Read Mandinka Niikuyaa Suukuwolu 3 Bible Online

Niikuyaa Suukuwolu 3 - Mandinka bible

Niikuyaa Suukuwolu 3

¹Ayiwaalii! Nte le ye bataa je, Alla la kamfaa busoo laata n kaŋ ne.

²A ye m bayindi le taariŋ, ka n dundi diboo kono, mala te daameŋ fereŋ.

³A buloo laata n kaŋ ne famfaŋ, a tuta m busa la doroŋ.

⁴Busaroo ye m balasuboo jandi le, a ye m balafuuraa fasandi jat, a ye n kuloolu teyiŋ-teyiŋ.

⁵Bataa koleŋo niŋ mantooroo, a ye n dundi wo le kono ka n suki.

⁶Badaa-badaa diboo, a ye m bulandi wo le kono, ko mennu meeta fureeduu.

⁷Ceeni joloo, a ye n siti wo le la, a ye n suki le fo n kana kana noo.

⁸Cari-cari, ñaajiyo ka boŋ n ye le ka maakoyiroo kumboo, bari a ka balaŋ n na duwaa muta la le.

⁹Caawutoo, n keta wo le ti, a ye n na siloolu dundi ñoo to, a ye n taaraŋ siloo suki bere kutukatoolu le la.

¹⁰Daafeŋ saŋarariŋo*, a bitita n ye wo le ti, ko niŋ jatoo bitita, waraŋ soloo.

¹¹Daalaata n na! A ye n cansu n na siloo kaŋ, a ye m fatafata ka n kenseŋo tu jee.

¹²Dannoo ka feŋo sumaŋ ñaameŋ, a ye a la kaloo saba n kamma wo le ñaama.

¹³Ee nte! A ye a la kalabeñoolu buusi ì laa kono le, a ye ì suuri n jusoo kono.

¹⁴Ee nte wo! N keta moolu bee ye jelefeŋo le ti, ì ka n ke ì la teelindiri denkiloo ti waati-wo-waati.

¹⁵Ee nte! A ye n na baluwo kuniyandi le harak, a ye a kuniyandi le ko jalafatoo.

¹⁶Foriseetoo bere ñimoo, a ye wo le laa n kaŋ, a ye m bidibidindi seebuutoo kono.

¹⁷Fereŋ-fereŋ, i ye n niyo bali kayiroo la fereŋ, fo n ñinata ko seewoo faŋo sotota le.

¹⁸Fo n ko m faŋo ye ko, “N siyo banta le, n jikoo Yaawe* kaŋ banta le.”

¹⁹Hee! N na yamali-yamaloo kuwolu miiroo, aniŋ n na mantooroo, n na baluwo kuniyaata le ko jalafatoo.

²⁰N ka tu a miira la le doroŋ, n niyo be toorariŋ n kono.

²¹Hani wo de, n hakiloo naata muru Yaawe kaŋ, ŋa jikoo soto ko:

²²Yaawe la kanu bambaloo nene maŋ kuntu ǹ ye, a la konotodiyaa kuwolu nene buka baŋ.

²³Ì ka kutayaa le fanikee-wo-fanikee. A ka tu tilindiŋ ǹ ye le doroŋ.

²⁴N niyo faŋo ko, “Yaawe, ŋa ite dammaa le soto, wo to m be n jikoo loo la i kaŋ ne.”

²⁵Yaawe beteyaata moo le fee meŋ ye i tuuku a la, aniŋ nii-wo-nii meŋ ka a ñini.

²⁶Ka Yaawe batu tenkuŋo kono, a beteyaata moo ye le, a la kiisandiroo kamma.

²⁷Ka muñoo yookoo* taa fondinkeeyaa waatoo kono, wo beteyaata moo ye le.

²⁸Koronto te jee, a maarii ye sii tek, niŋ Yaawe le ye a laa a kaŋ.

²⁹Hani a daa si bankoo maa, bari jikoo si tara a ye hani ka bii.

³⁰Kasi nte, a si a tamoo laa tulubusalaa ye, ì ye nendiroolu feenee a kaŋ.

³¹Lanna kuu le mu ko, Maariyo te wo ke la, ka a koo dii fo abadaa.

³²Laa ko, a si niikuyaa saabu ñaa-wo-ñaa, a be balafaa yitandi la le a la kanu bambaloo la waroo kaŋ.

³³Lafoo buka tara Maariyo sondomoo kono, ka moo mantoora, waraŋ ka hadamadiŋo niyo kuyandi.

³⁴Muna fo Maariyo ñaa si tara ñiŋ na baŋ, ka mutamoolu bee doriŋ-doriŋ,

³⁵moo bolooriŋo, ka a bali a la boloo la, Alla Mansa Tallaa ñaatiliŋo la?

³⁶Moo la tooñaa, niŋ ì ye a nakari, Maariyo ka a loŋ ne.

³⁷Niŋ a maŋ ke Maariyo la keroo ti, jumaa le si kumakaŋo dii, a ye ke?

³⁸Niŋ kasaaroo waraŋ kuu kendoo naata, fo Alla Mansa Tallaa le maŋ a lañini baŋ?

³⁹Niŋ i maŋ faa fo i be baluwo to, i be muŋ ne woosii la i la junuboo kuluuroo la?

⁴⁰Ñiŋ ne ñanta ǹ na, ka ǹ taaraŋ siloolu kisikisi, ka ì kotobo, ŋà tuubiseyi Yaawe ma.

⁴¹Ŋà m̀ buloolu wulindi santo Alla ye, meŋ be saŋo santo, ka duwaa ǹ sondomoo bee la, ka a fo ko:

⁴²“M̀ balanta i ma le, ŋà junuboo ke, aduŋ i maŋ yamfa m̀ ma.

⁴³“Ŋà a je le i ye i faŋ muuri kamfaa la, ka m̀ bayindi, ka m̀ faa laalaa, balafaa te jee.

⁴⁴Ŋà a je le i dibita m̀ ma karoo bee la ko tawaloo, fo ǹ na duwaa te futa noo la i ma.

⁴⁵Ŋà a je le ko, i ye ǹ ke suntukunto feŋo le ti, feŋ fayiriŋo, duniyaa moolu kono.

⁴⁶“Oyi! Oyi! Ǹ jawoolu bee ka wo le fo m̀ ma, ka ì daa loo ǹ kaŋ.

⁴⁷Hee ntolu! Kijafaroo niŋ kasaaroo le boyita ǹ kaŋ, m̀ bulata dewuŋ dinkoo le kono.”

⁴⁸Hee nte! N ñaajiyo ka woyi le ko baajiyo, n na moolu la kasaaroo kamma la.

⁴⁹Pasi, n te pasi la ka ñaajiyo woyi, dahaa te tara la n ñaa ye.

⁵⁰Pasi te jee, fo niŋ Yaawe ye ǹ juubee naŋ santo, a ye a je m̀ be meŋ kono.

⁵¹Ŋa kuu je, a ye n niyo toora le, n na saatee musoolu la kuwo kamma.

⁵²Mennu keta n jawoolu ti daliila te a la, ì ye n deema le ko kunoo.

⁵³Ì ye n kende fayi dinkoo le kono, ì ye beroolu joloŋ n kaŋ.

⁵⁴Rawu! Jiyo ye buloo kosi n kunto, n ko m faŋ ma ko, “N tuta!”

⁵⁵Silaŋo kono, Yaawe, ŋa i too kili le ka bo dinkoo kono.

⁵⁶Saayiŋ i ye n na duwaa moyi le, biriŋ n ko, “N deemaa, kana i tuloo faa m ma!”

⁵⁷Silaŋ, i sutiyaata n na le, biriŋ ŋa i kili, i ko n ye le ko, “Kana sila!”

⁵⁸Tooñaa, i ye n niyo kiisandi le. Hee Maariyo, i ye nte la kuwo dunoo taa le.

⁵⁹Tooñaa, i ye a je le n jawoolu ye n ŋayibe ñaameŋ, kiitiyo kuntu ǹ teema!

⁶⁰Tooñaa, i ye ì la kuu jawoolu bee je le, ì ye feeroolu mennu siti n kamma.

⁶¹Wo nendiroolu moyi ì la baŋ, aniŋ ì la feeroolu bee n kamma.

⁶²Woyi nte! Tiloo bee, n jawoolu daa be n kaŋ doroŋ, n na kuwo be ì kono.

⁶³Wo juubee de, ì be kuu-wo-kuu kunna, nte le mu ì la teelindiri denkiloo ti.

⁶⁴Yaawe, i si juloo joo ì to ka bo niŋ ì la baaroolu la.

⁶⁵Yaawe, ì sondomoolu suki, i la dankoo ye tara ì kaŋ.

⁶⁶Yaawe, i niŋ kamfaa ye ì bayindi, i ye ì kasaara sankuloo koto.