Read Mandinka Yesaya 57 Bible Online

Yesaya 57 - Mandinka bible

Yesaya 57

¹Moo tilindiŋolu ka kasaara le, bari moo buka a hakilitu ì to, ì ka lannamoolu samba le, moo buka a fahaamu. Bari niŋ ì faata, ì be tanka la maasiiboo ma le,

²ì ye duŋ kayiroo kono. Mennu ka taama tiliŋo kono, niŋ ì faata, a ka ke ì la dahaa le ti.

³Yaawe* ko: “Alitolu junubekelaalu, ali naa jaŋ, alitolu batuutaa diŋolu, alitolu mennu bota jeenelaalu bala, aniŋ cakoolu.[72]

⁴Fo ali ka nte le ñaawali baŋ, ka ali ñaa yelemandi, ka ali neŋolu bondi banta? Balannaalu niŋ faniyaa folaalu le ye ali wuluu.

⁵Ali ka tara jarabiriŋ jalaŋolu le nooma, yiri baalu niŋ yiri biireeriŋolu koto. Ali ka ali diŋolu kanateyi le ka ke sadaalu* ti, wulumbaŋolu niŋ berehuwolu kono.

⁶Jalaŋolu mennu be wulumbaŋo kono, bere deerariŋolu be daameŋ, itolu le kummaayaata ali fee, nte wo nte. Ali ka miŋ feŋ sadaalu boŋ ì ye le, aniŋ siimaŋ sadaalu. Ñiŋ kuwolu bee jeriŋ koolaa, fo n si sabari noo baŋ?

⁷Banisirayila, ite cakoo! I ye i la laaraŋo loo konko jaŋ baa le kaŋ. I taata jee le ka i la beeyaŋ sadaalu bondi.

⁸Bundaalu kara la aniŋ daa yiroolu kooma la, i ye i la jalaŋ muluŋolu ke wolu le bala. I ye i koo dii n na le, i ye i la laaraŋo feenee, ka sele a kaŋ, i ye i feetee jee. I ka moolu le joo, i ye mennu laañooyaa kanu, i ñaa ka tara ì kenseŋo la.

⁹I ye tuloo maa aniŋ ka karabaanijiyo junjuŋ i bala ka taa Moleki jalaŋo batu. I ka kiilaalu kii le fo dulaa jaŋ. I ka ì kii le hani fo fureeduu.

¹⁰I ye i faŋo batandi ñiŋ maañaalu le la, bari i maŋ a kalamuta ko, a maŋ nafaa soto. I naata i faŋo wakiilindi ka a ke.

¹¹“I silata jumaa le la, fo i ka faniyaa fo n ye? I ñinata n na le, i hakiloo faŋo maŋ m maa. M meeta deyiriŋ baake le, fo wo le ye a tinna i maŋ sila n na baŋ?

¹²Saayiŋ m be i la baaroolu waañaari la le, i ye mennu miira ko kuu tilindiŋolu le mu. Hani kiliŋ te tara la ñinnu kono meŋ si i nafaa.

¹³Niŋ i woosiita maakoyiroo la, i la jalaŋ jurumoolu si i tanka. Foñoo le be ì bee samba la, niijii kenseŋo ye ì tindi ka taa. Bari moo meŋ be tuukuriŋ nte la, wo le be bankoo keetaa la, n na konko senuŋo* ye ke a taa ti.”

¹⁴Yaawe ko: “Ali siloo dadaa, ali siloo dadaa! Ali siloo parendi, ali feŋ ñankariŋolu bondi n na moolu ye jee.”

¹⁵Mansa meŋ be santo-santo, a be kallankeeyaariŋ* ne, a be baluuriŋ fo abadaa, aduŋ a too kuliyaata, a ye ñiŋ ne fo ko: “M be sabatiriŋ dulaa sikandiriŋo le to aniŋ dulaa senuŋo. Bari fanaa m be sabatiriŋ moo jikilateyiriŋolu aniŋ fammajiilaalu le fee, fo n si fammajiilaalu niyo kutayandi, aniŋ ka jikilateyiriŋolu sondomoo bambandi.

¹⁶Wo to, n te tu la moo tuumi la fo abadaa, sako ka tu kamfaa la. Niŋ wo nte, hadamadiŋo te semboo soto la kotenke ka baluu, m faŋo ye moolu mennu daa, ì si faa.

¹⁷Ì la hadume maañaa le ye a tinna n kamfaata. Ŋa ì mantoora, ŋa n koo dii ì la kamfaa kono, hani wo, ì tuta ì fansuŋ siloo doroŋ ne nooma la.

¹⁸Ŋa itolu taaraŋ siloo loŋ ne, bari m be ì jaara la le. M be ì kanda la le, ŋa sabari jusoo dii ì la, fo ì sunuriŋolu si a dati ka jayiri suukuwo laa n ye.”

¹⁹Yaawe ko: “Kayiroo jamaa baa ye tara dulaa jaŋ moolu ye, aniŋ dulaa sutuŋ moolu, m be ì jaara la le.”

²⁰Bari moo kuruŋolu ka munta le ko baajiyo meŋ ka tu maamaŋ na, a buka tenkuŋ noo, a baa baliŋo ka noo niŋ potoo doroŋ ne fintindi.

²¹N na Alla ko: “Moo kuruŋolu te kayiroo soto la muumeeke.”