaa moolu la, aniŋ ka baluwo dii ì la fo ì si tara noo ñiŋ duniyaa kono. A ye ñiŋ ne fo a la dookuulaa ye ko:

⁶“Nte Yaawe ye i kumandi le ka tiliŋo naati duniyaa moolu ye. Ŋa i buloo muta le ka i kanda, i ye ke n niŋ n na moolu teema kambeŋo ti, aniŋ ka ke banku koteŋolu ye maloo ti.

⁷I be ñaa finkiriŋolu yelendi la le, i ye mutamoolu bondi bunjawoo kono, ka moolu fintindi mennu be bunjawoo dulaa dibiriŋ baa kono.

⁸“Nte le mu Yaawe ti, wo le mu n too ti. N niŋ doo koteŋ te deŋ na n na kallankeeyaa* la, waraŋ ka n na buuñaa dii jalaŋolu la.

⁹A fele, ŋa feŋ-wo-feŋ bankee, a keta tooñaa le ti, saayiŋ m be kuu kutoolu bankee la le. M be ñaato kuwolu fo la ali ye le, janniŋ ì be sii la.”

¹⁰Alitolu mennu ka taama niŋ baa la, aniŋ a konokono feŋolu bee, alitolu banku jamfariŋolu, aniŋ mennu be sabatiriŋ jee, ali suukuu kutoo laa Yaawe ye, a la jayiroo ye bo naŋ duniyaa daŋo bee to.

¹¹Mennu be sabatiriŋ keñewuloo* kono, ye sari santo, Kedari koomalankoolu[54] ye seewoo ì la saateeriŋolu to. Selankoolu[55] ye suukuwo laa kontaanoo kono, ì sari kaŋo ye bo naŋ konkoolu kaŋ.

¹²Ì si Yaawe la kallankeeyaa jayi, fo banku jamfariŋolu ye a moyi.

¹³Yaawe niŋ semboo le be naa ko niŋ kelejawaroo be taa keloo la. A be pareeriŋ ne, a be korontoriŋ keloo kamma le. A ka sari kendeke le, a ka a semboo yitandi a jawoolu la.

¹⁴Yaawe ko: “M meeta deyiriŋ baake le, ŋa m faŋ muta le, m buka feŋ fo. Bari saayiŋ n ka munta le ko niŋ musoo be tiŋo to. N ka sari le, ŋa n niijii kendeke, ŋa ŋuntaŋ.

¹⁵M be konko baalu niŋ konkoriŋolu bee kenseŋyandi la le, ŋa ì la fiifeŋolu bee norondi. M be baalu yelemandi la dulaa jaaroolu le ti, ŋa daloolu jandi.

¹⁶M be tara la finkintewolu le ñaato siloo kaŋ, ì maŋ dali daameŋ na, m be ì kanta la jee le. M be diboo yelemandi la ì ñaatiliŋo la maloo le ti, ŋa sila tembebaloolu tembendi ì ye. M be n na laahidoolu timmandi la le, n te ì baayi la muumeeke.

¹⁷Bari mennu ye ì jikoo loo jalaŋolu kaŋ, mennu ka a fo ì ye ko, ‘Alitolu le mu ǹ na alloolu ti,’ ì niŋ maloo le be muru la ì koo la.”

¹⁸Alla ko: “Alitolu tulu sukiriŋolu, ali i lamoyi. Finkintewolu ali ali ñaa yele, ali ye jeroo ke.

¹⁹Jumaa le finkita ka tambi n na dookuulaalu la, waraŋ a tuloo ye suki ko ŋa n na kiilaalu mennu kii? Jumaa le finkita ko n na tomboŋ moolu, Yaawe la dookuulaalu?

²⁰Ali ye kuu jamaa le je, bari ali maŋ ali hakilitu ì to. Ali tuloolu maŋ suki, bari ali buka feŋ moyi.”

²¹Yaawe ye a la luwaa la kuwo warandi le, fo moolu si a jayi. A ka a yitandi duniyaa moolu la le ko, a tilinta le.

²²Bari ñinnu mu moolu le ti, ì ye mennu ñapinkaŋ ka ì kasaara. Ì be marandiŋ dinkoolu kono, ì be sorondiŋ bunjawoo kono. Ì keta ñapinkaŋ feŋolu ti, ì maŋ moo soto, meŋ si ì kanandi. Ì ye ì samba le, moo maŋ soto ka a fo ko, “Ali ì murundi.”

²³Jumaa le be soŋ na ñiŋ na ali kono, waraŋ ka a hakilitu ñaato siniŋ?

²⁴Jumaa le ye Yaakuba ke ñapinkaŋ feŋo ti, ka Banisirayila dii ñapinkannaalu la? Fo a maŋ ke Yaawe le ti baŋ, ŋà junube kuwo ke meŋ na? Kaatu a la moolu te soŋ na bula la a la siloolu nooma, aduŋ ì te a la luwaalu horoma la.

²⁵Wo le ye a tinna a ye a la kamfaa jindi ì kaŋ kendeke, ka koleyaa taki keloo kono. A la kamfaa jawuyaata le ko dimbaa, bari hani wo, ì maŋ a fahaamu, a ye ì jani le, bari ì maŋ a muta feŋ ti.