Read Mandinka Yesaya 45 Bible Online

Yesaya 45 - Mandinka bible

Yesaya 45

¹Yaawe* ye ñiŋ ne fo Kirusi ye, a ye a la mansa meŋ tomboŋ ko: “Ŋa i bulubaa buloo muta le, aduŋ m be i maakoyi la le, ka bankoolu noo keloo la, ka mansoolu bondi ì la mansayaa to. M be siloo dii la i la le, i si a je, i te kalee la saatee dundaŋ daalu to.

²M be tambi la i ñaato le, ka konkoolu tembendi, ka jaawali daa tawundaŋolu kati, aniŋ ka nee bantambiloolu katiŋ-katiŋ.

³Naafulu nukundiŋolu aniŋ mennu be maaboriŋ kulloo kono, m be ì dii la i la le, fo i si a loŋ ko, nte le mu Yaawe ti, Banisirayila la Alla, meŋ ye i kumandi i too la.

⁴N na dookuulaa Yaakuba la kuwo kamma la aniŋ n na tomboŋ moolu Banisirayilankoolu, ŋa i kumandi i too la le, ka horomoo dii i la, i maŋ n loŋ ñaa-wo-ñaa.

⁵“Nte le mu Yaawe ti, doo koteŋ te jee, nte koolaa Alla te keriŋ. I maŋ n loŋ ñaa-wo-ñaa, m be i bambandi la le,

⁶i si a je tiloo ka wuli daameŋ, aniŋ a ka boyi daameŋ, moolu si a loŋ ko, doo te jee nte koolaa. Nte le mu Yaawe ti, doo te jee.

⁷Nte le ye maloo naati, ŋa diboo daa, nte le ye kayiroo naati, ŋa maasiiboo saabu. Nte Yaawe le ka ñiŋ kuwolu bee ke.

⁸“Alitolu saŋ fatoolu ali tiliŋo samaamaa jindi naŋ, tawaloo ye a naati tariyaake. Bankoo ye yele fo kiisoo si finti naŋ, tiliŋo ye bula a nooma. Nte Yaawe le ye ì daa.”

⁹Kooroo boyita moo kaŋ ne, meŋ niŋ a Daamansoo ka sonka. A maarii maŋ ke feŋ ti, fo daa telendaŋolu mennu be fayiriŋ bankoo to. Fo boo ka a fo boodaalaa ye le ko, “I ka muŋ ne daa?” waraŋ, “A maŋ dadaa kuu”?

¹⁰Kooroo boyita moo kaŋ ne, meŋ ka a fo a faamaa ye ko, “Muŋ ne ye a tinna i ye n naati ñiŋ duniyaa kono?” waraŋ ka a fo a baamaa ye ko, “Muŋ ne ye a tinna i ye n wuluu?”

¹¹Banisirayila la Senuŋ Baa Yaawe, ì Daamansoo ye ñiŋ ne fo kuwolu to mennu be ke la. A ko, “Fo ali ka n ñininkaa n na dindiŋolu[60] la kuwolu la le, waraŋ ka n yaamari n ñanta n na dookuwo ke la ñaameŋ?

¹²Nte le ye duniyaa daa, ŋa hadamadiŋo naati a kono. M faŋo buloo le ye saŋ fatoolu waree, ŋa malafeŋolu ke ì la palaasoolu to.

¹³M be Kirusi parendi la le ka n na tiliŋo taamandi, ŋa a la siloolu bee tembendi. A be n na moolu bondi la mutoo kono le, a ye n na saatewo Yerusalaamu lookuu, bari a te nafaa soto la a to, waraŋ joo.” Yaawe Alihawaa Maariyo* le ye a fo.

¹⁴Yaawe ko Banisirayilankoolu ye ko: “Misirankoolu la naafuloo aniŋ Kusinkoolu* la marisandiisoo be ke la ali taa le ti. Sebankoolu la wo kee jaŋolu be ke la ali la joŋolu le ti. Ì be tara la bulariŋ ali nooma neejoloolu le daa. Ì be jimi la ali ye le, ì ye a fo ko, ‘Tooñaa-tooñaa, Alla be ali fee le, Alla koteŋ te keriŋ.’ ”

¹⁵Hee Alla Banisirayila Kiisandirilaa, tooñaa, ite mu Alla le ti, meŋ buka a faŋo yitandi.

¹⁶Jalaŋ dadaalaalu bee be tara la maloo niŋ dooyaa le kono.

¹⁷Bari Yaawe le be alitolu Banisirayilankoolu kiisa la, aduŋ ali be tara la tankoo kono le fo abadaa. Ali te maloo waraŋ dooyaa soto la fo abadaa.

¹⁸Yaawe le ye saŋ fatoolu daa. Ate dammaa le mu Alla ti. A ye duniyaa daa, a ye muluŋo ke a la, a ye a londi kuu. A maŋ a tu kenseŋyaariŋ, bari a ye a ke moolu ye sabatidulaa le ti. Ate le ko, “Nte mu Yaawe le ti, aduŋ alla koteŋ te jee.

¹⁹M maŋ diyaamu kulloo kono, waraŋ ka dukuduku diboo kono. M maŋ a fo Yaakuba koomalankoolu ye ko, ‘Ali n ñini kensenke.’ Nte le mu Yaawe ti, n ka tooñaa le fo, aduŋ meŋ tilinta, n ka wo le yitandi.”

²⁰Yaawe ko: “Alitolu keleborilaalu, mennu bota banku doolu to, ali beŋ dulaa kiliŋ ali ye kata naŋ. Mennu ka yiri kuntoolu muta ì la jalaŋolu ti, ì niŋ ì ka tu taa la taariŋ, wolu maŋ feŋ loŋ. Ì ka duwaa ñini batufeŋo le bulu, meŋ te tankandiri ke noo la.

²¹Ali a fo meŋ be ke la, ali ye a yitandi. Ali ye kuwo kacaa ñoo kaŋ. Jumaa le ye ñiŋ fo nuŋ kabiriŋ? Jumaa le ye a fo nuŋ koomanto? Fo nte Yaawe n te baŋ? Alla koteŋ te jee nte koolaa. Alla tilindiŋo niŋ kiisandirilaa doo te jee, nte dammaa le mu.

²²“Alitolu mennu be duniyaa tonkoŋ naanoo to, ali naa muruŋ n kaŋ fo ali si tanka. Kaatu nte le mu Alla ti, aduŋ doo te jee.

²³N kalita m faŋo too le la ko, ŋa feŋ-wo-feŋ fo, tooñaa le mu, aduŋ n na kumoo te faliŋ na. N ko, moolu bee be ñoyi la n ñaatiliŋo la le, ì ye i kali n too la.

²⁴Ì be a fo la m ma le ko, ‘Tiliŋo niŋ semboo be Yaawe dammaa le fee.’ Moolu mennu kamfaata n kamma, ì niŋ maloo le be naa n kaŋ.

²⁵Nte Yaawe le be a saabu la, Banisirayilankoolu ye ke moo tilindiŋolu ti, aduŋ ì be n jayi la le.”