Read Mandinka Yeremiya 4 Bible Online

Yeremiya 4 - Mandinka bible

Yeremiya 4

¹Yaawe* ko: “Muna Banisirayila, niŋ i be muru la naŋ, muru naŋ n kaŋ. I la jalaŋ ñewundiŋolu bee bondi n ñaa koto, i kana soŋ filoo ye i taa kotenke.

²Niŋ i ka kali tooñaa, tiliŋo, aniŋ foroyaa le kaŋ, ì ka kali meŋ na ko, ‘A be koyiriŋ ñaameŋ ko Yaawe be baluuriŋ ne,’ wo to bankoolu be neemoo duwaa la ì faŋolu ye nte too le la, n na kuwo ye ke ì ye ŋaañaaraŋo ti.”

³Yaawe ye ñiŋ ne fo Yahuuda niŋ Yerusalaamu moolu ye ko: “Ali ali la banku senebaloolu sene, ali kana fiiroo ke ŋaniŋolu kono.

⁴Alitolu Yahuuda niŋ Yerusalaamu moolu, ali ali sondomoo faŋo le sunna nte Yaawe ye. Niŋ wo nte, n na kamfaa si wuli ko dimbaa, a ye mala, moo te soto noo la ka a faa, ali la kuu jawu kewolu kamma la.”

⁵Yaawe ko: “Kibaaroo fo Yahuuda kono, i ye kankulaaroo ke Yerusalaamu kono, ka a fo moolu ye ko: ‘Ali binoo fee bankoo bee kaŋ!’ Sari santo ka a fo ì ye ko, ‘Ali beŋ ñoo kaŋ, ali ye bori ka taa saatee tatariŋolu kono.’

⁶Ali bandeeroo wulindi taamanseeroo ti ka Siyoni* waliŋ, ali ye bori ka tanka, ali kana loo, kaatu n ka maasiiboo le naati ka bo maraa karoo la, kasaara baa le mu.”

⁷Jatoo le wulita ka bo a la ñunkoo kono, banku tiñaalaa baa le wulita naŋ, a wulita ka bo naŋ a yaa, ka ali la bankoo kenseŋyandi. Ali la saatewolu be ke la tumbuŋolu le ti, moo te tu la sabatiriŋ jee.

⁸Wo kamma la ali booto funtoolu duŋ niikuyaa kamma, ali ye kumboo ka wuuri, kaatu Yaawe la kamfaa baa maŋ bo ǹ kaŋ.

⁹Yaawe ko, “Wo luŋo la, mansa niŋ a la maralilaalu be jikilateyi la le, piriisoolu* be jaakali la le, annabiyomoolu ye teekumu.”

¹⁰Wo to le nte Yeremiya ko, “Hee m Maarii Yaawe, tooñaa-tooñaa, ite ye ñiŋ moolu niŋ Yerusalaamu muumewo neenee le famfaŋ, ka a fo ko, ‘Ali be kayiroo soto la le,’ a ye a tara hawusaroo* be ǹ kaŋolu to!”

¹¹Wo luŋo le Yaawe be a fo la ñiŋ moolu niŋ Yerusalaamu ye ko, “Foño kandi jawoo le be fee la n na kanu moolu[7] kamma, ka bo keñewula* jaaroo kono. A te ke la fuufulee bondoo ti, waraŋ seneyandiroo.

¹²A foñoo be jawuyaa la wo ti le, meŋ be naa n na yaamaroo kaŋ. Saayiŋ nte le be n na kiitindiroo taamandi la ì kaŋ.”

¹³A juubee, jawoolu be naa kaŋ ne komeŋ saŋ tawaloolu, ì la keleraŋ sareetoolu* ka munta ko saafoñotoo, ì la suwoolu tariyaata ka tambi seeliŋolu la. Kooroo boyita ǹ kaŋ ne, ǹ kenseŋo tuta.

¹⁴Muna Yerusalaamu, i sondomoo seneyandi kuu jawoo to, fo i si kiisa. Janniŋ muŋ tuma le kuu kuruŋo be tu la sosoriŋ i kono?

¹⁵Kankulaari kaŋo moyi naŋ biriŋ Dani, kibaari jawoo ka bo Efurayimu* konkoriŋolu to.

¹⁶A fo banku koteŋolu moolu ye ko, “A fele jaŋ de!” Ali a kankulaa Yerusalaamu kamma ko: “Boyinkannaa kelediŋolu le bota naŋ banku jaŋ to, ì be kele wuuroo kumandi kaŋ Yahuuda saatewolu ma.

¹⁷Ì ye Yerusalaamu muruŋ-muruŋ ne ko kunku kantalaalu, bayiri a ye balaŋo tiliŋ nte le la.” Yaawe le ye a fo.

¹⁸“Ali taañaalu niŋ ali kekuwolu, wo le ye ñiŋ laa ali kaŋ, aduŋ a yankankatoo diminta le, a dunta ali la, hani fo ali jusoo to.”

¹⁹Hee, nte la niitooroo! Nte la niitooroo! M be wiriji kaŋ dimiŋo le kono. Hee, dimiŋo meŋ be nte jusoo to! N jusoo ka sawuŋ n kono jawuke le! N te tu noo la deyiriŋ. Ŋa binoo feekaŋo moyi le, kele wuuroo.

²⁰Kasaaroo be looriŋ ñoo nooma, bankoo bee burukata le ka kenseŋyaa. Kataba kiliŋ n na tiriliisoolu* kasaarata, n na suturadulaa keta wo ti, waati kiliŋ.

²¹Fo m be tu la kele bandeeroo le je la baŋ, ka tu binoo feekaŋo moyi la?

²²Yaawe ko, “N na moolu mu toolewolu le ti, ì maŋ nte loŋ. Ì mu dindiŋ hakilintaŋolu le ti, ì maŋ fahaamuroo ke. Ì kalanta kuu jawu kewo la le, bari ì maŋ kuu kende kewo noo.”

²³Ŋa duniyaa juubee le, a be kenseŋyaariŋ, sawura te a la, saŋ fatoolu fanaa, ì malafeŋolu bee yeemanta le.

²⁴Ŋa konko baalu juubee le, ŋa a je ì be jarajara kaŋ, konkoolu bee be jiijaa kaŋ.

²⁵Ŋa juubeeroo ke le, ŋa a je hadamadiŋ te jee, hani kunoolu bee yeemanta le.

²⁶Ŋa juubeeroo ke le, ŋa a je banku yiriwaariŋo keta keñewuloo* ti, a saatewolu bee burukata ka ke tumbuŋolu ti, Yaawe la kamfaa baa ì kamma.

²⁷Yaawe ye ñiŋ ne fo ko: “Bankoo bee be kenseŋyaa la le, bari n te a muumewo buruka la fereŋ.

²⁸Fo duniyaa si kumboo ñiŋ na, saŋ fatoolu ye fiŋ santo, bayiri ŋa a fo le, m pareeta a la le. N te sabari la, sako ka yelema.”

²⁹Suuborindilaalu niŋ kalabeñe fayilaalu maakaŋo naŋ, wo le be saatewolu bee moolu borindi la. Doolu be duŋ na sutu dibiŋolu le kono, doolu ye sele ka taa konko berehuwolu kono. Saatewolu bee be kenseŋyaa la le, moo te tara la sabatiriŋ jee.

³⁰Wo to ite kasaarariŋ bandiŋo, i ko ite ka muŋ ne ke teŋ, ka bayi ñiimaa duŋ, aniŋ ka sani ñaroolu duŋ? Muŋ ne ye a tinna i ka i ñaalu malamalandi tusunkaloo la? I ka i faŋ ñiiñandi kensenke le. I niŋ mennu be kanoo la, ì jututa i la le. Ì be i niyo le nooma.

³¹Ŋa musu le kumboo kaŋo moyi tiŋo to, a ŋuntaŋ kaŋo ka munta meŋ be a diŋ foloo wuluu kaŋ. Wo mu Dimmusuriŋ* Siyoni le ŋuntaŋ kaŋo ti, ka i niijii. A ye a buloolu wulindi le, a ka a fo ko, “Ayiwaalii nte! M be ketu kaŋ ne. N siyo dunta moofaalaalu le bulu.”