Read Mandinka Yesaya 56 Bible Online

Yesaya 56 - Mandinka bible

Yesaya 56

¹Yaawe* ye ñiŋ ne fo ko: “Ali si moolu bee la hakoo dii ì la, ali ye taama tiliŋo la, kaatu n na kiisoo sutiyaata naŋ ne, aduŋ a te mee la, m be n na tiliŋo lankenema la.

²Seewoo be moo ye, meŋ ye ñiŋ ke, a ye a muta bambandinke, ka Loobula Luŋo horoma, a buka a dooyandi, aduŋ a ka tu jamfa la kuu jawu kewo la.”

³Hani luntaŋo meŋ ye a faŋo kafundi Yaawe la moolu ma, a kana a fo ko, “Yaawe te soŋ na, ŋa tara a la moolu kono.” Seenewo kana woosii, ka a fo ko, “Nte mu yiri jaaroo doroŋ ne ti.”

⁴Kaatu Yaawe ye ñiŋ ne fo ko: “M be seenewolu le la, mennu ka n na Loobula Luŋolu horoma, ka kuwolu baara, n lafita mennu la aniŋ ka n na kambeŋo muta bambandinke.

⁵M be hakilibulandiraŋo niŋ too le dii la ì la, mennu be tara la n na Batudulaa Buŋo* kono, ì ye fisiyaa ì ye dinkewolu niŋ dimmusoolu ti. M be too le dii la ì la, meŋ te buruka la, a be tu la le fo abadaa.

⁶Luntaŋolu mennu ye ì faŋo kafundi n na moolu ma, ka dookuwo ke n ye, ka n too kanu, ka m batu, aniŋ mennu ka Loobula Luŋo horoma, ì buka a dooyandi, ì ka n na kambeŋo muta bambandinke,

⁷m be ñinnu le samba la n na konko senuŋo* to, ì ye tara seewooriŋ n na duwaa buŋo kono. M be soŋ na le ì la jani sadaalu* niŋ ì la beeyaŋ sadaalu ye laa n na sadaajanidulaa* kaŋ. Kaatu ì be n na buŋo kumandi la duwaa buŋo le la, bankoolu bee ye.”

⁸Maarii Yaawe ye Banisirayilankoolu mennu be janjandiŋ kafu ñoo kaŋ ne, a ye ñiŋ ne bankee ko: “Hani saayiŋ, m be doolu kafu la ì kaŋ ne, wolu niŋ ŋa mennu kafu ñoo kaŋ, te kiliŋ na.”

⁹Alitolu wulakono daafeŋolu, alitolu daafeŋ saŋarariŋolu, ali bee ye naa domoroo la!

¹⁰Banisirayila la ñaatonkoolu finkita le, ì bee maŋ londi soto, ì keta wulu mumunewolu ti, ì buka hawuroo ke noo. Ì ka tu laariŋ ne doroŋ aniŋ ka siiboo, siinoo diyaata ì ye le.

¹¹Ì mu wulu domorilaa baalu le ti, ì konoo buka faa. Itolu mu kantarilaalu le ti, mennu maŋ fahaamuroo soto, ì bee ka taa ì fansuŋ siloolu le la, ì ka a ke fankuŋ-fankuŋ ne ti.

¹²Ì ko ñoo ye ko, “Ali naa, doloo fele! Ali ŋà a miŋ fo a ye ǹ sii. Saama be ke la le ko bii, waraŋ a ye tambi bii la.”