Read Mandinka Niikuyaa Suukuwolu 5 Bible Online

Niikuyaa Suukuwolu 5 - Mandinka bible

Niikuyaa Suukuwolu 5

¹Hee Yaawe*, i hakiloo ye bula meŋ laata ǹ kaŋ, ǹ na malu daa juubee.

²Ǹ na keetaabankoo dunta luntaŋolu le bulu, ǹ na suwolu, bantala moolu bulu.

³Ǹ keta aliyatiimoolu ti, faantaŋolu, m̀ baañolu keta furuyaamusoolu ti.

⁴Ka jiyo miŋ, fo ǹ si kodoo joo, hani loo, ǹ ka a saŋ ne.

⁵Yookoo* le ka tara ǹ toŋo kaŋ taariŋ. M̀ be bataariŋ ne de! M̀ maŋ dahaa soto.

⁶Ŋà m̀ buloo laa Misira le ye, aniŋ Asiriya, ka domoroo soto.

⁷Ǹ na alifaa foloolu ye junuboo ke, ì te keriŋ kotenke, silaŋ ntolu le ye ì la kuu kuruŋolu dunoo taa.

⁸Joŋolu le marata ǹ na, moo maŋ soto ka ǹ tankandi ì bulu.

⁹Ǹ ka ǹ niyolu le laa ka domoroo soto, kaatu hawusaritiyolu* ye wuloo balaŋ ne.

¹⁰Konkoo ka ǹ kirikirindi le, m̀ baloo ka kandi ko fuuroo.

¹¹Ì ye Siyoni* musoolu ñapinkaŋ ne, aniŋ sunkutoolu, Yahuuda saatewolu kono.

¹²Ì maŋ buuñaa dii alifaalu la, ì ye maralilaalu deŋ ì buloolu la.

¹³Ì ye fondinkewolu diyaakuyaa bula tuuroo la, kambaanendiŋolu ka timili-tamali loositoolu koto.

¹⁴Keebaalu ye saatee dundaŋ daato beŋo bula, fondinkewolu la kumafeŋ kosoo danta.

¹⁵Ǹ sondomoolu la seewoo danta le, ǹ na doŋo yelemata ǹ ye saŋakumboo ti.

¹⁶Ñaroo jolonta le ka bo ǹ kuŋo to, kooroo boyita ǹ kaŋ, kaatu ŋà junuboo le ke.

¹⁷Ǹ sondomoolu faŋo kono, ǹ jikilateyita le, ñiŋ kuwolu kamma, kumboo ye ǹ ñaalu dibindi.

¹⁸A juubee, Siyoni Konkoo kenseŋo le tuta looriŋ, kunkuwuloolu be yaayi la a kaŋ.

¹⁹Bari ite Yaawe be tu la maraloo la le, i la mansasiiraŋo le be tu la jamaani naalaalu bee la.

²⁰Muŋ ne ye i ñinandi ntolu la ñiŋ saŋolu bee la, muŋ ne ye a tinna ì ye i koo dii ǹ na fo waati jaŋ?

²¹Yaawe, dukaree, m̀ murundi i faŋ kaŋ, fo ǹ si muru naŋ, i ye ǹ na baluwo kutayandi ko koomanto.

²²Fo duŋ, i ye i koo dii ǹ na le fereŋ, fo i la kamfaa maŋ dandulaa soto baŋ?