Read Mandinka Yeremiya 46 Bible Online

Yeremiya 46 - Mandinka bible

Yeremiya 46

¹Yaawe* la kumoo le mu ñiŋ ti, meŋ naata Annabilayi Yeremiya kaŋ banku koteŋolu la kuwo to.

²Foloo-foloo, Misira bankoo la kuwo to: Yahuuda mansakewo Yehoyakimu, Yosiya dinkewo la mansayaa sanji naaninjaŋo kono, ñiŋ ne keta kiilaariyaa kumoo ti Misira mansakewo Firawoona Neko la kelediŋolu ma. Babiloni mansakewo Nebukanesa ye itolu le noo keloo to Karikemisi, Yufurati Boloŋo daala. Yaawe ko:

³“Ŋa Misirankoolu sari kaŋo moyi le ko, ‘Koteerindiŋ, koteeri* baa, ali ì parendi, ali ye keloo waliŋ!

⁴Ali suwoolu siti keleraŋ sareetoolu* la, alitolu suukaŋ selelaalu, ali sele! Ali ali la kelenaafoolu duŋ ka ali la keledaalu muta! Ali ali la sooroolu daa diyaa, ali ye ali la kele duŋ feŋolu duŋ!’

⁵Ŋa muŋ ne je teŋ? Ì jikilateyita le, ì muruta ì koo la. Ì ye ì la kelejawaroolu noo le, ì borita tariyaake, ì buka hani kooma fele, kaatu maasiiboo le be karoo bee la.” Yaawe le ye a fo.

⁶“Boridulaa te tariŋolu ye, sako kelejawara si kana, maraa karoo la, Yufurati Boloŋo daala, ì takita jee le, ì boyita.

⁷“Jumaa le ka waame wuli naŋ teŋ ko Nayili Boloŋ baa, ko baalu mennu be woyi kaŋ?

⁸Misira le ka waame naŋ teŋ ko Nayili Boloŋ baa, ko baalu mennu be waame kaŋ. A ka a fo ko, ‘M be wuli la le ŋa duniyaa muuri, ŋa saatewolu kasaara, aniŋ ì moolu.’

⁹Acaa, suwoolu ye kirimbaasi! Keleraŋ sareetoolu ye saŋara bori! Kelejawaroolu ye taa ñaato: Kusi* aniŋ Puti kewolu, mennu ye ì la koteeroolu cafu, aniŋ Ludinkoolu[40] mennu kalanta kala fayoo la.

¹⁰Bari luŋo ñiŋ mu nte Yaawe Alihawaa Maariyo* la luŋo le ti, julujoo luŋo, ka n joo n jawoolu to. Hawusaroo* be faaroo ke la le fo a ye tiiña, a ye i miŋ ì yeloo la fo a ye ñeeli. Kaatu nte Yaawe Alihawaa Maariyo be faari sadaaboo le ke la, maraa kara bankoo kaŋ, Yufurati Boloŋo daala.

¹¹“Wo to taa Kileyadi ko! I ye moosibooroo ñini, ite Misira meŋ be ko dimmusuriŋ kataariŋo. I ye boori jamaa le maa kensenke, ì maŋ i jaara noo.

¹²Banku koteŋolu ye a moyi le malu kuwo meŋ laata i kaŋ, aduŋ i la wuuroo ye duniyaa bee beŋ ne. Kelejawara niŋ kelejawara seyinta ñoo la le, ì bee boyita ñoo la.”

¹³Yaawe la kumoo le mu ñiŋ ti, Yeremiya ye meŋ fo Babiloni mansakewo Nebukanesa la naa la kuwo to, ka Misira bankoo kele.

¹⁴“Ali a fo Misira bankoo kaŋ, ka a kankulaa Mikidoli saatewo kono jee, ka a kankulaa Memfisi, aniŋ Tapanesi. Ali a fo ko, ‘Misira, wuli i ye loo kuuke ka i paree keloo la, kaatu hawusaroo be kasaaroo naati la i kaŋ karoo bee le la.’

¹⁵Muŋ ne ye i la jalaŋo Apisi borindi? Muŋ ne ye a tinna i la wo tuuraa maŋ loo? Kaatu ko, Yaawe ye a busandi duuma le.

¹⁶I la kelediŋ jamaalu busandita le, ì ka a fo ñoo ye ko, ‘Wuli, ŋà seyi ǹ na moolu yaa suu, ǹ wuluu bankoo kaŋ, ŋà kana ǹ jawoolu la hawusaroo ma.’

¹⁷Ali Misira mansakewo Firawoona toolaa ñiŋ na: ‘Kibirilaa baa, meŋ na waatoo ye a daŋ.’ ”

¹⁸Mansoo ye ñiŋ ne fo ko: “A be koyiriŋ ñaameŋ ko nte be baluuriŋ ne, nte meŋ too mu Yaawe Alihawaa Maariyo ti, Tabori Konkoo ye buŋ konkoolu kono ñaameŋ, aniŋ Karimeli Konkoo be jimbandiŋ Baa Baa* kunto ñaameŋ, meŋ be naa ali kele la, a be ke la ali ye wo le ñaama.

¹⁹Ali ali la fudoolu parendi ka taa mutoo kono, alitolu Misirankoolu, kaatu Memfisi be kenseŋyandi la le, a ye tumbuŋ, moo te tara la siiriŋ jee.

²⁰“Misira mulunta ninsiriŋ ñiimaa le la, bari joloo le ye a boyinkaŋ maraa la naŋ.

²¹A la luwaasi kelediŋolu ka munta le ninsiriŋ nunkuriŋolu. A fele, ì bee borita ñoo la, ì maŋ loo ka keloo ke, kaatu ì jarabi luŋo le naata ì kaŋ, ì kuluu waatoo.

²²Misira ka kuma le ko niŋ saa be bori la ka taa, kaatu a jawoolu la kelediŋolu ka naa niŋ semboo le la. Ì niŋ teeraŋolu le ka naa a kamma, ì ka munta yiri boyilaalu.

²³Ì be a sutu teyi la le, a keta seeli teyibaloo ti ñaa-wo-ñaa, kaatu ì yaatewo tambita kuntiŋolu la le, daŋ te ì yaatewo la.

²⁴Misirankoolu be bula la malu kuwo kono le, a be duŋ na maraa kara maafaŋ banku moolu le bulu.” Yaawe le ye a fo.

²⁵Yaawe Alihawaa Maariyo, Banisirayila la Alla ye ñiŋ ne fo ko: “A juubee, m be Misirankoolu la jalaŋo Amoni kuluu la le, meŋ be Tebesi saatewo to, aniŋ ñinnu bee: Misira bankoo niŋ a jalaŋolu bee, aniŋ a maralilaalu, ka taa Firawoona, aniŋ mennu bee be jikiriŋ a la.

²⁶M be ì duŋ na moolu bulu le mennu be ì niyo ñiniŋ kaŋ. M be ì duŋ na Babiloni mansakewo Nebukanesa niŋ a la kelediŋolu le bulu. Bari wo koolaa moolu be naa sii la Misira bankoo kaŋ ne, ko a keta ñaameŋ koomanto.” Yaawe le ye a fo.

²⁷“Wo to ali kana sila, alitolu Yaakuba koomalankoolu,[41] n na dookuulaa, sako ka jikilateyi, ite Banisirayila. Kaatu ko, m be i kiisa la naŋ dulaa jamfariŋolu to le, ka i koomalankoolu bondi naŋ ì mutadulaa bankoo kaŋ. Yaakuba be muru la naŋ ne ka tenkuŋo niŋ tankoo soto, aduŋ moo te a silandi noo la.

²⁸Kana sila, ite Yaakuba koomoo, n na dookuulaa, kaatu m be ali fee le, ŋa wo bankoolu bee buruka le, ŋa ali janjandi mennu kaŋ taariŋ, bari n te alitolu buruka la. M be ali kuluu la le ko a ñanta ali to ñaameŋ, n te ali bula la muk, m maŋ ali kuluu.” Yaawe le ye a fo.