Read Mandinka Yesaya 44 Bible Online

Yesaya 44 - Mandinka bible

Yesaya 44

¹Yaawe* ko: “Banisirayilankoolu, ali i lamoyi n na, n na dookuulaalu, n na tomboŋ moolu, Yaakuba koomalankoolu.

²Nte Yaawe meŋ ye alitolu daa, ŋa muluŋo ke ali la wuluuñaŋo kono, ali la maakoyilaa, ŋa a fo ali ye le ko, n na dookuulaa Yaakuba, n na tomboŋ moo Yesuruni,[58] ali kana sila.

³Bankoo meŋ suulata jiyo la, m be jamaa ke la jee le, ŋa jiyo boŋ banku jaaroo kaŋ. M be n na Nooroo dii la ali diŋolu la le, ŋa n na neemoo jindi ali koomalankoolu kaŋ.

⁴Ì be wulikuu la le ko ñaamoo meŋ ye jiyo soto a ñaama, aniŋ komeŋ yirisuŋ biireeriŋolu mennu be looriŋ woyoolu daala.

⁵Moo jamaa le be naa kafu la Yaawe la moolu ma. Doo si a fo ko, ‘Yaawe le taa mu nte ti.’ Doo si a faŋo toolaa ‘Yaakuba’ la. Doo koteŋ fanaa si a tampu a buloo bala ko, ‘Yaawe taa,’ aduŋ a si a too ke ‘Banisirayila’ ti.”

⁶Banisirayila la Mansoo, a Kumakaalaa, Yaawe Alihawaa Maariyo* ko: “Nte le mu foloo ti, aduŋ nte le mu labaŋo ti. Nte koolaa Alla te keriŋ.

⁷Jumaa le be ko nte? A maarii ye a faŋ fo. A ye a yitandi n na, kuwolu mennu keta, kabiriŋ ŋa n na moo foloolu fintindi ñiŋ duniyaa kono, aniŋ kuwolu mennu be naa ke la ñaato.

⁸Ali kijoo kana ali fara, waraŋ ka sila. Fo m maŋ ñiŋ fo ali ye nuŋ kabiriŋ aniŋ saayiŋ? Alitolu le mu n seedoo ti. Fo alla doo le be jee nte koolaa? Hanii, semberaŋ bere doo te jee, nte maŋ hani kiliŋ loŋ.”

⁹Moo-wo-moo ka jalaŋo dadaa, a maŋ ke feŋ ti, i ka feŋolu mennu muta naafuloo ti, maŋ nafaa soto. Moolu mennu ka loo ì ye, mu finkintewolu le ti, ì maŋ feŋ kalamuta, wo le ye a tinna ì be malu la.

¹⁰Toolewo koolaa, jumaa le be a fansuŋ alla dadaa la, jalaŋo meŋ te a maakoyi noo la muumeeke?

¹¹Ate niŋ a ñoŋolu bee be malu la le. Jalaŋ tunkannaalu fanaa maŋ ke feŋ ti fo hadamadiŋolu. Ì bee kafuriŋo be loo la le, ì kijoo ye ì fara, aduŋ ì be tara la dooyaa le kono.

¹²Neefiŋ numoo ka nee kuntoo bula dimbaa kono le, a ye dookuwo ke a la, a ka jalaŋo tembendi niŋ maritoo la, aduŋ a ka a semboo le boyi ka a dadaa kuu. A ka konko le, fo a buka sembe soto. A buka jii miŋ fo a ka lafi ketu la.

¹³Kapintaa ka sumandiroo ke niŋ juloo le la, a ye nuuneeroo ke niŋ nuuneerilaŋo la. A ye a lese niŋ denoo la. A ye a dadaa le ko hadamadiŋ muluŋo, hadamadiŋo la kallankeeyaa* be ñaameŋ, fo a si sabati noo batudulaa to.

¹⁴A ka sedari* yiroolu kuntu le. A ka yiri kendoolu tomboŋ sutoo kono, a ye ì topatoo fo ì ye meŋ, waraŋ a ye junipa yiroo tutu, samaajiyo ye a falindi.

¹⁵Hadamadiŋo ka a ke loo le ti. A ka doo samba le, a ka i jaa a la, a ka dimbaa mala doo la, ka mbuuroo jani. Bari a ka batufeŋo fanaa dadaa a la le, ka a batu, a ka jalaŋo lese, a ka sujudi a ye.

¹⁶A ka a talantee taa le, a ye a mala, a ye a la domoroo tabi a la. A ka a la suboo jani a la, a ye a ñimi fo a konoo ye faa. A ka i jaa le fanaa, a ye a fo ko, “Allaŋ, n kandita le, dimbaa diyaata le.”

¹⁷Too meŋ tuta jee, a ka jalaŋo dadaa a la, a ka sujudi a ye, a ka a batu. A ka duwaa ñini a bulu le, a ka a fo ko, “N tanka, kaatu ite le mu n na alla ti.”

¹⁸Ì maŋ feŋ loŋ, aduŋ ì maŋ feŋ fahaamu. Ì ñaalu be finkiriŋ ne, wo le ye a tinna ì buka feŋ je. Ì sondomoo be sukiriŋ, ì buka fahaamuroo ke.

¹⁹Moo te jee meŋ ye londoo soto, waraŋ ka fahaamuroo ke ka a miira ko, “Ŋa kara kiliŋo ke loo ti, ŋa mbuuroo jani a dimbaa keñemboo la, ŋa suboo fanaa jani ka a ñimi. Fo n si kuu kondiŋo ke noo a too la le baŋ? Fo n si sujudi noo yiri kuntoo ye le baŋ?”

²⁰Toolewo meŋ ka a faŋ neenee ka i baluu seebuutoo le la. A laata feŋ ne la, meŋ te a maakoyi noo la muumeeke. Hani wo, a maŋ a faŋo hakiloo kiitii ka a fo ko, “Fo ñiŋ jalaŋo ŋa meŋ muta m buloo kono, maŋ ke faniyaa le ti baŋ?”

²¹Yaawe ko: “Hee Yaakuba, ali kana ñina ñiŋ kuwolu la, kaatu alitolu mu n na dookuulaalu le ti, Banisirayila. Nte le ye ali daa, ali mu n na dookuulaalu le ti. Hee Banisirayila, n te ñina la ali la.

²²Ŋa ali la kuu jawoolu bondi le komeŋ minaayoo, ali la junuboolu komeŋ soomandaa tuutuwo. Ali muruŋ n kaŋ, kaatu ŋa ali kumakaa le.”

²³Hee saŋ fatoolu, ali suukuwo laa, kaatu Yaawe le ye ñiŋ ke. Hee duniyaa daŋo, sari santo. Alitolu konkoolu ali wutu suukuwo ti, aniŋ alitolu sutoolu niŋ ali la yiroolu bee, kaatu Yaawe ye Yaakuba kumakaa le, a ye a la semboo niŋ waroo yitandi Banisirayila.

²⁴Yaawe ali Kumakaalaa meŋ ye ali daa wuluuñaŋo kono ko: “Nte le mu Yaawe ti, meŋ ye feŋolu bee daa, nte dammaa le ye saŋ fatoolu waree, aduŋ nte faŋo le ye duniyaa fanundi.

²⁵N ka juubeerilaalu ke moo kuntaŋolu le ti, ŋa ì la taamanseeroolu ke faniyaa ti. N ka moo ñaamendiŋolu la kumoolu faniyandi, ŋa a yitandi ì la ko, ì la ñaameŋo mu kuntaŋyaa le ti.

²⁶N ka n na dookuulaa la kumoo timmandi le, ŋa n na annabiyomoo la bankeeroo ke kuu sotoriŋo ti. Ŋa a fo le ko, moolu be sabati la Yerusalaamu le kotenke, ì ye Yahuuda saatewolu lookuu. Ì la saatewolu be bo la tumbundiŋ ne, ì ye seyi ì ñaama.

²⁷Ŋa a fo le fankaasoo ye jaa, aduŋ m be a baalu jandi la le.

²⁸Ŋa a fo Kirusi[59] ye le ko, ‘I mu n na kantarilaa le ti, aduŋ feŋ-wo-feŋ diyaata n ye i be wo le ke la. I be yaamaroo dii la le, ka Yerusalaamu lookuu, aniŋ ka Alla Batudulaa fondamaŋo dadaa.’ ”