Read Mandinka Yeremiya 10 Bible Online

Yeremiya 10 - Mandinka bible

Yeremiya 10

¹Alitolu Banisirayilankoolu, ali ali tuloo loo Yaawe* la kumoo la.

²Yaawe ye ñiŋ ne fo ko: “Ali kana bula banku koteŋolu la siloolu nooma, sako saŋo santo taamanseeroolu si ali jaakalindi, wolu ka banku koteŋ moolu jaakalindi ñaa-wo-ñaa.

³Ì la aada kuwolu mu kuu fuuriŋolu le ti. Ì ka yiroo le kuntu naŋ sutoo kono, yiri leselaa ye jalaŋo dadaa a la.

⁴Ì si naa a baloo bee laa kodiforoo niŋ sanoo la, ì ye maritoo niŋ peruwolu taa ka a pempeŋ, fo a kana yokuyoku.

⁵Ì la jalaŋolu ka munta le juburulaŋo kunku buloolu to, ì buka diyaamu noo fereŋ. Fo niŋ moo ye ì sika ka ì samba, ì buka taama noo. Ali kana sila ì la, kaatu ì buka kuu jawu ke noo moo la, sako kuu kende.”

⁶Kooni Yaawe, doo koteŋ te jee meŋ be ko ite. Ite warata le, i too semboo warata.

⁷Jumaa le te sila la ite la, ite, bankoolu la Mansoo? Ñiŋ ne ñanta ite to. Bankoolu moo ñaamendiŋolu bee kono, ì la mansamarali bankoolu bee kono, kiliŋ te jee meŋ be ko ite.

⁸Ì bee mu hakilintaŋolu niŋ toolewolu le ti, wo jalaŋ fuuriŋolu la karandiroo, yiri kenseŋo!

⁹Ì ka kodiforo tunkandiŋo le bondi naŋ Tarisi, ì ye sanoo bondi naŋ Ufasi. Bulukalaŋ dookuulaa le ye ì dookuu, sani tunkannaa la bululadookuwo. Ì ka duŋ feŋolu le duŋ ì la, bayi daa jawu kuloori ñiimaalu, wolu bee mu dookuunoolaalu la bululadookuwo le ti.

¹⁰Bari ite Yaawe le mu Alla tooñaa ti, ite le mu Alla baluuriŋo niŋ badaa-badaa Mansoo ti. I la kamfaa ka bankoo jarajarandi le, bankoolu buka i la jusukandoo dunoo taa noo.

¹¹Yaawe ko: “Yeremiya, a fo ì ye ko: Wo alloolu mennu maŋ saŋo niŋ bankoo daa, ì be kasaara la le ka bo bankoo kaŋ, aniŋ ka bo saŋ fatoo koto.”

¹²Alla le ye bankoo daa a semboo la, a ye duniyaa sotondi a la ñaameŋo la, a ye saŋ fatoolu wanka ka bo a la londoo la.

¹³Niŋ a kumata, jii jamaa le ka bumbuŋ saŋ fatoolu kono, a ka tawaloolu wulindi ka bo duniyaa daŋolu bee to. A ka saŋ ŋalasoo niŋ samaajiyo le jindi, a ye foñoo fee naŋ ka bo a la foñobuŋolu kono.

¹⁴Ate ñaa la, hadamadiŋo bee le mu hakilintaŋo ti, ì maŋ londi soto. Wo tunkannaalu meŋ-wo-meŋ ka malu le, a la jalaŋolu kamma la, kaatu tunkannaalu la batufeŋolu mu kenseŋ ne ti, niijii foño te ì kono.

¹⁵Feŋ fuuriŋolu le mu, jelefeŋyaa feŋolu. Niŋ ì jarabi waatoo siita, ì be kasaara la wo le fee.

¹⁶Bari Yaawe te wo ñaama, Yaakuba la Alla, kaatu ate le mu feŋo bee Daamansoo ti, a ye Isirayila ke a la keetaafeŋo ti. A too mu Yaawe Alihawaa Maariyo* le ti.

¹⁷Ì ye alitolu mennu suki Yerusalaamu, ali ali la fudoo sika ka bankoo bula,

¹⁸kaatu Yaawe ye ñiŋ ne fo ko, a be bankoo moolu fayi la kampuraŋo la ñiŋ waatoo le la. A be dimiŋ baa le naati la ì kaŋ, fo a ye duŋ ì la kendeke.

¹⁹Yerusalaamu ko, “Kooroo boyita n kaŋ ne, dimiŋo meŋ laata n kaŋ. N na baramoo diminjawuta le. Bari ŋa ñiŋ miira le ko, tooñaa-tooñaa, ñiŋ mu n ye yankankatoo le ti, m be a muña noo la le.

²⁰N na tiriliisoo* kasaarata, a juloolu bee kuntuta. N diŋolu bota m bala ka taa, n te ì je la kotenke. Hani kiliŋ maŋ tu jee ka n na tiriliisoo wanka, waraŋ ka a ridoolu deŋ.”

²¹Kantarilaalu ǹ na moolu kunna mu hakilintaŋolu le ti, ì buka Yaawe la kuwo hati, wo le ye a tinna ì buka ñaatotaa soto, ǹ na moolu bee janjanta.

²²I lamoyi baŋ, kibaaroo le ka naa! A fele, a naata le, maakaŋ baa ka bo naŋ maraa kara maafaŋ bankoo kaŋ. Wo bankoo be Yahuuda saatewolu tumbuŋ na le, ka a ke kunkuwuloolu la daakaa ti.

²³Hee Yaawe, ŋa ñiŋ loŋ ne ko, hadamadiŋo la baluwo te a faŋo bulu, a buka a faŋo taaraŋ siloo kanda noo.

²⁴Yaawe, n kuluu, bari i si a ke i la tiliŋo kaŋ, i kana a ke i la kamfaa kaŋ, i kana taa n labaŋ.

²⁵I la kamfaa jindi banku koteŋ moolu kaŋ, mennu maŋ i loŋ, siyolu kaŋ, mennu buka i batu, kaatu ì ye Yaakuba koomoo kasaara le, ì ye a kasaara le ka a baŋ fereŋ, ì ye ǹ na bankoo tumbuŋ.