Read Mandinka Yesaya 51 Bible Online

Yesaya 51 - Mandinka bible

Yesaya 51

¹Yaawe* ko: “Ali i lamoyi n na, alitolu mennu ka bula sila tilindiŋo nooma aniŋ ka nte Yaawe ñini. Ali ali faamaa Iburayima la kuwo juubee, ate le mu beroo ti, ali farasita meŋ bala, aniŋ Saara meŋ ye ali wuluu, ate le mu beroo ti, ì ye ali bondi naŋ daameŋ. Biriŋ ŋa Iburayima kumandi, a maŋ diŋ soto, n naata neema a ma le, ŋa a koomalankoolu siyandi.”

³Tooñaa-tooñaa, Yaawe be Siyoninkoolu* sabarindi la le, aduŋ a be balafaa soto la ì ye le, ì la saatewo tumbunta ñaameŋ. A be ì la wuloo ke la le ko Edeni naakoo, ì la keñewuloo* ye ke ko Yaawe la naakoo. Ì be seewoo niŋ kontaanoo soto la jee le, ì ye Alla tentu niŋ suukuulaa la.

⁴Yaawe ko: “N na moolu, ali i lamoyi n na. N na bankoo moolu, ali ali tuloo loo n na. Karandiroo be bo la nte le bulu, aduŋ n na kiitiiteyoo be ke la bankoolu ye mala baa le ti.

⁵N na tiliŋo ka sutiyaa naŋ tariyaarinke le, n na kiisoo be siloo kaŋ naŋ ne, aduŋ n semboo le be kiitiiteyoo naati la bankoolu kaŋ. Banku jamfariŋolu be n lamoyi la le, ì ye ì jikoo loo n semboo kaŋ ka ì maakoyi.

⁶Ali saŋ fatoolu koroosi, ali ye bankoo juubee, saŋ fatoolu be yeemaŋ na le ko siisiyo, bankoo ye naa tiñaa ko funtoo, a moolu ye faa ko siyolu. Bari n na kiisoo be tu la le fo abadaa, aduŋ n na tiliŋo te boyi la muumeeke.

⁷“Ali i lamoyi n na, alitolu mennu ye kuu tilindiŋo loŋ, n na luwaalu be alitolu mennu sondomoo kono, ali kana sila moolu la malundiroo la, waraŋ ka sila ì la nendiroolu la.

⁸Kaatu tumboo le be ì tiñaa la ko duŋ feŋo, baabaa ye ì tiñaa ko bayoo. Bari n na tiliŋo be tu la le fo abadaa, n na kiisoo ye tara jamaanoolu muumee bee ye.”

⁹Wuli, wuli Yaawe, i ye i semboo taa! Wuli, ko i ye a ke nuŋ ñaameŋ folooto. Fo ite le maŋ wo daafeŋ saŋarariŋ baa Rahabu[68] faa baŋ? Ite le ye a soo fo i ye a faa, i ye a kuntuŋ-kuntuŋ.

¹⁰Ite le ye fankaasoo jandi, baa diinoŋo bee jaata, i ye taamadulaa ke baa kono duuma, fo moolu mennu kumakaata si tambi noo.

¹¹Yaawe ye moolu mennu kumakaa, be muruŋ na le. Ì niŋ suukuwo le be duŋ na Siyoni*. Ì be tara la seewoo bambaloo le kono. Niikuyaa niŋ woosiyo be jamfa la ì la le, kontaanoo niŋ seewoo ye ì futufaa.

¹²Yaawe ko: “Nte, nte faŋo le ka ali sabarindi. Wo to muŋ ne ye a tinna, ali ka sila hadamadiŋo la, saayaa be meŋ kunna, hadamadiŋo meŋ maŋ ke feŋ ti fo ñaamoo?

¹³Fo ali ñinata nte Yaawe ali Daamansoo la le baŋ? Nte le ye saŋ fatoolu waree, ŋa bankoo fondamaŋo laa. Muŋ ne ye a tinna, ali ka tara silaŋ baa kono luŋ-wo-luŋ, ali toorandilaa la kamfaa kamma, meŋ be lafiriŋ ka ali kasaara? Ali toorandilaa la kamfaa maŋ ke tuus ti.

¹⁴“A te mee la, mutamoolu be firiŋ na, ì te faa la mutoo kono, ì be baluu la le, domoroo te ì dasa la.

¹⁵Kaatu nte le mu Yaawe ali la Alla ti, meŋ ka baajiyo maamandi, fo baa baliŋolu si bumbuŋ. Yaawe Alihawaa Maariyo* le mu n too ti.

¹⁶Nte le ŋa n na kumoo duŋ ali daa, ŋa m buloo biti ali kaŋ ka ali tanka. Nte le ye saŋ fatoolu ke ì dulaa to, ŋa bankoo fondamaŋo laa, n ko Siyoninkoolu ye ko, ‘Alitolu le mu n na moolu ti.’ ”

¹⁷Wuli! Wuli! Hee Yerusalaamu, i ñaa yele! I ye i miŋ Yaawe la kamfaa mindaŋo le la, i ye mindaŋ faa bee miŋ ne, fo i ka timili-tamali.

¹⁸Yerusalaamu,[69] i ye diŋolu mennu bee wuluu, moo te ì kono, meŋ si i kanta noo. Moo te jee dindiŋolu bee kono, i ye mennu kuluu, meŋ si i buloo muta noo ka i maakoyi.

¹⁹Ñiŋ maasiiboo fula-fula boyita i kaŋ ne, kooroo niŋ kasaaroo, konkoo niŋ hawusaroo*, Jumaa le be balafaa soto la i ye? Jumaa le be i sabarindi la?

²⁰I diŋolu ketuta le, ì be laariŋ mbeedi kuŋolu to ko minaŋo meŋ be jaloo daa. Yaawe la kamfaa ye ì futufaa le, i la Alla la jalayiroo.

²¹Wo to ite Yerusalaamu toorariŋo, ite meŋ siirata, doloo maŋ a saabu, i lamoyi ñiŋ na.

²²I Maarii Yaawe, i la Alla meŋ ka loo a la moolu ye, a ye ñiŋ ne fo ko: “A juubee, wo mindaŋo meŋ ka i timili-tamalindi, ŋa a taa i bulu le, wo kamfaa mindammaa meŋ, i ka i miŋ a la, i te i miŋ na a la kotenke.

²³M be a dii la i toorandilaalu le la, mennu ka a fo i ye nuŋ ko, ‘Boyi duuma fo ǹ si taama i kaŋ.’ I ye i laa ì ye bankoo to le, i mulunta ì ye ko mbeedoo, ì ka tara taama la i kaŋ.”