Read Mandinka Yeremiya 30 Bible Online

Yeremiya 30 - Mandinka bible

Yeremiya 30

¹Yaawe* la ñiŋ kumoo le naata n kaŋ ko:

²“Nte Yaawe, Banisirayila la Alla ye ñiŋ ne fo ko: Yeremiya, kumoolu bee safee kitaaboo kono, ŋa mennu fo i ye.

³Kaatu luŋolu be naa le, m be n na moolu, Banisirayila niŋ Yahuuda murundi la ì la firiŋo kono. M be ì murundi la bankoo kaŋ ne, ŋa meŋ dii ì mumuñolu la, aduŋ ì be a taa la le kotenke, ka ke ì taa ti.” Yaawe le ye a fo.

⁴Yaawe ye ñiŋ kumoolu le fo Banisirayila niŋ Yahuuda la kuwo to:

⁵“Nte Yaawe ye ñiŋ ne fo ko: Kumboo kaŋo, n ka wo le moyi, silaŋo kamma la, aniŋ kijafaroo, a maŋ ke kayiroo ti.

⁶Ali ñininkaaroo ke, ali ye a juubee baŋ, muna kewo si deenaanoo wuluu noo? Wo to muŋ ne ye a tinna ŋa kee kanaŋ-wo-kee kanaŋ je, a buloo be a konoo to, ko tiŋ ye musu maa? Muŋ ne ye moo bee ñaadaa yelemandi, ko saata kuurantoo?

⁷Kooni! Wo le be ke la luŋ baa ti. A ñoŋo te soto la. A be ke la Yaakuba koomoo ye jarabi waatoo le ti, bari ì be kiisa la a kono le.”

⁸Yaawe Alihawaa Maariyo* ko: “Wo luŋo la, m be joŋyaa yookoo* kati la le ka bo ali toŋo to, ŋa ali la joŋyaa juloolu kuntu, ali te ke la luntaŋolu ye joŋolu ti kotenke.

⁹Bari ali be nte Yaawe, ali la Alla le batu la, aniŋ ali la mansakewo Dawuda koomalankoo, m be meŋ wulindi la ali ye.

¹⁰“Wo to ali kana sila, alitolu Yaakuba koomalankoolu, n na dookuulaalu, sako ka jikilateyi, alitolu Banisirayilankoolu.” Yaawe le ye a fo. “Kaatu ko, m be ali kiisa la naŋ dulaa jamfariŋo to le, ka ali koomalankoolu bondi naŋ ì mutadulaa bankoo kaŋ. Yaakuba koomoo be muru la naŋ ne ka tenkuŋo niŋ tankoo soto, aduŋ moo te a silandi noo la.

¹¹M be ali fee le ka ali kiisa.” Yaawe le ye a fo. “M be wo bankoolu bee le buruka la, ŋa ali janjandi mennu kaŋ taariŋ, bari n te alitolu buruka la. M be ali kuluu la le ko a ñanta ñaameŋ. N te ali bula la muk, m maŋ ali kuluu.”

¹²Yaawe ye ñiŋ ne fo ko: “Ali la dimiŋo te jaara noo la, ali la baramoo te kendeyaa la noo.

¹³Moo te jee meŋ si loo ali la kuwo la, boori te ali la dimiŋo la, jaarañaa te ali la.

¹⁴Ali niŋ mennu bee be laariŋ nuŋ ñoo kaŋ, ì ñinata ali la le, ì buka hani ali hati kotenke. Ŋa ali busa ko n jawoo, ko konnantee balafaabaloo la kelendiroo, kaatu ali la boyidaa warata le, aduŋ ali la junuboolu siyaata.

¹⁵Muŋ ne ye a tinna ali ka kumboo ali la dimiŋo kunna, ali la dimiŋ kuwo, jaarañaa te meŋ na? Ŋa ñiŋ kuwolu ke ali la le, kaatu ali la boyidaa le warata, aduŋ ali la junuboolu siyaata baake.

¹⁶“Bari silaŋ, mennu ye i baluu ali la, ì fanaa be ke la baluutaa ti le, aduŋ ali konnantewolu kiliŋ-wo-kiliŋ be taa mutoo kono le. Mennu ye ali ke ñapinkaŋ feŋo ti, ì be ke la ñapinkaŋ feŋo ti le. Mennu ye ali ke buusi feŋo ti, ì be ke la buusi feŋo ti le.

¹⁷M be ali murundi la jaatikendeyaa to le, ŋa ali la dimiŋolu jaara.” Yaawe le ye a fo. “Kaatu ì ka ali wulubayi le ka a fo ko, Siyoni* moolu le mu, moo daa te mennu la kuu to.”

¹⁸Yaawe ye ñiŋ ne fo ko: “A juubee, m be Yaakuba koomalankoolu murundi la le ka tara firiŋo kono, aduŋ m be balafaa soto la ì ye ì sabatidulaalu la kuwo to le. Yerusalaamu saatewo be lookuu la a tumbuŋ noo to konko tintoo kaŋ ne, aduŋ mansasuwo be seyinkaŋ loo la a noo kotoo to le.

¹⁹Tenturu suukuwolu le be kali kuma la naŋ ì kono, aniŋ moolu la seewoo wuurikaŋo. M be ì yaatewo siyandi la le, ì kana dooyaa, ŋa ì buuñandi, moo kana ì malundi kotenke.

²⁰Ì diŋolu be ke la le ko ì tarata ñaameŋ kotooke, ì jamaa moolu ye londi kuu n ñaatiliŋo la. M be ì toorandilaalu bee jarabi la le.

²¹Ì la ñaatonkoo be ke la ì fansuŋ moo le ti, ì la maralilaa be bo la ì faŋolu le kono. M be a katandi la le, ka a sutiyandi n na, kaatu niŋ wo nte, jumaa le si haañi ka sutiyaa n na?” Yaawe le ye a fo.

²²“Wo to le ali be ke la n na moolu ti, ŋa ke ali la Alla ti.”

²³A juubee, Yaawe la kamfaa turubaadimaa le mu, a saafoñotomaa le mu. A be feteŋ na moo kuruŋolu le kuŋo kaŋ.

²⁴Yaawe la kamfaa saŋaroo te sumayaa la, fo niŋ a ye a la feeroolu taa, a ye ì taamandi, mennu be a sondomoo to. Wo luŋo la, labandulaa to, ali be a kuwo fahaamu la le.