Read Mandinka Yeremiya 17 Bible Online

Yeremiya 17 - Mandinka bible

Yeremiya 17

¹Yaawe* ye ñiŋ ne fo ko: “Alitolu Yahuuda moolu, ali la junuboolu karunta ali sondomoolu kono le, aniŋ ali la sadaabodulaalu* bala, ka safee jee, ko safeeroo meŋ ñenjeta berewalaa bala nee kalaa la, waraŋ luuluu daamelundiŋo la.

²Hani ali koomalankoolu fanaa buka ñina noo ì la sadaabodulaalu niŋ ì la Asera* jalaŋ dokoolu la, yirisuŋ biireeriŋolu koto taariŋ, konkoriŋolu kaŋ,

³aniŋ konko baalu kaŋ, kene fanuŋolu to. M be ali la naafuloo niŋ ali la sotofeŋolu bee dii la ali jawoolu la ñapinkaŋ feŋo le ti, ka ke ali la junuboo joo ti, ali ye mennu ke ali la bankoo fannaalu bee la.

⁴Ali faŋolu le be a tinna ali ye foo ali la keetaabankoo la, ŋa meŋ dii ali la. M be ali joŋyandi la ali jawoolu ye banku le kaŋ ali maŋ daameŋ to loŋ, kaatu ali ye n na kamfaa dimbaa le mala. A be tu la mala la le fo fawu.”

⁵Yaawe ye ñiŋ ne fo ko: “Dankoo be moo le ye meŋ ka a jikoo loo hadamadiŋo kaŋ, ka taamaayaa balajaata kenseŋo la, ka jenke nte Yaawe la karoo la.

⁶A maarii ka munta le ko fitoo meŋ be keñewuloo* kono, niŋ yiriwaa naata, ate te a je la. A be tara la sabatiriŋ keñewuloo dulaa jaaroo le to, koo bankoo kaŋ, moo te siiriŋ daameŋ.

⁷“Bari barakoo be moo le ye meŋ ye a jikoo loo nte Yaawe kaŋ, meŋ jikiraŋo mu nte Yaawe ti.

⁸A maarii ka munta le ko, yiroo meŋ tututa woyoo daala, a ye a suloolu duŋ woyoo daala. A buka sila niŋ kandoo naata, aduŋ a jamboolu ka tu jambakereriŋ ne, a buka dewuŋ niŋ jaa keta saŋo meŋ na, aduŋ a buka i foño diŋo la.”

⁹A ko: “Hadamadiŋo sondomoo la kuruŋyaa le tambita feŋo bee la, aduŋ a buka jaara noo. Jumaa le si a fahaamu noo?

¹⁰Nte Yaawe le ka hakiloo kisikisi, n ka sondomoo kotobo, ka moo-wo-moo joo a maañaa la, aniŋ a kekuwolu la.”

¹¹Ko siisewo meŋ ye kiloolu teyi a maŋ mennu laa, wo le mu moo ti meŋ ka naafuloo soto kalabanteeyaa kono, a la fondinkeeyaa teema le, a be foo la a la, aduŋ a labaŋo be a yitandi la le ko, a mu toolewo le ti.

¹²Mansasiiraŋ kallankewo*, horomoo be fuumariŋ meŋ ye biriŋ cuk, wo le mu ǹ na Batudulaa Senuŋo ti.

¹³Kooni Yaawe, Banisirayila jikoo mu ite meŋ ti, moo-wo-moo ye a koo dii ite la, a be malu la le. Moolu mennu badalita i ma, ì be yeemaŋ na le ko safeeroo meŋ keta buutoo kono, bayiri ì ye ì koo dii ite Yaawe la le, baluwo jiyo diilaa.

¹⁴Hee Yaawe, n kendeyandi, n si kendeyaa keseŋ, n kiisa, n si kiisa burayi, kaatu ite le mu n na jayitaa ti.

¹⁵A juubee moolu ka a fo n ye ko, “Yaawe ye kumoo meŋ fo ko a be ke la, a lee? A ye ke baŋ!”

¹⁶Nte maŋ bori ka bo ke la i la kantarilaa ti ì kunna, aduŋ i ye a loŋ ne m maŋ luŋ jawu ŋaniya ì ye. Kumoo meŋ bota n daa, a bee be laariŋ i ñaa koto le.

¹⁷Kana ke n ye kooroo saabubaa ti, ite le mu n ye maabodulaa ti maasiiboo luŋo la.

¹⁸Allamaa n toorandilaalu ye malu, bari kana soŋ nte ŋa malu. Ì ye jikilateyi, bari kana soŋ nte ŋa jikilateyi. Kasaaroo luŋo naati ì ye, i ye ì muumewo buruka kewu!

¹⁹Yaawe ye ñiŋ ne fo n ye ko, “Taa loo Moolu la Dundaŋ Daa baa to, Yahuuda mansoolu ka duŋ niŋ finti daameŋ na. Ka bo wo to i si taa loo Yerusalaamu dundaŋ daa koteŋolu bee fanaa to.

²⁰A fo ì ye i lamoyi nte Yaawe la kumoo la, itolu Yahuuda mansoolu, aniŋ Yahuuda moolu bee, ka taa moo-wo-moo be siiriŋ Yerusalaamu, meŋ ka duŋ niŋ wo daalu la.

²¹Nte Yaawe ye ñiŋ ne fo ko, ì ye ì hakilitu ì faŋolu to, ì kana duni-wo-duni samba Loobula Luŋo la. Ì kana duni fintindi waraŋ ka a dundi niŋ Yerusalaamu dundaŋ daalu la.

²²Ì kana duni fintindi ì la buŋolu kono Loobula Luŋo la, sako ì si dookuu ke. Ì ñanta le ka a muta luŋ buuñaariŋo ti, ko ŋa ì la alifaa foloolu yaamari a la ñaameŋ.

²³Bari wolu maŋ i lamoyi wo la, waraŋ ka ì tuloo loo a la. Ì keta kanjaaroolu le ti, ì maŋ soŋ ka i lamoyi, waraŋ ka soŋ kuluuroo la.

²⁴“Bari n ko itolu si soŋ ka i lamoyi n na, ì kana duni samba niŋ ñiŋ saatewo dundaŋ daalu* la Loobula Luŋo la. Ì si a muta luŋ buuñaariŋo ti, ì kana dookuu ke a luŋo la.

²⁵Niŋ wo keta, ì la mansoolu niŋ ì la maralilaalu be kali duŋ niŋ finti la Yerusalaamu dundaŋ daalu la le, ì ye ì mumu Mansa Dawuda noo taa. Ì niŋ ì la maralilaalu be kali keleraŋ sareetoolu* niŋ suwoolu le borindi la ka duŋ naŋ jee. Yahuuda moolu fanaa be kali tara la ì fee le, aniŋ mennu be siiriŋ Yerusalaamu, aduŋ moolu be sabati la ñiŋ saatewo kono le fo fawu.

²⁶Moolu be kali bo la naŋ Yahuuda saatewolu to le, aniŋ Yerusalaamu dandanna saateeriŋolu to. Ì be bo la naŋ Benjamini tundoo kaŋ ne, aniŋ Sefela* tundoo la, konkotundoo* to, aniŋ Nekefu* tundoo. Ì be jani sadaalu* niŋ beeyaŋ sadaalu naati la le, siimaŋ sadaalu, cuuraayi sadaalu, aniŋ tenturulaŋ sadaalu Yaawe Batudulaa Buŋo* to.

²⁷“Bari n ko, ì si soŋ ka i lamoyi n na, ka Loobula Luŋo muta luŋ buuñaariŋo ti. Ì kana duni samba niŋ Yerusalaamu dundaŋ daalu la wo luŋo la. Kaatu niŋ ì ye wo ke, m be dimbaa faabaloo le mala la Yerusalaamu dundaŋ daalu to, a ye a tatoolu bee kasaara.”