Read Mandinka Yesaya 46 Bible Online

Yesaya 46 - Mandinka bible

Yesaya 46

¹Beli niŋ Nebo, Babiloni jalaŋolu jimita le, ì maluriŋo boyita. Ì tarata laariŋ beeyaŋolu le kaŋ, ka ì samba. A keta ì ye duni baa le ti meŋ ye ì batandi.

²Jalaŋolu jimita le, ì yuukuta ñoo la, ì maŋ ì faŋolu tankandi noo, ì ye ì samba mutoo kono.

³Yaawe* ko: “Yaakuba koomalankoolu ali i lamoyi n na, alitolu moo toomaalu mennu tuta Banisirayila, ŋa n hakilitu ali to le, biriŋ ali be konoo kono, n ka ali topatoo, biriŋ ali wuluuta.

⁴Hani ali kotoota, nte be tara la n ñaama le, ali tiyolu si koyi ñaa-wo-ñaa, m be ali topatoo la le. Nte le ye ali daa, m be ali bambu la le, m be ali maakoyi la le, m be ali tanka la le.

⁵“N niŋ jumaa le mulunta ali fee, waraŋ ka kaañaŋ? Ali si n niŋ wo laa, ali si a fo ko, n niŋ a mulunta le.

⁶“Doolu ka sanoo landatambi bondi ì la kufoolu kono le, ì ka kodiforoo juruma peesarilaŋo kaŋ. Ì ka tunkannaa le luwaasi, ka a tunkaŋ ì ye jalaŋo ti, ì ka sujudi a ye ka a batu.

⁷Ì ka a landi ì dabakunkuŋolu le kaŋ, ì ye a samba a taradulaa to, a ye tara looriŋ jee, a te bo noo la a noo to. Ì si duwaa daani a yaa, bari a buka ì danku, a te ì bondi noo la ì la bataalu kono.

⁸“Alitolu balannaalu, ali si ali hakilitu ñiŋ to, ali kali a miira, a ye tara ali sondomoo kono.

⁹Ali si i miira folooto kuwolu la, aniŋ mennu tambita kabiriŋ. “Nte le mu Alla ti, aduŋ doo te jee. Nte le mu Alla ti, aduŋ n niŋ feŋ ne buka muluŋ.

¹⁰“Kuwolu koolaa be ke la meŋ ti, ŋa a fo ali ye le kabiriŋ. Koomanto ŋa a fo ali ye le, meŋ be naa ke la. N ko, n na feeroolu te tiñaa la, n lafita feŋ-wo-feŋ na, m be wo le ke la.

¹¹Ŋa kewo kumandi le ka bo banku jamfariŋo to, tilibo karoo la, ka n na dookuwo taamandi. A be jii la naŋ ne ko seeliŋo. Ŋa meŋ fo, m be wo le ke la, ŋa meŋ feere, m be wo le taamandi la.

¹²Ali i lamoyi n na, alitolu jusu jaaroolu, tiliŋo be jamfariŋ alitolu mennu la.

¹³M pareeta le ka n na tankoo sutiyandi naŋ, a maŋ jamfa, aduŋ n na kiisoo te mee la a be naa. M be Siyoninkoolu* kiisa la le, ŋa n na kallankeeyaa* dii Banisirayilankoolu la.”