Read Mandinka Yesaya 43 Bible Online

Yesaya 43 - Mandinka bible

Yesaya 43

¹Wo to saayiŋ, Yaawe* meŋ ye ite Yaakuba daa, a ye muluŋo ke ite Banisirayila la, a ye ñiŋ ne fo ko: “Ali kana sila, kaatu ŋa ali kumakaa le, ŋa ali kumandi ali too le la ka ke m faŋo taa ti.

²Niŋ ali be teyi la niŋ baa la, m be tara la ali fee le. Niŋ ali be tambi la niŋ baa diinondiŋo la, jiyo te ali kunuŋ na. Niŋ ali taamata dimbaa kono, ali te jani la. Niŋ ali dunta mantooroo kono, a te ali dewuŋ na.

³Kaatu nte le mu Yaawe ali la Alla ti, Banisirayila la Senuŋ Baa, ali Kiisandirilaa. Ali la kuwo le ye a tinna ŋa Misira, Kusi* aniŋ Seeba ke ali ye kumakaaraŋo ti.

⁴M be moolu ke la ali ye jooroo ti le, ka banku koteŋo moolu ke ali ye kumakaaraŋo ti, kaatu ali kummaayaata m fee le, ali keta n na horoma moolu ti, ŋa ali kanu le famfaŋ.

⁵“Ali kana sila, kaatu m be ali fee le. M be ali diŋolu bondi la naŋ tilibo karoo la, ŋa ali bee naati tilijii karoo la.

⁶M be a fo la maraa karoo moolu ye le ko, ì ye ali bula, ali ye taa, ŋa a fo bulubaa karoo moolu ye ko, ì kana ali muta. N na dindiŋolu ye muru naŋ Banisirayila, ka bo naŋ duniyaa daŋo to.

⁷Moo-wo-moo ye m muta a la Alla ti, be muru la naŋ ne, ŋa meŋ daa aniŋ ka muluŋo ke a la, ka n na kallankeeyaa* yitandi.”

⁸Tambi moolu ñaato, mennu ñaa be malariŋ, bari i finkita le, aniŋ mennu ye tuloo soto, bari ì buka moyiroo ke.

⁹Bankoolu bee moolu si beŋ ñoo kaŋ. Jumaa le sotota ñinnu kono, mennu ye ñiŋ ñaato kuwolu fo, waraŋ ka folooto kuwolu yitandi ǹ na? Ì si ì la seedoolu samba ǹ ye naŋ, ka a yitandi ko, ì be tooñaa le kaŋ, fo niŋ doolu ye a moyi, ì si a fo ko, tooñaa le mu.

¹⁰Yaawe ko: “Alitolu Banisirayila le mu n seedoo ti, aniŋ n na dookuulaa, ŋa meŋ tomboŋ, fo ali si a loŋ aniŋ ka laa ko, nte le mu Alla ti aniŋ ka a fahaamu ko, Alla te jee nte koolaa. Alla koteŋ te jee, doo te nuŋ jee, aduŋ doo te tara la jee.

¹¹“Nte, nte le mu Yaawe ti, aduŋ nte koolaa kiisandirilaa te jee.

¹²Ŋa a bankee ali ye le ka a kankulaa meŋ be naa ke la, ŋa ali tankandi. Batufeŋ koteŋ te jee meŋ si ñiŋ ke noo.” Yaawe le ye ñiŋ fo ko: “Alitolu faŋo si ke n seedoo ti ko, nte le mu Alla ti.

¹³Tooñaa, nte le mu Alla ti saayiŋ fo abadaa. Moo te kana noo la m bulu. Niŋ ŋa kuu ke, jumaa le si a faliŋ noo?”

¹⁴Yaawe Banisirayila la Senuŋ Baa, ali Kumakaalaa, ye ñiŋ ne fo ko: “Ali la kuwo kamma la, m be kelediŋ kafoolu kii la Babiloninkoolu kamma le, m be saatee dundaŋ daalu kati la le, aduŋ a la moolu la seewoo saroo be yelema la kumboo le ti.

¹⁵Nte le mu Yaawe ti, ali la Senuŋ Baa, ali la Mansa, meŋ ye Banisirayila daa.”

¹⁶Waati jaŋ koomanto, Yaawe ye siloo ke baa kono, a ye taamadulaa ke fankaasoo kono.

¹⁷A ye kelediŋ kafu baa kenkeŋ ka taa ì kasaara, ì niŋ ì la suwoolu niŋ keleraŋ sareetoolu*. Ì tarata laariŋ ne ì te wuli la kotenke, ì faata le dak, ì dubenta ko lampu meesoo.[56]

¹⁸Saayiŋ Yaawe ko: “Ali ñina folooto kuwolu la, ali kana ali hakiloo loo kuu tambiriŋolu kaŋ.

¹⁹Ali a juubee, m be kuu kutoo le ke kaŋ. A be keriŋ ne saayiŋ, fo ali maŋ a je baŋ? M be siloo parendi kaŋ keñewuloo* kono le, ŋa woyoolu ke ali ye dulaa jaariŋolu to.

²⁰Wulakono daafeŋolu ye m buuñaa le, hani kunkuwuloolu niŋ kiikiyaŋolu, bayiri ŋa jiyo ke keñewuloo* kono le, aniŋ dulaa jaariŋolu, ka jiyo dii n na moolu la, ŋa mennu tomboŋ,

²¹m faŋo ŋa n na moolu mennu daa, fo ì si n jayi ka a janjandi taariŋ.

²²“Hee Yaakuba, hani wo ali maŋ m batu. Hee Banisirayila, ali pasita n na kuwo la le.

²³Ali maŋ saajiyo naati n ye ka a ke jani sadaa* ti, waraŋ ka m buuñaa ali la beeyaŋ sadaa koteŋolu la. M maŋ siimaŋ sadaa dunoo laa ali kaŋ, waraŋ ka ali batandi cuuraayi siisindi la.

²⁴Ali maŋ hani ñaama seeralaa le saŋ n ye naŋ, waraŋ ka n seewondi ali la beeyaŋ sadaalu keŋo la. Bari ali ye n toora niŋ ali la junuboolu le la, aniŋ ka m batandi ali la kuu kuruŋolu la.

²⁵Nte, nte faŋo le ye ali la junuboolu tuutuu n na kuwo kamma la, aduŋ n hakiloo maŋ bula ali la junuboo la kotenke.

²⁶“Ali ŋa taa kiitiyo la, ali ye ali la tuumiri kuwolu naati. Ali ŋà kuwolu fo ñoo kaŋ, ka a juubee meŋ be tooñaa kaŋ.

²⁷Ali la alifaa foloo ye junube kuwo le ke, ali la teemafolaalu[57] fanaa ye balaŋo tiliŋ n na.

²⁸Wo to, m fanaa be ali la Batudulaa ñaatonkoolu dooyaa la le, ŋa Yaakuba ke kasaara feŋo ti, Banisirayila ye ke jelefeŋo ti.”