Read Mandinka Yesaya 65 Bible Online

Yesaya 65 - Mandinka bible

Yesaya 65

¹Yaawe* ko: “Ŋa m faŋo yitandi moolu la le, mennu buka n na kuu ñininkaa, aniŋ moolu mennu buka n ñini, fo ì si n je. N ko bankoo meŋ buka n too kumandi ye ko, ‘M fele jaŋ! M fele jaŋ!’

²Tiloo muumee n ka m buloo tiliŋ m faŋo la moolu ye le, mennu ka balaŋ m ma, ì maŋ tara sila kendoo kaŋ, ì ka tara bulariŋ ì fansuŋ miiroolu nooma.

³Moolu le mu, mennu ka tu la n hadaañi la, m faŋo ñaa la, ka sadaalu* bondi naakoolu kono, aniŋ ka cuuraayoo siisindi birikoolu kaŋ.[73]

⁴Ì ka tara siiriŋ kaburoolu le to, ì ye suutoo laa dulaa denderiŋolu to. Ì ka seewu suboo domo le, aduŋ daa jiyo meŋ be ì la kaleeroo kono, bota daafeŋ kondiŋolu suboo le bala.

⁵Ì ka a fo le ko, ‘Jamfa n na, kana sutiyaa n na. N seneyaabaata wo ye le, ite ye sutiyaa n na.’ Ñiŋ moolu ka muluŋ ne ko, niŋ siisiyo be n nuŋ huwo kono, tiloo muumee ì la kuwo ka tara m bala le ko dimbaa.”

⁶Yaawe ko: “A juubee, a be safeeriŋ n ñaatiliŋo la le. N te n deyi la, bari m be n joo la le. M be n joo la a ñaama le,

⁷ali niŋ ali la alifaa foloolu bee la junuboo la. Ì jututa n na le ka cuuraayoo siisindi jalaŋolu ye konkoolu kaŋ. Ì ye ì la junube kuwolu mennu ke n na, m be jaraboo jindi la ì kaŋ a ñaama le.”

⁸Yaawe ye ñiŋ ne fo ko: “Ko jiyo doo ka tu wayini* diŋ ñatoo kono ñaameŋ, bituŋ moo doo ko, ‘Kana a fayi, kaatu kendemaa doo be jee le!’ m be wo le ke la, n na dookuulaalu tooyaa kamma la. N te ì bee kasaara la.

⁹M be koomalankoolu bondi la Yaakuba lasiloo kono le, Yahuuda koomalankoolu le be n na konkobankoo[74] keetaa la. N na tomboŋ moolu le be a keetaa la, aduŋ n na dookuulaalu le be sabati la jee.

¹⁰Saroni tundoo be ke la beeyaŋolu ye daañini dulaa le ti. Akori Wulumbaŋo ye ke ninsi koorewolu la dahaa dulaa ti. Ì be ke la n na moolu le taa ti, mennu ka n ñini.

¹¹“Bari alitolu mennu ye ali koo dii nte Yaawe la, ali ñinata n na konko senuŋo* la, ali ka domori feŋ sadaa naati Kadu jalaŋo ye, miŋ feŋ diimaa, Meni jalaŋo ye,[75]

¹²nte le be a lañini la, hawusaroo* ye ali faa. Ali be ñoyi la le, ì ye ali kanateyi, bayiri ŋa ali kumandi le, ali maŋ n danku, n diyaamuta ali ye, ali maŋ i lamoyi n na. Ali ye kuu jawoo ke n ñaatiliŋo la le, aniŋ ka bula kuwo nooma, m maŋ lafi meŋ na.”

¹³Saayiŋ Maarii Yaawe ye ñiŋ ne fo ko: “N na dookuulaalu be domoroo ke la le, bari alitolu be konko la le. N na dookuulaalu be i miŋ na le, bari mindoo be alitolu muta la le. N na dookuulaalu be seewoo la le, bari alitolu be duŋ na maloo le kono.

¹⁴N na dookuulaalu nii seewooriŋo le be suukuwo laa la, bari alitolu nii toorariŋo le be woosii la, jikilateyoo ye a tinna ali ka tu kumboo la.

¹⁵N na tomboŋ moolu be alitolu too muta la dankoo le ti, kaatu nte ali Maarii Yaawe le be ali faa la. Bari m be too doo le dii la moolu la mennu ye n horoma.

¹⁶Moo-wo-moo be neemoo daani la bankoo kaŋ, a be a daani la Alla tooñaa le bulu. Moo-wo-moo kalita bankoo kaŋ, a be kali la Alla tooñaa le too la. Kaatu ñinoo be ke la bataalu la le mennu tambita, ì ye bo n ñaa koto.”

¹⁷“A juubee, m be saŋ kutoo niŋ banku kutoo le daa la. Hakili te bula la folooto kuwolu la, sako moo ka i miira ì la.

¹⁸Bari m be feŋolu mennu daa la be a tinna la le, ali ye tara seewoo niŋ maadiyaa kono fo abadaa. Kaatu m be Yerusalaamu daakuu la le, ka ke ñaaboo dulaa ti, a moolu la kuwo si n seewoo.

¹⁹M be kontaani la Yerusalaamu la kuwo la le, ŋa seewoo soto n na moolu la kuwo to. Kumboo kaŋo niŋ woosiyo te moyi la jee kotenke.

²⁰“Deenaani te tara la jee kotenke meŋ be baluu la tili dantaŋ doroŋ na, waraŋ keebaa ye faa, a maŋ kotoo kendeke. Moo-wo-moo faata i siyo be sanji keme, be muluŋ na le ko, i mu fondinkewo doroŋ ne ti. Moo meŋ siyo maŋ futa sanji keme, ì be a fo la le a dankata le.

²¹Ì be buŋolu loo la le, ì ye sabati ì kono, Ì ye wayini yiri kankaŋolu tutu, ì ye ì yiridiŋolu domo.

²²Ì te buŋo loo la kotenke, doolu ye tara sabatiriŋ jee, waraŋ ka tuturoo ke, doolu ye a domo. Kaatu yirisuŋo siyo ka jamfa ñaameŋ, n na moolu siyo be jamfa la wo le ñaama. N na tomboŋ moolu be diyaa soto la ì faŋo la dookuwo to le, fo a ye mee.

²³Ì te ì semboo bo la kensenke, waraŋ ka diŋolu wuluu, kasaaroo be naa mennu kaŋ, kaatu ì be ke la moolu le ti, Yaawe be neema la mennu ma, ì niŋ ì koomalankoolu bee.

²⁴Janniŋ ì ka kumandiroo ke, m be n danku la le. Niŋ ì be diyaamu kaŋ n ye ì la suula kuwolu la, m be ì la duwaa jaabi la le.

²⁵Suluwo niŋ saajiiriŋo be domoroo ke la ñoo kaŋ ne, jatoo be ñaamoo ñimi la ko ninsoo, kankaŋo ye ke saa la domoroo ti. Ì te mantoora ke la, ì te kasaarali ke la n na konko senuŋo* bee kaŋ. Nte Yaawe le ye a fo.”