Read Mandinka Yeremiya 48 Bible Online

Yeremiya 48 - Mandinka bible

Yeremiya 48

¹Ñiŋ kiilaariyaa kumoo le fota Mowabi ma: Yaawe* Alihawaa Maariyo*, Banisirayila la Alla ye ñiŋ ne fo ko: “Kooroo be Nebo saatewo ye, kaatu a be tumbuŋ na le. Kiriyatayimu be bula la maloo kono le, ì ye jee saatewo muta, maloo ye laa a tatoo kaŋ ka a boyi.

²Daraja te Mowabi ye kotenke, ì ye kuu jawoo le feere a kamma Hesiboni ko: ‘Ali ŋà a la bankuyaa daŋ.’ Alitolu Madumeni saatee moolu fanaa be taa deyoo kono le yem. Hawusaroo* be naa ali kamma le.

³Kumboo kaŋo moyi baŋ, ka bo Horonayimu ko, ‘Fitinoo niŋ kasaara baa le keta!’

⁴“Mowabi tumbunta le, jee diŋolu wuurikaŋo moyi.

⁵Ì be kumboo kaŋ baake, ì seletoo siloo la ka taa Luhiti, ì niŋ niikuyaa niŋ kumboo, ì jiitoo siloo la ka taa Horonayimu.

⁶Ì ko, ‘Ali bori, ka ali niyolu kanandi, ali ye biti ko keñewulakono fitoo.’[42]

⁷Bayiri ali jikita ali la katoolu niŋ ali la naafuloolu le la, wo to ì be ali fanaa muta la le ka ali samba. Ì be ali la jalaŋo Kemosi samba la mutoo kono le, ka taa a la piriisoolu* niŋ a batubaalu.

⁸Tiñaarilaa kafoo be naa saatewolu bee le kamma jee, hani saatee kiliŋ te kana la, wulumbaŋo to be kasaara la le, konkotundi fanuŋo to ye buruka, ko nte Yaawe ye a fo ñaameŋ.

⁹Dampaŋolu sorondi Mowabi ye, kaatu a be tii la le ka taa yereŋ, a saatewolu be kenseŋyandi la le, moo te tara la siiriŋ jee.

¹⁰“Dankoo be moo ye meŋ naafata nte Yaawe la dookuwo ke la! Wo maarii be danka la le, meŋ ye a la hawusaroo bali yeleboŋo la a ye!

¹¹“Mowabi tarata tankoo doroŋ ne kono biriŋ a dindiŋ, ì nene maŋ a samba mutoo kono. Mowabi ka munta le ko, wayinoo* meŋ tuta looriŋ ka tenkeyaa, ì maŋ a yelema ka bo bata ka taa bata. A la timiyaa nene maŋ tiñaa, a la diyaa be a ñaama le doroŋ.

¹²“Wo kamma la, luŋolu be naa le, nte Yaawe le ye ñiŋ fo, tuma meŋ m be bata yelemalaalu kii la a kamma, ì ye a la batoolu yelema, ì ye ì kenseŋyandi, ka ì teyiŋ-teyiŋ.

¹³Wo to le Mowabinkoolu la jalaŋo Kemosi be ke la ì ye malu kuwo ti, ko Banisirayila la Beteli jalambatoo keta ì ye ñaameŋ, ì jikita nuŋ meŋ na.

¹⁴“Alitolu Mowabinkoolu, ali si a fo noo ali faŋ ye ñaadii le ko, ‘Ntolu mu kelejawaroolu le ti, aniŋ kelediŋ fatiŋolu’?

¹⁵“Mowabi bankoo niŋ a saatewolu be kasaara la le, a fondinkee kendoolu bee kanateyiriŋo ye i laa.” Mansoo le ye a fo, meŋ too mu Yaawe Alihawaa Maariyo ti.

¹⁶“Mowabi kasaara waatoo sutiyaata naŋ ne, a la maasiiboo niŋ tariyaa le ka naa.

¹⁷Ali kumboo a ye, alitolu mennu bee be a dandaŋo la, alitolu mennu ye a loŋ a too la. Ali a fo ko, ‘Ñiŋ mansayaa doko baa le katita teŋ, ñiŋ mansa doko ñiimaa!’

¹⁸“Alitolu Diboninkoolu, ali jii naŋ ali la dulaa horomariŋo to, ali ye sii buutoo kono, kaatu Mowabi bankoo kasaaralaa, wo le ka naa ali kamma, ka ali la tata bambandiŋolu kasaara.

¹⁹Alitolu Aroweri saatee moolu, ali taa loo sila daala baŋ. Ali keleborilaa kewolu niŋ musoolu kiliŋ-kiliŋ ñininkaa ko, ‘Muŋ ne keta?’

²⁰Ì be ali jaabi la le ko, ‘Mowabi bulata malu kuwo le kono, kaatu jee teyita le.’ Ali kumboo ka wuuri! Ali a kankulaa Arinoni Wulumbaŋo dandaŋo la taariŋ ko, ‘Ì ye Mowabi kenseŋyandi le!’

²¹“Kiitiyo laata konkotundoo ñiŋ saatewolu le kaŋ: Holoni, Yahasa, Mefaati,

²²Diboni, Nebo, Beti-Dibulatayimu,

²³Kiriyatayimu, Beti-Kamuli, Beti-Mewoni,

²⁴Keriyoti, aniŋ Bosira. Kiitiyo laata Mowabi saatewolu bee le kaŋ, dulaa jaŋ, dulaa sutuŋ.

²⁵Mowabi binoo katita le, a semboo tiñaata.” Yaawe le ye a fo.

²⁶A ko: “Mowabi ye a faŋ wara Yaawe le kaŋ. A mindi fo a ye siira, a si busandi a faŋo la foonoo kono, fo a si ke jelefeŋo ti.

²⁷Fo Banisirayila maŋ ke ite Mowabi ye jelefeŋo ti nuŋ? Fo ì ye a niŋ suŋolu le muta ñoo la baŋ, a ye a tinna i ka i kuŋo jiijaa, niŋ i be a la kumoo fo la daa-wo-daa?

²⁸Alitolu Mowabinkoolu, ali bo saatewolu to, ka taa sabati konko beroolu kono, ali ke ko puraalu, ka ñaŋolu ke konko faroolu daakuloo la.

²⁹“Ŋà Mowabi la faŋ waroo moyi le, a ye a faŋ wara baake ñaameŋ, ka a faŋ sikandi, a la faŋ waroo, a la konofaa, aniŋ a la sondome kufaŋo.

³⁰Nte ye a la horomantaŋyaa loŋ ne, bari a la kibiroolu te feŋ ti, a kekuwolu te feŋ ti.” Yaawe le ye a fo.

³¹“Wo to m be kumboo la Mowabi ye le, m be wuuri la Mowabi bee le ye, ŋa Kiri-Hareseti saatee moolu la kuwo woosii.

³²Ite Sibuma meŋ be ko wayini* yiroo, n kumboota ite le ye ka tambi Yaseri la. I ye i yiribuloolu fayi le ka taa baakoo, ì futata fo Yaseri baa to. Bari i la wayini yiridiŋolu aniŋ i la katiroo bee, tiñaarilaa le naata boyi wolu kaŋ.

³³Seewoo niŋ jusulaa, ŋa wo buusi le, ka bo Mowabi, yiriwaa banku. Ŋa wayinoo bali soto la wayini* yiridiŋ bitidulaa to le, moo buka ì doriŋ-doriŋ jee, seewoo niŋ wuuroo la. Wuuroo be keriŋ, bari a maŋ ke seewoo wuuri ti.

³⁴“Ì la wuuroo be kuma kaŋ santo le, ka bo Hesiboni ka taa fo Heleyale, hani fo Yahasi, ka bo Sowari ka taa fo Horonayimu, hani fo Ekilati Selisiya, kaatu hani Nimurimu woyoolu jaata le kos.

³⁵M be moolu baŋ na Mowabi bankoo kaŋ ne, moo-wo-moo ka sadaalu* bondi batudulaa tintiŋolu* to, ka cuuraayoo siisindi a la jalaŋo ye.” Yaawe le ye a fo.

³⁶“Wo to n kumboota Mowabi ye n sondomoo kono le ko ŋaliitoo, n kumboota Kiri-Hareseti moolu ye n sondomoo kono ko ŋaliitoo, kaatu ì la kafuŋ-kafuŋ naafuloo bee kasaarata le.

³⁷Ì bee ye ì kuŋo nunku le, ì ye ì booraa lii, ì ye ì buloolu bala bee nama, ì ye booto funtoolu duŋ ka ì la niikuyaa yitandi.

³⁸Mowabi buŋ santo teruriŋolu* bee kaŋ, aniŋ saatee bantabaalu to, feŋ te jee, niŋ a maŋ ke kumboo ti. Kaatu ŋa Mowabi teyi le, ko daandiŋ teyiriŋo, moo buka meŋ hati.” Yaawe le ye a fo.

³⁹“Ayiwaalii, Mowabi teyita! A kumboo kaŋo moyi baŋ! A maluta le, a muruta a koo la! Saayiŋ Mowabi keta jelefeŋo le ti, aniŋ kooroo bankoo, a dandanna bankoolu ye.”

⁴⁰Yaawe ye ñiŋ ne fo ko: “A juubee, jawoolu tariyaariŋo be tii la naŋ ne ko seeliŋo, ì ye ì dampaŋolu waree Mowabi kamma.

⁴¹Ì be saatewolu taa la le, ì ye tatoolu muta. Wo luŋo la, kijafaroo be Mowabi kelediŋ fatiŋolu muta la le, ko tiŋ ye musu maa.

⁴²Mowabi la bankuyaa be kasaara la le, kaatu a ye a faŋ wara nte Yaawe le kaŋ.

⁴³Alitolu Mowabinkoolu, kijafaroo, dinkoo, aniŋ kutindiŋo, wolu le be tara la ali ñaato.” Yaawe le ye a fo.

⁴⁴“Moo-wo-moo be bori kaŋ wo kijafaroo la, a si taa bula kaburu dinkoo kono, niŋ meŋ fintita naŋ wo dinkoo kono, kutindiŋo si a muta. M be ñiŋ kuwolu bee le laa la Mowabi kaŋ, niŋ ì jarabi saŋo siita.” Yaawe le ye a fo.

⁴⁵“Wo keleborilaalu koririŋo, ì taata loo Hesiboni dubeŋo le to, kaatu dimbaa le malata Hesiboni, a hilihilita naŋ Sihoni la buŋo le kono, jee mansa kotoo. A ye Mowabi fondaa jani le, wo fitina moolu kuŋ miraŋo.

⁴⁶Kooroo be ite Mowabi ye le! Jalaŋ Kemosi la moolu kasaarata, kaatu ali dinkewolu taata mutoo kono le, ì ye ali dimmusoolu fanaa samba mutoo kono.

⁴⁷“Hani wo, m be Mowabi murundi la firiŋo kono le, ñaato siniŋ.” Yaawe le ye a fo. Kiitindiroo meŋ ñanta laa la Mowabi bankoo kaŋ, a kumoo danta jaŋ ne.