Read Mandinka Yesaya 49 Bible Online

Yesaya 49 - Mandinka bible

Yesaya 49

¹Alitolu baadaa borindoo sabatilaalu, ali i lamoyi n na. Alitolu banku jamfariŋo moolu, ali ali tuloo loo. Janniŋ n ka wuluu, Yaawe* ye n tomboŋ ne, ka ke a la dookuulaa ti. Kabiriŋ m be m baamaa wuluuñaŋo kono, wo to le a ye n toolaa.

²A ye n daa ke le ko hawusari* daa diyaariŋo. A ka a buloo le biti n kaŋ ka n tanka. A ye n ke le ko beñe melundiŋo, a ye m maabo a bularaŋo kono.

³A ko n ye ko, “Banisirayila, ite le mu n na dookuulaa ti, aduŋ i la kuwo le be a tinna la, m be buuñaa soto la.”

⁴Bari n ko, “N na dookuwo maŋ nafaa soto. Ŋa n semboo bee baŋ kensenke le. Bari n na kuwo be Yaawe le bulu, Alla le ye a loŋ, a ñanta n joo la meŋ na.”

⁵Yaawe ye n daa m baamaa wuluuñaŋo kono le, ka n ke a la dookuulaa ti, ka Yaakuba koomalankoolu ñaatonkayaa, fo ì si muru a kaŋ, aniŋ ka Banisirayilankoolu ñaa tilindi a la. Yaawe be m buuñaa la le, aduŋ n na semboo be bo la naŋ Alla le bulu.

⁶Saayiŋ, Yaawe ko n ye le ko, “I mu n na dookuulaa le ti, i be kuu le ke la, meŋ tambita ka Yaakuba lasiloolu seyindi ì ñaama, ka Banisirayila moo toomaalu murundi naŋ. M be i ke la bantala bankoolu* fanaa ye maloo le ti, i ye n na kiisoo samba duniyaa tonkoŋ naanoo bee to.”

⁷Yaawe, Banisirayila la Senuŋ Baa, a Kumakaalaa ka diyaamu moo le ye, bankoolu jututa meŋ na, ì ye a koŋ, a keta maralilaalu la dookuulaa ti, a ye ñiŋ ne fo a ye ko, “Niŋ mansoolu ye i je, ì be wuli la le, maralilaalu fanaa be ñoyi la i ye le, kaatu nte Yaawe le be a saabu la. N ka laahidoolu timmandi le, nte Banisirayila la Senuŋ Baa meŋ ye i tomboŋ.”

⁸Yaawe ye ñiŋ ne fo a la dookuulaa ye ko: “Niŋ n na hiinoo waatoo siita, m be i danku la le. Niŋ kiisoo luŋo siita, m be i maakoyi la le. M be i kanda la, i ye ke n niŋ moolu teema kambeŋo ti, ka banku tumbundiŋo seyindi a ñaama, ka kenoo talaa moolu teema ka ke ì ye keetaafeŋo ti.

⁹I si a fo mutamoolu ye ko, ‘Ali finti naŋ!’ aniŋ moolu mennu be diboo kono ye ko, ‘Ali firinta le!’ “Moolu be daañinoo soto la sila daalu le la, aduŋ ì be domoroo soto la bere konkoolu faŋo kaŋ ne.

¹⁰Ì te konko la, waraŋ mindoo ye ì muta, sako tiloo si i kandi waraŋ keñewuloo* foñoo si ì mantoora. Nte Alla meŋ ka balafaa soto ì ye, be ì ñaatonkayaa la le, ka ì samba woyoolu to.

¹¹M be n na konkoolu bee yelemandi la siloolu le ti, n na sila kendoolu ye tintiŋ.

¹²A juubee, n na moolu be bo la naŋ dulaa jamfariŋolu le to, doolu be bo la naŋ maraa karoo le la, doolu ye bo naŋ tilijii, doolu ye bo fo Asuwani[64] maafaŋo la.”

¹³Saŋ fatoolu, ali sari santo seewoo kamma, bankoo ye kontaani, konkoolu ye wutu suukuwo ti, kaatu Yaawe ye a la moolu jusoo ñabu le, aduŋ a be balafaa soto la a la moo bataariŋolu ye le.

¹⁴Bari Siyoni* ko le ko, “Yaawe ye i bo n to le, m Maariyo ñinata n na le.”

¹⁵Yaawe ye a jaabi ko: “Fo musoo ka ñina a la suusuu diŋo la le baŋ, waraŋ a te balafaa soto la a wuluudiŋo ye? A si ke noo a ye ñina, bari Siyoni, nte te ñina la i la.

¹⁶A juubee, ŋa i muluŋo ñenje m buluteetee bala le, n hakiloo be tu la i la sansaŋ tumbundiŋolu kaŋ ne waati-wo-waati.

¹⁷I diŋolu be hawujiriŋ ne ka muruŋ naŋ, aduŋ mennu ye i la saatewo kasaara, be taa la le.

¹⁸I dandaŋolu juubee, i ye a je, meŋ be ke kaŋ. I diŋolu bee benta le ka seyi i yaa.” Yaawe kalita ñiŋ ne la ko: “A be koyiriŋ ñaameŋ ko nte be baluuriŋ ne, i be kibiri la i diŋolu la kuwo la le, ko maañoo ka kibiri a la ñaroolu la ñaameŋ.

¹⁹“Ì ye i tiñaa, aniŋ ka i la saatewo kasaara ñaa-wo-ñaa, ka i la bankoo kenseŋyandi, bari saayiŋ, bankoo be dooyaabaa la i la moolu ye le, mennu naata, aduŋ mennu ye i kasaara be jamfa la i la le.

²⁰Dindiŋolu[65] mennu wuluuta i la niikuyaa waatoo, be a fo la i ye le ko, ‘Ñiŋ dulaa dooyaabaata ntolu ye le, dulaa fanuŋo dii ǹ na, ŋà sabati jee.’

²¹Wo to i be a fo la i sondomoo kono le ko, ‘Jumaa le duŋ ye ñiŋ dindiŋolu bee wuluu n ye? N niyo kuyaata le, kaatu m foota n diŋolu la le, n tarata nuŋ mutoo kono le, ì ye m fili jee. Jumaa le duŋ ye ñiŋ dindiŋolu kuluu? N dammaa le tuta m faŋ ye, saayiŋ duŋ, ñinnu bota mintoo le?’ ”

²²Maarii Yaawe ye ñiŋ ne fo ko: “Saayiŋ, m be taamanseeroo ke la bantala bankoolu ye le. M be n na bandeeroo wulindi la le, moolu ye a je. Ì be i dinkewolu sika la le, ì ye i dimmusoolu laa ì dabakunkuŋolu kaŋ, ì ye ì naati i ye.

²³Mansoolu le be ke la i diŋolu la kuluuribaalu ti, ì la mansamusoolu ye ke i diŋolu ye bambaanoolu ti. Ì be ñoyi la i ñaatiliŋo la le, ì kuŋolu ye tara jimiriŋ duuma, ì ye kankaŋo newuŋ i siŋolu bala. Wo to le i be a loŋ na ko, nte le mu Yaawe ti, moolu mennu ye ì jikoo loo n kaŋ, te jikilateyi la.”

²⁴Fo moo si buusi feŋo taa noo kelejawaroo bulu baŋ, waraŋ mutamoolu ye kana noo maralilaa saŋarariŋo la?

²⁵Bari Yaawe ye ñiŋ ne fo ko: “Tooñaa, mutamoolu si buusi noo kelejawaroolu bulu le, buusi feŋo ye seyi ka bo maralilaa saŋarariŋo bulu. Niŋ moolu wulita ka i kele, m fanaa be ì kele la le, aduŋ m be i diŋolu tanka la le.

²⁶M be a ke la le, i toorandilaalu ye ñoo faa. Ì faŋolu yeloo le be ì siirandi la ko doloo. Wo to hadamadiŋolu bee be a loŋ na le ko, nte Yaawe le mu i Kiisandirilaa ti, i Kumakaalaa, Yaakuba la Alla Tallaa.”