Read Mandinka Yeremiya 22 Bible Online

Yeremiya 22 - Mandinka bible

Yeremiya 22

¹Yaawe* ko n si taa Yahuuda mansasuwo to ka ñiŋ kiilaariyaa kumoo fo jee ko:

²“Ite Yahuuda mansakewo, meŋ be Dawuda la mansasiiraŋo kaŋ, i lamoyi Yaawe la kumoo la, ka taa i la mansakundaa dookuulaalu, aniŋ i la moolu bee, mennu ka duŋ niŋ finti ñiŋ suwo dundaŋ daalu la.

³Nte Yaawe ye ñiŋ ne fo ko: Ali tooñaa niŋ tiliŋo taamandi. Ali moo-wo-moo bondi a toorandilaa bulu, ì ye meŋ nakari. Ali kana tumarankewolu toora waraŋ ka ì fitina, ka taa aliyatiimoolu, aniŋ furuyaamusoolu. Ali kana moolu yeloo boŋ ñiŋ bankoo kaŋ, mennu maŋ kuu ke.

⁴Niŋ ali sonta n na kumoo muta la, wo to ali be tenteŋ na le ka mansoolu soto, mennu be sii la Dawuda la mansasiiraŋo kaŋ, ì kali duŋ niŋ finti ñiŋ dundaŋ daalu la. Ì be kali ì la keleraŋ sareetoolu* niŋ suwoolu borindi la le ka duŋ naŋ jee, ì niŋ ì la mansakundaa dookuulaalu, aniŋ ì la moolu.

⁵Bari niŋ ali maŋ soŋ ñiŋ kumoolu muta la, wo to ŋa n kali m faŋo la ko, ñiŋ mansasuwo be ke la tumbuŋo le ti.” Yaawe le ye a fo.

⁶Yaawe ye ñiŋ ne fo Yahuuda mansasuwo la kuwo to ko: “I ñiiñaata n ñaa koto ñaa-wo-ñaa ko Kileyadi tundoo, aniŋ Libanooni konkokaŋ yiroolu, a be koyiriŋ ne ko, m be i ke la le ko keñewuloo*, komeŋ moo te siiriŋ saatewolu mennu to.

⁷M be tiñaarilaalu le parendi la naŋ i kamma, ì meŋ-wo-meŋ niŋ i la jooraŋo. Ì be i la sedari* bilii ñiimaalu bee kuntuŋ-kuntuŋ na le, ì ye dimbaa duŋ ì la.

⁸“Banku jamaa moolu si naa tambi ñiŋ saatewo la, aduŋ ì be kali ñoo ñininkaa la le ko: ‘Muŋ ne ye a tinna Yaawe ye ñiŋ saatee baa ke teŋ?’

⁹A jaabiroo be ke la ñiŋ ne ti ko: ‘Kaatu ì ye ì koo dii kambeŋo la le ì niŋ Yaawe ì la Alla teema, ì ka sujudi jalaŋolu ye, ka ì batu.’ ”

¹⁰Alitolu Yahuuda moolu, ali kana mansa[20] la saŋo kumboo, meŋ faata, sako ka a woosii. Bari ali kumboo kendeke wo doo[21] la kuwo la, ì ye meŋ samba mutoo kono, kaatu a te muru la naŋ kotenke, ka a wuluu bankoo je.

¹¹Yaawe ye ñiŋ ne fo Yehohasi[22] la kuwo to, Yahuuda mansakewo, meŋ siita a faamaa Yosiya noo to, ì naata a bondi jaŋ ka a samba mutoo kono: “A te muru la naŋ kotenke.

¹²A be faa la wo bankoo le kaŋ, ì ye a samba mutoo kono daameŋ to. A ñaa te ñiŋ bankoo je la kotenke.”

¹³Kooroo be moo ye le meŋ ye a la buŋo loo tilimbaliyaa la, ka buŋ doolu loo a kaŋ santo kalabanteeyaa la, ka a la bankudiŋolu dookundi kensenke, a buka ì la joo dii ì la.

¹⁴Kooroo be a ye le, ate meŋ ka a fo ko, a be buŋ baa le loo la a faŋo ye, a ye buŋ fanuŋolu coki a kaŋ santo. Bituŋ a ye palanteeri fanuŋolu ke a la, a ye a konoto bumbaloolu bee laa sedari* babaroolu la, ka a muu niŋ lasi wuleŋo la.

¹⁵“Fo ite ye a miira, wo le ye ite mansayandi doolu ti, ka i yaa bee ñiiñandi sedari babaroo la? Fo ite faamaa, wo maŋ a domo, a ye a miŋ, bari a ye tooñaa niŋ tiliŋo le taamandi? Wo le ye a tinna kuwo bee ye a wati.

¹⁶A ye fuwaaroolu niŋ sembentaŋolu maakoyi, ka kiitiyo teyi ì ye tiliŋo kono. Wo le ye a tinna kuwolu bee keta a ñaama. Fo ka wo ke, nte loŋo nafaa maŋ ke wo le ti baŋ?” Yaawe le ye a fo.

¹⁷“Bari ite ñaa niŋ i sondomoo be looriŋ i fansuŋ nafaa doroŋ ne kaŋ, i ka moolu faa mennu maŋ kuu ke, ka keresubaŋ moolu fee, ka ì toorandi.”

¹⁸Wo kamma la Yaawe ye ñiŋ ne fo Yosiya dinkewo Yehoyakimu, Yahuuda mansakewo la kuwo to ko: “Ì te a la saŋo kumboo la ka a fo ñoo ye ko: ‘Ayiwaalii! Ayiwaalii!’ Ì te a la saŋo kumboo la ka a fo ko: ‘Ayiwaalii, m̀ maariikewo! A la mansayaa be ñaameŋ!’

¹⁹Fali la baadee le be ke la a la, ka a kuruntu ka taa a fayi Yerusalaamu banta.”

²⁰Yaawe ko: “Ite Yerusalaamu, taa Libanooni konkoolu kaŋ ka wuuri santo, i wuurikaŋo ye kuma Basani konkoolu to, i kumboo kaŋo, ka bo Abarimu konkoolu kaŋ, kaatu i niŋ mennu laata ñoo kaŋ ì bee kasaarata le.

²¹Ŋa i dandalaa le tuma meŋ i be dahaa kono, bari i kumata le ko, ‘N te n lamoyi la!’ Wo le mu i la siloo ti biriŋ i dindiŋ. I maŋ n na kumakaŋo muta.

²²Foñoo le be i kantalaalu koora la, i niŋ mennu laata ñoo kaŋ, ì ye taa mutoo kono. Wo to le i be malu la, i keñaa ye bo i kono, i la kuu kuruŋolu bee kamma la.

²³Ite ye i la ñaŋo dadaa Libanooni sedari* yiroolu[23] le la. Bari i be ŋuntaŋ na ñaameŋ, niŋ dimiŋo laata i kaŋ luŋo meŋ na, dimiŋo, ko niŋ tiŋo ye musoo maa!

²⁴Yaawe ko: “A be koyiriŋ ñaameŋ ko nte be baluuriŋ ne, hani niŋ a ye a tara ite Yahuuda mansakewo Yehoyahini, Yehoyakimu dinkewo mu n na tampurilaŋ konnaa le ti, m be i wafati la le ka i bondi.

²⁵M be i duŋ na moolu bulu le mennu be i niyo nooma, i silata wolu mennu la. Wolu le mu Babiloni mansakewo Nebukanesa ti, a niŋ a la Babiloni kelediŋolu.

²⁶I niŋ i baamaa meŋ ye i wuluu, m be ali fayi la banku koteŋ ne kaŋ, ali doodoo maŋ wuluu daameŋ to. Ali be faa la wo le to.

²⁷Ali nene te muru la bankoo kaŋ, daameŋ ye ali loo.”

²⁸Moolu si a fo ko, “Fo Yehoyahini le keta jutunna moo ti teŋ, ko fenkeŋ teleŋo, ko daandiŋ teyiriŋo, moo buka feŋ meŋ hati? Muŋ ne ye a tinna ì ye a niŋ a diŋolu wafati, ka taa ì fayi banku kaŋ, ì maŋ daameŋ to loŋ?”

²⁹Ite bankuŋ, ite bankuŋ, ite bankuŋ, i lamoyi Yaawe la kumoo la!

³⁰Yaawe ye ñiŋ ne fo ko: “Ñiŋ kewo safee ko diŋ sotobaloo ti, kewo meŋ te ñaatotaa soto la a baluu tiloolu kono, kaatu a koomalanka kiliŋ te ñaatotaa soto la, ka ke Yahuuda mansa ti, Dawuda la mansasiiraŋo kaŋ.”