Read Mandinka Yesaya 63 Bible Online

Yesaya 63 - Mandinka bible

Yesaya 63

¹Jumaa le mu ñiŋ ti, meŋ ka bo naŋ Bosira saatewo to Edomu bankoo kaŋ, a la dendikoo bee be tompiŋ-tompindiŋ niŋ feŋ wuleŋo la? Jumaa le mu ñiŋ ti, meŋ ye mansa dendikoo duŋ, a ka taama naŋ niŋ a semboo la? Yaawe* ko: “Nte le mu, n ka diyaamu niŋ tiliŋo siloo le la. Ŋa semboo soto le ka kiisandiroo ke.”

²Muŋ ne ye a tinna i la dendikoo wuleeta, ko moolu mennu ka wayini* yiridiŋo biti?

³“N na kamfaa kono, ŋa n jawoolu dori le, komeŋ ì ka wayini yiridiŋolu dori ì bitidulaa ñaameŋ. Nte dammaa le ye wo dookuwo ke, moo maŋ bo banku to meŋ si m maakoyi. Ŋa n tuu n jawoolu kaŋ ne, n na jusuboo waatoo kono. Ì yele noo le be n na dendikoo bala.

⁴Kaatu ŋa ñiŋ soto n sondomoo kono le ko, luŋo meŋ na m be juloo joo la n jawoolu to, siita le, aniŋ m be kumakaaroo ke la saŋo meŋ na.

⁵Ŋa juubeeroo ke le, bari m maŋ moo je meŋ si m maakoyi. N jaakalita le ka a je ko moo maŋ m maakoyi, m faŋo semboo le ye nooroo saabu m ma, n na kamfaa ye m bambandi.

⁶N na jusuboo kono, ŋa n tuu bankoolu kaŋ. N na kamfaa ye a ke le, fo ì ka timili-tamali, ŋa ì yeloo boŋ bankoo to.”

⁷Yaawe ye kanu bambaloo meŋ yitandi, m be a kankulaa la le, aniŋ ŋa a jayi kuwolu to, a ye mennu bee ke. M be Yaawe jayi la le, a ye kuu kende jamaalu mennu dii ǹ na, aniŋ a ye beteyaa meŋ yitandi ntolu Banisirayilankoolu la, kaatu a ye balafaa le soto ǹ ye, aduŋ a ye ǹ kanu le fo a maŋ dandulaa soto.

⁸A ko: “Tooñaa-tooñaa, n na moolu le mu, m faŋo diŋolu, mennu te n neenee la.” Bituŋ a keta ì la kiisandirilaa ti.

⁹Niŋ ì ye niitoora-wo-niitoora soto, a fanaa niyo ka kuyaa le. A maŋ ke malaayikoo ti meŋ ye ì tanka, bari a la taroo ì fee. A ye ì kumakaa a la balafaa niŋ a la kanoo le kaŋ, a ye ì sika le ka ì bambu kabiriŋ waati jaŋ koomanto.

¹⁰Hani wo ì balanta le, a la Noora Kuliŋo naata sunu ì la kuwo la. Wo to le Alla fanaa yelemata, a naata ke ì jawoo ti, a faŋo ye ì kele.

¹¹Bituŋ a la moolu hakiloo bulata folooto kuwolu la, Musa niŋ a la moolu la waatoo. Ì ko, “Yaawe lee, ate meŋ ye ì teyindi baa la, ì niŋ ì la ñaatonkoolu? Meŋ ye Noora Kuliŋo jindi ì kaŋ, a lee?”

¹²A la sembe baa le tarata Musa bulubaa karoo la. A ye jiyo talaa fula ti ì ñaato, ka a too darajandi fo abadaa.

¹³A ye moolu ñaatonkayaa le ka baa diinoŋo teyi. Hani moo kiliŋ ne maŋ taki, ì taatoo. Ì mulunta le ko niŋ suwoo be boroo la kene kenseŋo kono.

¹⁴Ko ninsi koorewo ka jii wulumbaŋo kono ñaameŋ, Yaawe la Nooroo ye dahaa dii ì la wo le ñaama. Yaawe, i ye i la moolu ñaatonkayaa le, fo i si too diyaa soto.

¹⁵Yaawe, juubeeroo ke ka bo naŋ santo, i ye jeroo ke, ka bo i sabatidulaa senuŋo niŋ i la dulaa kallankeeyaariŋo* to. I la hame kuwo niŋ i semboo lee? I ye konotodiyaa niŋ balafaa meŋ soto ǹ ye, i ye ì jamfandi ǹ na le.

¹⁶Bari ite le mu m̀ Faamaa ti. M̀ mumuñolu Iburayima niŋ Isirayila maŋ ǹ loŋ, ì maŋ ǹ na kuwo loŋ. Hee Yaawe, ite le mu m̀ Faamaa ti, ǹ Kumakaalaa, biriŋ koomanto, wo le mu i too ti.

¹⁷Hee Yaawe, muŋ ne ye a tinna i sonta m̀ filita i la siloo ma, i ye ǹ jusoolu jandi, fo m̀ maŋ sila i la? Muruŋ ǹ kaŋ, i ye a ke i la dookuulaalu la kuwo kamma la, ñiŋ lasiloolu mennu mu i taa ti.

¹⁸I la Dulaa Senuŋo tarata marariŋ i la moolu le bulu fo waatindiŋ, bari saayiŋ ǹ jawoolu ye i tuu a kaŋ ne.

¹⁹M̀ mulunta le ko, i nene maŋ moolu mennu mara, aniŋ ì buka moolu mennu kumandi i too la.