Read Mandinka Esekiyeli 15 Bible Online

Esekiyeli 15 - Mandinka bible

Esekiyeli 15

¹Bituŋ Yaawe* la kumoo naata n kaŋ ko:

²“Ite hadamadiŋo, fo wayini* yiribulu jaaroo kummaayaata yiri doolu ti le baŋ? Fo a buloolu fisiyaata yiribulu doolu ti le baŋ?

³Fo moo si wo bulu jaaroolu dadaa noo feŋ ti le baŋ? Moo buka a ke, hani feŋ dendaŋo ti faŋ.

⁴A maŋ nafaa-wo-nafaa soto, fo ka a ke dimbaa malaraŋo ti doroŋ. Niŋ dimbaa ye a buloo neŋolu muta, a bee si hilihili fo teema, a ye fiŋ. Fo wo ye nafaa soto le baŋ?

⁵A juubee, a maŋ nafaa soto janniŋ a ka ke dimbaa malaraŋo ti, sako niŋ dimbaa ye a bee jani, fo a banta. Fo wo be ke noo la feŋ ne ti baŋ?”

⁶Wo kamma la, Maarii Yaawe ye ñiŋ ne fo ko: “Ko wayini yiribuloo be ñaameŋ, ì ka meŋ ke dimbaa malaraŋo ti, m be Yerusalaamunkoolu fanaa ke la dimbaa kono wo le ñaama.

⁷M be n koo dii la ì la le. Aduŋ hani niŋ ì kanata dimbaa foloo maasiiboo ma, fulanjaŋo meŋ be naa, wo te ì kaari la. Niŋ ñiŋ keta, ì be a loŋ na le ko, nte le mu Yaawe ti, meŋ ye a koo dii ì la.

⁸M be wo bankoo ke la tumbuŋo le ti, baawo jee moolu foroyaabaliyaata m ma le.” Maarii Yaawe le ye a fo.