Read Mandinka Yeremiya 13 Bible Online

Yeremiya 13 - Mandinka bible

Yeremiya 13

¹Yaawe* naata a fo n ye ko: “Taa i ye fatari kulembeŋo saŋ i faŋo ye, i ye a siti i tewo la. I kana a bula jii kono.”

²Wo le to ŋa fatari kulembeŋo saŋ, ŋa a siti n tewo la, ko Yaawe ye a fo n ye ñaameŋ.

³Yaawe la kumoo naata n kaŋ tukuŋ ko:

⁴“Wuli, i ye taa Perati Woyoo to,[15] i niŋ kulembeŋo, i ye meŋ saŋ, meŋ be sitiriŋ i tewo la, i ye a maabo berehuwo kono jee.”

⁵Bituŋ n taata ŋa a maabo Perati Woyoo daala, ko Yaawe ye n yaamari a la ñaameŋ.

⁶Waati jaŋ koolaa Yaawe naata a fo n ye ko, “Wuli, i ye taa Perati Woyoo to, ŋa i yaamari nuŋ ka kulembeŋo maabo daameŋ to, i ye a taa jee.”

⁷Wo le to n taata jee, ŋa kulembeŋo ñiŋ wuri ka a bondi, ŋa a maabo nuŋ daameŋ. Biriŋ ŋa a je, a ye a tara le a tiñaata, aduŋ a te feŋ nafaa la.

⁸Bituŋ Yaawe la kumoo naata n kaŋ kotenke ko:

⁹“Nte Yaawe le ye ñiŋ fo ko: M be Yahuuda la faŋ waroo tiñaa la teŋ ne, aniŋ Yerusalaamu la faŋ wara baa fanaa.

¹⁰Ñiŋ moo kuruŋolu balanta nte la kumoolu muta la le. Ì kanjaaramaalu ka bula ì fansuŋ lafoo le nooma. Ì bulata jalaŋolu le nooma ka ì batu, aniŋ ka sujudi ì ye. Wo kamma la ì be ke la le ko ñiŋ fatari kulembeŋo, meŋ te feŋ nafaa la.

¹¹Ko kulembeŋo ka tara nakiriŋ moo tewo bala ñaameŋ, ŋa Banisirayila niŋ Yahuuda nakindi m faŋ na wo le ñaama. Wo daliiloo mu ñiŋ ne ti fo ì si ke n na moolu ti, ka n too bondi, aniŋ ka jayiroo niŋ horomoo naati n kaŋ. Bari ì maŋ soŋ ka i lamoyi n na.” Yaawe le ye a fo.

¹²Yaawe naata a fo n ye ko, ŋa a fo Banisirayilankoolu ye ko: “Yaawe Banisirayila la Alla ko: Wayini* dumbu-wo-dumbu, a ñanta le ka fandi niŋ wayinoo la. Ì be i jaabi la le ko, ‘Fo ntolu maŋ a loŋ ko, wayini dumbu-wo-dumbu, a ñanta le ka fandi niŋ wayinoo la?’

¹³Bituŋ i si naa a fo ì ye, nte Yaawe ye ñiŋ ne fo ko: M be ñiŋ bankoo moolu bee le mindi la fo ì ye siira. Wolu le mu Mansa Dawuda koomalanka mansoolu ti, a la mansasiiraŋo kaŋ, ka taa piriisoolu*, annabiyomoolu, aniŋ Yerusalaamunkoolu bee.

¹⁴Wo koolaa ŋa naa ì feteŋ ñoo la ka ì teyi, alifaalu niŋ dindiŋolu bee kafuriŋo. N te balafaa la, waraŋ ka yamfa, waraŋ ka hiina ì la, ka m bali ì kasaara la.” Yaawe le ye a fo.

¹⁵Ali ali tuloo loo ka i lamoyi, ali kana ali faŋ wara. Yaawe le ye a fo.

¹⁶Ali horomoo dii Yaawe ali la Alla la, janniŋ a be diboo dundi la ali ma, ali siŋolu kali taki konko dibiriŋolu kaŋ. Tuma meŋ na ali be tara la mala ñiniŋo la, a be dibi fiŋo le naati la ali ye, a ye a ke ali ye dibi baa ti.

¹⁷Niŋ ali maŋ soŋ ka i lamoyi, m be kali kullootoo kumboo la le, ali la faŋ waroo kamma la. N si kumboo baake, n ñaa ye jiyo buruntu, kaatu Yaawe la koorewo be taa mutoo kono le.

¹⁸Yaawe ko ŋa a fo mansa niŋ mansa baamaa ye ko, “Ali sii fammajii siiraŋo kaŋ, kaatu ali la mansanaafa ñiimaalu jolonta le ka bo ali kuŋolu to.”

¹⁹Nekefu* tundoo saatewolu be sukiriŋ ne, moo te soto la meŋ be ì yele la. Yahuuda bee le be taa mutoo kono, a muumewo bee le be taa mutoo kono.

²⁰Yerusalaamu, i ñaalu wulindi i ye a je, mennu ka bo naŋ maraa kara maafaŋo la. Dimbaayaalu lee, mennu tarata karafariŋ nuŋ i bulu, i la kooree kende baa?

²¹I be muŋ ne fo la, niŋ ì ye moolu marandi i kunna, ite faŋo ye mennu muta i teeroolu ti? Fo dimiŋo te duŋ na i la baŋ, ko dimiŋo ka musoo muta tiŋo to ñaameŋ?

²²Aduŋ niŋ i ko i faŋ ye ko, “Muŋ ne ye ñiŋ laa n kaŋ?” a loŋ ko i la junuboolu la waroo le mu, wo le ye a tinna ì ye i la faanoo wura i la, ì ye i tiñaa.

²³Fo Kusinkoo* si a balafatoo yelemandi noo baŋ, waraŋ soloo ye a baloo tompoolu yelemandi noo? Niŋ wo keta, wo to ite si kuu kendoo ke noo, ite meŋ dalita kuu kuruŋ kewo la.

²⁴Yaawe ko: “M be i janjaŋ na le ko fuufulewo, keñewula* foñoo ka meŋ tindi taariŋ.

²⁵Wo le be ke la i la dunoo ti, ŋa meŋ sumaŋ ka a ke i niyo ti, kaatu i ñinata n na le, i laata faniyaalu la.” Yaawe le ye a fo.

²⁶“Nte faŋo le be i la faanoolu wura la i la, ka i la maloo laa banta.

²⁷Ŋa i la kuu ñewundiŋolu le je, i la jeenoo niŋ sabatibaliyaa, aniŋ i la cakayaa[16] maañaa, konkoolu kaŋ aniŋ kenoolu kono taariŋ. Ite Yerusalaamu, kooroo be i ye! Janniŋ waati jumaa le ite be seneyaa noo la?”