Read Mandinka Yesaya 52 Bible Online

Yesaya 52 - Mandinka bible

Yesaya 52

¹Wuli, wuli! Hee Siyoni*, i ye i semboo taa! Yerusalaamu saatee senuŋo, i la dendika kendoo duŋ. Sunnabaloolu aniŋ moo kosoriŋolu te duŋ na i kono kotenke.

²Wuli Yerusalaamu, i ye buutoo konkoŋ i bala, i ye sii mansasiiraŋo kaŋ. Dimmusuriŋ* Siyoni, meŋ be mutoo kono, neejoloolu mennu be i kaŋo la, ì bondi.

³Kaatu Yaawe* ye ñiŋ ne fo ko: “Ali waafita le, feŋ maŋ joo ali kunna, aduŋ ali be kumakaa la le, kodi te bo la.”

⁴Maarii Yaawe ye ñiŋ ne fo ko: “Foloodulaa to, n na moolu taata Misira le, ì sabatita jee ko tumarankewolu. Ñaato Asiriyankoolu fanaa naata ka ì mantoora, daliila te a la.”

⁵Yaawe ko: “Wo to saayiŋ, nte ka muŋ ne ke jaŋ? Banku doo[70] le ye n na moolu samba, daliila te a la. Ì la maralilaalu niŋ kibiroo be wuuri kaŋ ne. Tiloo muumee moolu ka tu tooñeeri kumoolu le fo la n too kunto.

⁶Wo to saayiŋ n na moolu be n too loŋ na le. Niŋ ì kanata luŋo meŋ na, ì be a loŋ na le ko, nte le ye a fo nuŋ. M be jaŋ ne!”

⁷Ñiŋ mu seewoo kuwo le ti, ka kiilaa je, a ye bo naŋ konkoo kaŋ aniŋ kibaari betoo. A ka kayiroo le kankulaa, ka kiisoo bankee moolu ye, a ka a fo Siyoni ye le ko, “Ali la Alla le mu mansoo ti!”

⁸Ali i lamoyi! Fo ali maŋ ali la kantarilaalu kaŋo moyi baŋ? Ì ye ì kaŋo sikandi santo le, ì ye suukuwo laa ñoo la seewoo kono, ì be a je la ì faŋo ñaakesoo le la, Yaawe be muruŋ kaŋ Siyoni.

⁹Yerusalaamu tumbuŋolu, ali wutu ñoo la ka seewootoo suukuwo laa, kaatu Yaawe ye a la moolu sabarindi le, a ye Yerusalaamu kumakaa.

¹⁰Yaawe be a semboo yitandi la bankoolu bee la le, aduŋ duniyaa moolu bee be ǹ na Alla la kiisoo je la le.

¹¹Ali taa, ali taa, ali bo Babiloni! Feŋolu mennu maŋ janku, ali kana ì maa. Ali jamfa jee la, ali ye seneyaa, alitolu mennu ka Yaawe la batudulaa jooraŋolu samba.

¹²Bari ali te jee bula la korontoo kono, waraŋ ka bori, kaatu Yaawe Banisirayila la Alla le be ali ñaatonkayaa la, aniŋ ka tara ali kooma.

¹³Yaawe ko: “A juubee, n na dookuulaa la kuwo be yiriwaa la le, a be sikandi la le, a ye tara santo-santo.

¹⁴Moo jamaa jaakalita le, biriŋ ì ye a je, baramoolu ye a muluŋo yelemandi, fo moo buka a suutee ko hadamadiŋo le mu, a niŋ hadamadiŋ maŋ muluŋ.

¹⁵Bari a be banku jamaa seneyandi la le, fo ì si m batu noo. Ate le be a tinna la, mansoolu jaakalitoo ye i deyi. Ì nene maŋ kuwo meŋ loŋ, ì be wo le je la, ì nene maŋ meŋ moyi, ì be wo le fahaamu la.”