Read Mandinka Yesaya 64 Bible Online

Yesaya 64 - Mandinka bible

Yesaya 64

¹Kooni, niŋ i si saŋ fatoolu le fara nuŋ, i ye jii naŋ, konkoolu ye jarajara i ñaatiliŋo la!

²Ko dimbaa ka loo mala ñaameŋ, aniŋ ka jiyo fajindi taa to, i la naa be bankoolu jarajarandi la niŋ silaŋo la wo le ñaama. Wo to i jawoolu be i too la waroo loŋ na le.

³I ye kaawakuwolu le ke, m̀ maŋ n yillaa mennu la, i jiita naŋ, konkoolu jiijaata i ñaatiliŋo la.

⁴Kabiriŋ koomanto nuŋ, moo nene maŋ a moyi, sako ka i hakilitu a to, moo ñaa nene maŋ Alla je meŋ be ko ite, meŋ ka loo moolu ye, mennu ka a batu.

⁵I ka moolu le maakoyi, kuu tilindiŋ kewo ka mennu kontaani, mennu hakiloo ka tu i la siloo kaŋ. Bari i kamfaata ǹ kamma le, kaatu ntolu keta junubekelaalu le ti fo waati jaŋ na. Wo to saayiŋ ǹ si tanka noo ñaadii le?

⁶Ntolu bee keta moo seneyaabaloolu le ti. Ǹ na baara kendoolu ka muluŋ ne ko funtu nooriŋolu. Ǹ na junuboolu le ye a tinna m̀ munta ko jamba nororiŋolu, foñoo ka mennu tindi.

⁷Moo buka i too kumandi waraŋ ka a fo i ye a maakoyi, kaatu i ye i koo dii ǹ na le. I ye m̀ bula fo ǹ na junuboolu ye ǹ kasaara.

⁸Bari Yaawe*, ite le mu m̀ Faamaa ti. Ǹ ka munta le ko potoo, aduŋ ite le mu boodaalaa ti, i buloolu le ye ntolu bee daa.

⁹Hee Yaawe, kana kamfaa fo a ye landatambi, ka ǹ na junuboolu tu i kono fo abadaa! Ŋà i daani, ǹ na kuwo hakilitu, kaatu ntolu bee mu i la moolu le ti.

¹⁰I la saatee senuŋolu keta keñewuloo* ti, hani Siyoni* faŋo keta keñewuloo le ti, Yerusalaamu mu tumbuŋo ti.

¹¹Ǹ na Batudulaa Senuŋ* ñiimaa, ǹ na alifaa foloolu ka i jayi daameŋ, dimbaa ye a bee jani le, ǹ na dulaa ñiimaalu bee kasaarata.

¹²Hee Yaawe, ñiŋ bee koolaa, fo i be i faŋ muta la le baŋ? Fo i be tu la deyiriŋ ne, i ye m̀ mantoora fo a ye landatambi?