Read Mandinka Esekiyeli 32 Bible Online

Esekiyeli 32 - Mandinka bible

Esekiyeli 32

¹Sanji taŋ niŋ fulanjaŋo kari taŋ niŋ fulanjaŋo tili foloo la le, Yaawe* la kumoo naata n kaŋ ko:

²Ite hadamadiŋo, niikuyaa kumoo fo Misira mansakewo Firawoona ye ko: “Ite ye i faŋ ke jatoo le ti duniyaa bankoolu bee kono, bari i ka muluŋ ne ko bamba baa meŋ be baa kono. I ka punsaŋ i la baa kono ka jiyo bee duundi niŋ i siŋo la.”

³Maarii Yaawe ye ñiŋ ne fo ko: “M be n na kuruntu jaloo fayi la i kaŋ ne, ŋa i muta, kafu baa ye i saba naŋ tintoo la

⁴ka i selendi naŋ tintoo kaŋ, aniŋ ŋa i fayi lewo kono. M be a ke la le, kunoolu ye loo i kaŋ, aniŋ wulakono daafeŋolu mennu bee be duniyaa kono, ì ye i domo fo ì konoo ye faa tep.

⁵M be i suboo fayi la le ka janjaŋ konkoolu kaŋ santo, ŋa wulumbaŋolu fandi niŋ i suboo la.

⁶I yeloo be woyi la le ka bankoo bee sinandi. Fo ka taa konkoolu to, jiibori siloolu bee ye faa i yeloo la.

⁷Niŋ ŋa i fintindi naŋ banta, m be saŋ fatoo bee muuri la le, looloolu bee ye dibi, ŋa tiloo muuri niŋ minaayoolu la, aduŋ karoo te mala la.

⁸Feŋ-wo-feŋ meŋ ka mala saŋo santo, m be a bee dibindi la le, ŋa dibi fiŋ baa dundi i la bankoo kaŋ.” Maarii Yaawe le ye a fo.

⁹Yaawe ko: “Niŋ ŋa i la kasaaroo kibaaroo janjaŋ duniyaa kono, a be moo jamaa le niyo toorandi la. A kibaaroo be taa bankoolu le kaŋ i nene maŋ mennu faŋo la kuwo moyi.

¹⁰Niŋ ŋa n na hawusaroo* finjaŋ moolu ñaalu koto, m be ì bee le jaakalindi la i la kuwo la, aduŋ silaŋ baa be duŋ na ì la mansoolu la. Silaŋo be ì futufaa la le, moo bee le be ì kunkedulaa ñini la luŋo meŋ na i be boyi la duuma.”

¹¹Maarii Yaawe ye ñiŋ ne fo ko: “Babiloni mansa la kelejooraŋo le be naa i kaŋ.

¹²M be a ke la le fo kelejawaroolu ye moo jamaa faa ali kono niŋ ì la kelejooraŋolu la. Ñiŋ kelejawaroolu le jawuyaata duniyaa kono kelejawaroolu bee ti. Ì be Misirankoolu la kibiroo ke la ì ye kenseŋ ne ti, aduŋ ì la moo jamaa le be kasaara la.

¹³M be ì la beeyaŋolu mennu be woyoo daala, bee kasaara la le, i si a je, hani moolu waraŋ beeyaŋ worosoolu te wo jiyo duundi la kotenke.

¹⁴Wo to le m be ì la baajiyo seneyandi la aniŋ n si a ke, fo ì la jiyo si bori ko tuloo.” Maarii Yaawe le ye a fo.

¹⁵Yaawe ko: “Niŋ ŋa Misira bankoo kenseŋyandi, aniŋ ŋa a konokono feŋolu niŋ a siilaalu bee faa, niŋ ŋa bankoo tumbuŋ waati meŋ na, wo to le, ì be a loŋ na ko, nte le mu Yaawe ti.

¹⁶“Ñiŋ niikuyaa kumoo ñanta fo la le. Duniyaa musoolu be a fo la Misira bankoo siilaalu bee le kunna. Ì be ñiŋ niikuyaa kumoo le fo la.” Maarii Yaawe le ye a fo.

¹⁷Sanji taŋ niŋ fulanjaŋo kari foloo tili luulunjaŋo la le, Yaawe la kumoo naata n kaŋ ko:

¹⁸“Hadamadiŋo, kumboo i ye lemba Misira jamaa moolu kunna. Kaatu ì niŋ wo moolu mennu bota banku sembemaa baalu to be faa la ñoo la le ka taa laakira, kaburoo kono duuma.

¹⁹A fo ì ye ko, ‘Fo alitolu le fisiyaata moo doolu ti baŋ? Ali taa, ali niŋ wo Alla lombaloolu ye tara laariŋ dulaa kiliŋ.’

²⁰“Misirankoolu fanaa be tara la wo moolu kono le mennu be faa la keloo to. Misira jamaa moolu be faa la keloo le to. Ì be ì bee samba la le.

²¹Wo to le, kelejawaroolu mennu be ì la kaburoo kono, be a fo la Firawoona niŋ a maakoyibaalu ye ko, ‘Ali naata kaburoo kono jaŋ ne ka kafu wo Alla lombaloolu ma, mennu faata keloo kono.’

²²“Asiriya be jee le, a niŋ a la kelediŋ kafoo la kaburoolu be a dandaŋo bee la, mennu faata a fee keloo kono.

²³Ì la kaburoolu be dinka jaŋ baa kono duuma le. Asiriya kelediŋolu la kaburoolu le be a dandaŋo la. Itolu le ye silaŋo dundi nuŋ moolu la, bankoo kaŋ moo baluuriŋolu be daameŋ.

²⁴“Elamu be jee le, aduŋ a la jamaa moolu la kaburoolu bee be a dandaŋo la, mennu faata a fee keloo kono. Wolu le ye silaŋo dundi nuŋ bankoo kaŋ, baluuriŋolu be daameŋ to, ì Alla lombalimaalu le taata ñoo la Jahannaba kono duuma, ka ì la maloo dunoo taa.

²⁵Ì ye laadulaa dadaa a ye, wo moolu le kono mennu faata a fee, aduŋ ì la kaburoolu be a dandaŋolu la le. Itolu bee mu Alla lombaloolu le ti mennu faata keloo kono. Ì silaŋñaa janjanta wo bankoo kaŋ ne, baluuriŋolu be daameŋ to, aduŋ ì ye ì la wo maloo dunoo taa le, ì niŋ wo moolu bee le taata ñoo la kaburoo kono duuma.

²⁶“Meseki niŋ Tubali niŋ ì la jamaa moolu fanaa be jee le to. Ì niŋ ì la kaburoolu be ì dandaŋolu la. Ì bee mu Alla lombaloolu le ti, mennu faata keloo kono. Itolu le ye ì la kuwo silaŋñaa janjandi wo bankoo kaŋ, moo baluuriŋolu be daameŋ to.

²⁷Ì maŋ ì baadee ko ì ka kelejawaroolu baadee ñaameŋ buuñaa kono. Ì niŋ kelejawaroolu mennu maŋ Alla loŋ ne be laariŋ dulaa kiliŋ laakira, ì niŋ ì la kelejooraŋolu le be kaburoo kono. Ì ye ì la hawusaroolu ke ì ye kullaaraŋo le ti, aduŋ ì la kuu jawoolu le tooroo be laariŋ ì kuloolu kaŋ, hani a ye a tara ñiŋ kelejawaroolu la silaŋo dunta wo bankoo kaŋ, baluuriŋolu be daameŋ.

²⁸Wo kamma la, ite Firawoona be faa la le, i ye taa i laa Alla lombaloolu be daameŋ to, i niŋ wo moolu mennu faata i fee keloo kono.

²⁹“Edomu be jee le, a niŋ a la mansoolu niŋ a la mansariŋolu bee mennu niŋ ì la kelejawaroolu bee be wo moolu kono, mennu faata keloo to, ì niŋ Alla lombaloolu ye tara laariŋ dulaa kiliŋ kaburoo kono duuma jee.

³⁰Mansariŋolu mennu bota maraa kara maafaŋo fanaa la be jee le, ì muumee bee, ì niŋ Sidoninkoolu mennu bee faata, ì taata kaburoo kono duuma, ì niŋ maloo. Kaatu ì ye silaŋo le dundi moolu la, ì semboo la waroo kamma. Ì be laariŋ Alla lombaloolu le kono, mennu faata keloo kono, ì niŋ ì ye ì la maloo dunoo taa ñoo la kaburoo kono duuma jee.

³¹“Niŋ Firawoona futata laakira tuma meŋ na, a ye ñiŋ moolu bee je, ate niŋ a la kelediŋ kafoolu bee la faa keloo to te a niyo toora la kotenke, a be a fo la le ko, ‘Yaarafaŋ, ntolu dammaalu nte.’ ” Maarii Yaawe le ye a fo.

³²Yaawe ko: “Firawoona ye silaŋo le dundi wo bankoo kaŋ, baluuriŋolu be daameŋ. Wo kamma la, a niŋ a la jamaa moolu bee be taa la le ka kafu Alla lombaloolu ma, mennu faata keloo kono, ì niŋ ì ye tara laariŋ dulaa kiliŋ.” Maarii Yaawe le ye a fo.