Read Mandinka Yeremiya 49 Bible Online

Yeremiya 49 - Mandinka bible

Yeremiya 49

¹Ñiŋ kiilaariyaa kumoo le fota Ammoninkoolu ma: Yaawe* ye ñiŋ ne fo ko: “Fo diŋ te Banisirayila baŋ? Fo keetaalaa te a la baŋ? Wo to muŋ ne ye a tinna Moleki[43] jalaŋo ye Kadu tundoo taa, a la moolu siita a saatewolu to?

²Wo kamma la, luŋolu be naa le, nte Yaawe le ye a fo, tuma meŋ m be kele wuuroo maamandi la Raba kamma, Ammoninkoolu la saatee baa. A be ke la tumbuŋ tuŋo le ti, ì ye dimbaa duŋ a saateeriŋolu la. Wo to le Banisirayila be moolu la banku kenoolu taa la, mennu ye a la bankoo taa.” Yaawe le ye a fo.

³“Ite Hesiboni saatewo, wuuri, kaatu Ayi keta tumbuŋo le ti! Alitolu Raba musoolu, ali kumboo! Ali booto funtoolu duŋ ka ali la niikuyaa yitandi, ali ye saŋakumboo ke ka boriŋ-boriŋ, ka i maabo fitoolu koto, kaatu ali la jalaŋo Moleki be taa mutoo kono le, a niŋ a la piriisoolu* niŋ a batubaalu.

⁴Muŋ ne ka i kibirindi i la wulumbaŋolu la, i la wulumbaŋ yiriwaariŋolu, ite diŋ muritiriŋo meŋ jikita i la naafuloo la, ka a fo ko, ‘Jumaa le si naa nte kele?’

⁵M be kijafaroo le naati la i kaŋ, ka bo i dandanna bankoolu bee kaŋ. Ì be ali bayi la le, ali ye ali kuŋo loo taariŋ, moo te soto la ka borilaalu kafu ñoo ma. Yaawe Alihawaa Maariyo* le ye a fo.

⁶“Bari wo bee koolaa, m be naa Ammoninkoolu murundi la firiŋo kono le.” Yaawe le ye a fo.

⁷Ñiŋ kiilaariyaa kumoo le fota Edomu ma: Yaawe Alihawaa Maariyo ye ñiŋ ne fo ko: “Fo moo ñaamendiŋ maŋ tu Temani baŋ? Fo ñaameŋo yaamaroo kasaarata ì kono le baŋ? Fo ì la ñaameŋo yeemanta le baŋ?

⁸Alitolu Dedaninkoolu, ali bori de, ali ye muru ali koo la, ka maabo berehuwolu kono, kaatu n ka naa maasiiboo le boyi Esawu koomoo kaŋ, tuma meŋ m be ì jarabi la.

⁹Niŋ wayini* yiridiŋ katilaalu le naata ali kamma, fo ì te karantaa tu la ali bala baŋ, waraŋ niŋ suuto suŋolu le mu, fo meŋ kaañanta ì fee, ì te wo doroŋ ne suuñaa la baŋ?

¹⁰Bari nte ŋa Esawu koomoo wura le fefes, ŋa a maabodulaa waañaari, a te i maabo noo la. A diŋolu, a baadiŋolu, a siiñoolu bee le kasaarata, Edomu te keriŋ kotenke.

¹¹Bari ali ali la aliyatiimoolu wo tu m bulu, ŋa ì la baluwo kanta, ali la furuyaamusoolu ye ì jikoo loo nte kaŋ.”

¹²Yaawe ye ñiŋ ne fo ko: “Ŋa wo moolu mindi n na kamfaa mindaŋ faa la le, a maŋ jari ka mennu mindi a la. Wo to a be koyiriŋ ne ko, m be alitolu fanaa mindi la a la le. Ali te kana la jarabiroo ma, fo ali si n na kamfaa mindaŋo miŋ.

¹³N kalita m faŋo la le ko: Bosira la kuwo be ke la kijafara kuwo le ti, a ye ke jutunna feŋo ti, ka kenseŋyaa, aniŋ ka ke dankoo ti. Aduŋ a dandanna saatewolu bee be ke la tumbuŋolu le ti fo fawu.” Yaawe le ye a fo.

¹⁴Ŋa Yaawe la kiilaariyaa kumoo moyi le, kiilaa kiita bankoolu kaŋ ko: “Ali kafu ñoo ma ka taa Edomu kele, ali ye wuli a kamma keloo la!”

¹⁵Yaawe ye a bankee le ko: “M be i ke la bankundiŋ ne ti bankoolu bee kono, ka moolu jutundi i la. I la kuwo silaŋo ka tara moolu la, wo le ye i neenee, aniŋ i la sondome kufaŋo, ite meŋ yaalu be bere konko jaŋolu kaŋ santo, i ye konko jaŋolu kaŋ ke i yaa ti. Hani niŋ i ye i yaa loo santo le ko seeliŋo, n si i saba naŋ jee duuma.” A ko:

¹⁷“Edomu be ke la kijabo kuwo le ti, moo-wo-moo tambita jee la a kijoo si bo, a ye ciipuroo ke, ñiŋ kamma kasaara kuwolu mennu keta a la.

¹⁸A be ke la le ko Sodomu niŋ Komora, aniŋ ì dandanna saatewolu kasaarata ñaameŋ. Moo te sabati la Edomu kotenke, hani moo te sii la jee fereŋ.

¹⁹“Ko niŋ jatoo bota naŋ ñunkoo kono, Yoridani sutoo kono, ka naa boyinkaŋo la, Edomu beeyaŋ daañini dulaalu to, m be a moolu bayi la a bankoo kaŋ wo le ñaama, kataba kiliŋ. Ŋa moo-wo-moo tomboŋ, wo le be a mara la. Jumaa le niŋ nte si tembe noo, ka i loo m fee? Ñaatonka jumaa le si loo noo n ñaato?

²⁰Wo to ali lamoyiri ke, nte Yaawe ye meŋ feere Edomu kamma, aniŋ ŋa meŋ nata Temaninkoolu kamma. Ì be ì bayi la le ko saajii koorewo, hani dindiŋolu niŋ moo koririŋolu.

²¹Ì busandikaŋo be bankoo jarajarandi la le, ì wuurikaŋo ye moyi hani Kulunjumbe Baa to.

²²A juubee, jawoo le tariyaariŋo be tii la naŋ ko sontiŋo, a ye a dampaŋolu waree Bosira kamma. Wo luŋo la, Edomu kelediŋ fatiŋolu kijoo be ì fara la le, ko tiŋ ye musu maa.”

²³Ñiŋ kiilaariyaa kumoo le fota Damasiku ma: “Hamati niŋ Aripadi saatewolu jikilateyita le, kaatu ì ye kibaari jawoolu le moyi. Ì kijoo teyita le, ì dunta ñoo to ko baa waameriŋo, meŋ buka tenkuŋ noo.

²⁴Damasiku sembentaŋyaata le, a muruta a koo la ka bori, kijafaroo ye a muta, niikuyaa niŋ dimiŋo dunta a la, ko tiŋ ye musu maa.

²⁵Ì ye saatee too boriŋo le muta teŋ, niiseewoo saatee!

²⁶A fondinkewolu be faa la a mbeedoolu kaŋ ne, a kelediŋolu bee ye kasaara wo luŋ.” Yaawe Alihawaa Maariyo le ye a fo.

²⁷“M be dimbaa duŋ na Damasiku tata sansaŋo la le, a ye Beni-Hadadi la tatoolu domo.”

²⁸Ñiŋ kiilaariyaa kumoo le fota Kedari aniŋ Hasori[44] mansamarali bankoolu ma, Babiloni mansakewo Nebukanesa ye mennu kele: Yaawe ye ñiŋ ne fo ko: “Wuli, i ye taa Kedari kele! Wo tilibo maafankoolu kasaara!

²⁹Ì la tiriliisoolu* niŋ ì la beeyaŋolu si buusi ì la, ì la tiriliisi ridoolu niŋ ì la sotofeŋolu bee. Ì la ñonkomoolu si buusi ì la, moolu kali wuuri ì ma ko, ‘Maasiiboo be ali ye karoo bee la!’

³⁰“Alitolu Hasori moolu, ali bori dulaa jaŋ, ka taa maabo koloolu kono! Kaatu Babiloni mansakewo Nebukanesa ye feeroo le siti ali kamma, a ye kuu le siti ali kamma.” Yaawe le ye a fo.

³¹A ko: “Ali wuli, ali ye ñiŋ banku tenkundiŋo kele, meŋ be tankoo kono, a maŋ daa tawundaŋ soto, sako nee bantambili, a be siiriŋ wo ñaama, a dammaa.” Yaawe le ye a fo.

³²“Ì la ñonkomoolu si ke ñapinkaŋ feŋo ti, ì la beeyaŋolu ye ke buusi feŋo ti. M be ì janjandi la foñoo kono le taariŋ, wo moolu mennu ka ì kuŋ dandaŋolu mesu. M be maasiiboo naati la ì kaŋ ne, ka bo ì ye karoo bee la.” Yaawe le ye a fo.

³³“Hasori be ke la kunkuwuloolu la daakaa le ti, ka kenseŋyaa fo fawu. Moo te sabati la jee, moo te sii la jee fereŋ.”

³⁴Yahuuda mansakewo Sedekiya la mansayaa dati waatoo kono le, Yaawe la kumoo naata Annabilayi Yeremiya kaŋ, Elamu bankoo la kuwo to.

³⁵Yaawe Alihawaa Maariyo ye ñiŋ ne fo ko: “A juubee, m be Elamu bankoo la kalabeñoolu kati la le, ì jikiraŋ sembe baa.

³⁶M be jawoolu foñomaa le naati la Elamu kaŋ, ka bo naŋ duniyaa tonkoŋ naanoo la. M be ì janjandi la niŋ wo foñoo le la, aduŋ banku te tara la jee, Elamu mutamoolu te taa daameŋ.

³⁷M be Elamunkoolu kijafarandi la ì jawoolu ye le, mennu be ì niyo ñiniŋ kaŋ. M be maasiiboo naati la ì kaŋ ne, ka bo niŋ n na kamfaa baa la. M be hawusaroo* bulandi la ì nooma le fo ŋa ì baŋ.” Yaawe le ye a fo.

³⁸“M be n na mansasiiraŋo loo la Elamu kono le, ŋa a mansoolu niŋ maralilaalu kasaara.

³⁹Bari ñaato siniŋ, m be Elamu murundi la firiŋo kono le.” Yaawe le ye a fo.