Read Mandinka Yesaya 48 Bible Online

Yesaya 48 - Mandinka bible

Yesaya 48

¹Yaawe* ko: “Hee Yaakuba koomalankoolu, ì ka ali kumandi Banisirayila fanaa la le, ali i lamoyi, m be naa meŋ fo la ali ye. Ali bota Yahuuda lasiloo le kono, ali kalita Yaawe too la le, ali ko, ali ka Banisirayila la Alla le batu, bari ali buka a ke tooñaa niŋ tiliŋo siloo la.

²Ali ko, ali mu saatee senuŋo[62] diŋo le ti, ali jikoo be looriŋ Banisirayila la Alla le kaŋ, meŋ too mu Yaawe Alihawaa Maariyo* ti.

³“Koomanto ŋa a fo ali ye le, meŋ be ke la. Ŋa ñaato kuwolu fo le, aduŋ ŋa moolu kalamutandi ì la le. Kataba kiliŋ, ŋa wo kuwolu taamandi, ì naata ke.

⁴Bayiri ŋa a loŋ ne ko, ali mu moo kuŋ jaariŋ baalu le ti, ali kaŋolu be jaariŋ ko newo, ali kuŋolu be bambandiŋ ko jaawaloo.

⁵Wo le ye a tinna ŋa ñiŋ kuwolu fo ali ye kabiriŋ nuŋ, janniŋ ì ka sii, ŋa ì kankulaa ali ye le, fo ali kana a fo ko, ali la jalaŋolu le ye a ke, ali la babara batufeŋo aniŋ ali la nee jalaŋo le ye ì naati.

⁶Ali ye a moyi le ŋa meŋ fo, aduŋ ali ye a je le, a keta. Fo ali te soŋ na a la baŋ? “Ka bo saayiŋ na, kuu kutoolu mennu be ali ye kumpoo to, m be naa wo le fo la ali ye.

⁷Koomanto ñiŋ kuwolu maŋ tara keriŋ, bari ì be keriŋ ne saayiŋ, janniŋ bii ka sii, ali nene maŋ ñiŋ moyi. Wo to ali te a fo noo la ko, ali ye ñiŋ kuwolu loŋ ne nuŋ.

⁸Kabiriŋ koomanto, ali buka i lamoyi ñiŋ kuwolu la, ka ì fahaamu, sako ka n na kumoo moyi. Ŋa a loŋ ne ko, ali be ke la n ye jamfantuŋolu le ti. Ali muritita m ma le, biriŋ ali wuluuta.

⁹N too la kuwo kamma, ye a tinna le ŋa m faŋ muta, m maŋ n na kamfaa yitandi. N na horomoo kamma, m muñata ali ye le, m maŋ ali kasaara.

¹⁰Ŋa ali seneyandi le, m maŋ a ke ko ì ka kodiforoo seneyandi ñaameŋ, bari ŋa ali kotobo le ka bo niŋ niitooroo la.

¹¹Ŋa a ke n too la kuwo le kamma, n te soŋ na n too ye tiñaa, aduŋ n niŋ doo koteŋ te deŋ na n na kallankeeyaa* la.”

¹²“Hee Yaakuba, i lamoyi n na, ŋa ite Banisirayila meŋ kumandi! Nte le mu Alla ti! Nte le mu foloo ti, aduŋ nte le mu labaŋo ti.

¹³M faŋo le ye duniyaa fondamaŋo laa, m bulubaa buloo ye saŋ fatoolu waree. Niŋ ŋa ì kumandi, ì ka i danku m ma le.

¹⁴“Ali bee ye naa beŋ ñoo kaŋ, ali ye i lamoyi. Batufeŋ jumaa le ye ñiŋ kuwolu yitandi, mennu be naa ke la teŋ? Nte Yaawe ye meŋ kanu, wo le be n na feeroo taamandi la Babiloninkoolu kamma, a buloo be laa la ì kaŋ ne.

¹⁵Nte Yaawe faŋo le diyaamuta, ŋa a kumandi. Ŋa a naati le, aduŋ a be kututeyi la a la dookuwo to le.

¹⁶Ali kata n na naŋ, ali ye i lamoyi ñiŋ na: Kabiriŋ foloodulaa to, m buka n na diyaamoo ke kulloo kono, waatoo meŋ na a be ke la, m be jee le.” Saayiŋ, Maarii Yaawe le ye n niŋ a la Nooroo kii, ka a la kiilaariyaa kankulaa.

¹⁷Ali Kumakaalaa Yaawe, Banisirayila la Senuŋ Baa, a ye ñiŋ ne fo ko: “Nte le mu Yaawe ti, ali la Alla meŋ ye ali karandi ali la nafaa kuwo la, ŋa siloo yitandi ali la le, ali ñanta taa la niŋ meŋ na.

¹⁸Niŋ ali ye ali hakiloo tu nuŋ n na yaamaroolu to, ali la kayiroo be feenee la le ko baajiyo, tiliŋo ye ke ko baa baliŋo.

¹⁹Ali koomalankoolu be siyaa la le ko bankumunkoo, ali diŋolu te yaatee noo la. Ì toolu te buruka la muumeeke, waraŋ ì ye kasaara n ñaatiliŋo la.”

²⁰Ali finti Babiloni, ali ye bori Babiloninkoolu la! Ali seewootoo ye wuuri, ka ñiŋ kankulaa, duniyaa tonkoŋ naanoo bee ñanta a loŋ na le ko, Yaawe ye a la dookuulaa Yaakuba kumakaa le.

²¹Mindoo maŋ ì muta biriŋ a ye ì ñaatonkayaa keñewuloo* kono, a ye jiyo bondi ì ye beroo kono, a ye beroo fara, jiyo bota naŋ a kono.[63]

²²Yaawe ko: “Moo kuruŋolu te kayiroo soto la fereŋ.”