Read Mandinka Yesaya 9 Bible Online

Yesaya 9 - Mandinka bible

Yesaya 9

¹A si ke ñaa-wo-ñaa, moolu mennu tarata wo diboo kono, te tara la niitooroo kono fo abadaa. Koomanto, Alla ye Sebuluni tundoo aniŋ Nafutali tundoo la kuwo jindi le, bari ñaato, ñiŋ dulaa kiliŋo be horoma la le, ka bo baa maafaŋo la, ka taa Kalilee meŋ mu tumarankee tundoo ti, fo Yoridani Boloŋo kankuŋ doo la.

²Moolu mennu taamata diboo kono, ì ye mala baa je le. Mennu tarata dibi fiŋ diboo kono, maloo malata ì kaŋ ne.

³Ite Yaawe ye bankoo moolu siyandi, i ye ì la kontaanoo lafaa. Ì be seewoo la i ñaatiliŋo la le, ko moolu ka seewoo ñaameŋ, niŋ ì be katiroo la, waraŋ niŋ kelediŋolu be ñapinkaŋ feŋolu talaa la.

⁴Yookoo* meŋ ka ì mantoora, i ye a kati le, aniŋ dokoo meŋ be laariŋ ì sañoolu kaŋ. Ì mantooralaalu la busoo, i ye a kati le, ko i ye Midiyani[12] la busoo kati nuŋ ñaameŋ.

⁵Kelediŋ-wo-kelediŋ ye samatoo meŋ duŋ keloo waatoo, aniŋ ì la dendikoolu mennu ye yeloo maa, ì bee be jani la le.

⁶Diŋo le wuluuta ǹ ye, Alla ye dinkewo le dii ǹ na, aduŋ maraloo be tara la ate le bulu. A be kumandi la Yaamarilaa Ñontaŋo le la, Alla Sembemaa, Badaa-badaa Faamaa, aniŋ Kayira Mansoo.

⁷A la maraloo be tara la lafaa la le doroŋ, aduŋ kayira bambaloo le be tara la keriŋ. A be a bonsuŋo Dawuda la bankoo mara la le, a be sii la a la siiraŋo le kaŋ. A be a la maraloo londi la le, a ye bambaŋ, aduŋ a be a taamandi la tiliŋo niŋ tooñaa le la, ka dati a la waatoo la, fo abadaa. Yaawe* Alihawaa Maariyo* ye a hame le, ka ñiŋ kuwo taamandi.

⁸Maariyo ye kiilaariyaa kumoo fo Banisirayila ma, kiilaariyaa kumoo le mu, Yaakuba koomalankoolu kamma.

⁹Efurayimunkoolu* aniŋ ì la saatee baa Samariya, ì bee be a loŋ na le, bari hani wo ì be ì faŋ wara la le, ì ye ì faŋ sikandi, ka a fo ko,

¹⁰“Biriki buŋolu boyita le, bari m̀ be ì lookuu la niŋ bere birikoolu le la, sooto yiroolu kuntuta le, bari m̀ be ì jooseyi la sedari* yiroolu le la.”

¹¹Bari Yaawe ye jawoolu wulindi Banisirayila kamma le, Asiriyankoolu, mennu ye Aramu mansa Resini[13] noo. A ye ì jawu doolu fanaa maamandi le,

¹²Aramunkoolu mennu bota tilibo maafaŋo la, Filisitinkoolu mennu bota tilijii maafaŋo la, ì ye Banisirayila tiñaa le ka a kasaara. Ñiŋ bee koolaa, Yaawe la kamfaa maŋ jii, a buloo be teekariŋ ne ka ì mantoora.

¹³Bari moolu maŋ muruŋ Yaawe kaŋ, Alihawaa Maariyo meŋ ye i mantoora, sako ka a la kuwo ñini.

¹⁴Wo to ka bo Banisirayila kuŋo to fo a feñoo to, ka taa seyiŋolu niŋ teŋ buloolu bee, Yaawe be a bee kuntu la le tili kiliŋ.

¹⁵Alifaalu niŋ ñaatonkoolu le mu kuŋo ti, annabiyomoolu mennu ka faniyaa kumoo kawandi, wolu le mu feñoo ti.

¹⁶Mennu ye ñiŋ moolu ñaatonkayaa, ye ì filindi le, aduŋ ì ka mennu ñaatonkayaa, caawuta le.

¹⁷Wo le ye a tinna Yaawe maŋ kontaani ì la fondinkewolu la kuwo la, waraŋ ka balafaa ì la aliyatiimoolu ye, aniŋ furuyaamusoolu. Kaatu ì bee ye ì koo dii Alla la le, aduŋ kuu kuruŋ kelaalu le mu ì ti, ì bee ka kuma jawoo le fo. Ñiŋ bee koolaa, Yaawe la kamfaa maŋ jii, a buloo be teekariŋ ne ka ì mantoora.

¹⁸Moolu la jawuyaa ka mala le ko taakaa dimbaa ka ŋaniŋ kuroolu jani, ka yiri sutoolu dulaa dibiriŋolu mala, fo jee bee ye ke siisii kenseŋo ti.

¹⁹Yaawe Alihawaa Maariyo la kamfaa kaŋ, bankoo bee be jani la le, moolu ye ke dimbaa malaraŋo ti. Moo te yamfa la a baadiŋo ye,

²⁰aduŋ moolu ye domorindiŋ je daa-wo-daa, ì ka a suuñaa le, ì ye a domo, bari wo buka konkoo bo ì la. Meŋ si ke ì maakoyilaa ti, ì ka i baluu wo le la.

²¹Manase ye Efurayimu kele, Efurayimu fanaa ye Manase kele, bituŋ ì naata wuli Yahuuda kamma ñoo la. Ñiŋ bee koolaa, Yaawe la kamfaa maŋ jii, a buloo be teekariŋ ne ka ì mantoora.