Read Mandinka Hoseya 12 Bible Online

Hoseya 12 - Mandinka bible

Hoseya 12

¹Efurayimu* ka foño kenseŋo le nooma, a ka tilibo foñoo bayindi tiloo bee. A ka faniyaa niŋ fitinoo kafu-kafu laalaa. A niŋ Asiriya ka kambeŋo siti, a ka olifu* tuloo kii Misira.”

²Yaawe* be kiitiyo laa la Yahuuda kaŋ ne. A be Yaakuba koomalankoolu fanaa jarabi la ì taaraŋ siloo la le, a ye ì joo ì kebaaroolu la.

³Ì bonsuŋo Yaakuba, wo ye i miniŋ a fulandiŋ kotoo tonkoliŋo la le, biriŋ ì be ì baamaa wuluuñaŋo kono.[25] Biriŋ a menta, a niŋ Alla ye keloo ke.[26]

⁴Yaakuba niŋ malaayikoo ye keloo ke le, a ye i kutu malaayikoo la. A kumboota malaayikoo ye, ka neemoo daani. Bituŋ Alla fintita a kaŋ Beteli,[27] a diyaamuta a ye jee.

⁵Yaawe Alihawaa Maariyo*, Yaawe le mu a too ti.

⁶Saayiŋ alitolu Yaakuba koomalankoolu, ali muru Alla kaŋ, ali kanoo muta, ali ye tiliŋ, ali si i tuuku ali la Alla la waatoo bee la.

⁷Yaawe ko: “Ite Efurayimu, i be le ko juloo, meŋ na peesarilaŋo maŋ tiliŋ, a be hameriŋ ka moolu nakari.

⁸Ali ka ñiŋ ne fo ko, ‘Ŋà naafulu jamaa le soto, m̀ fankata le kendeke. Ǹ na ñiŋ naafuloo bee tilimbaliyaa te je noo la ǹ na karoo la, waraŋ junuboo.’

⁹“Nte le mu Yaawe ti, ali la Alla, meŋ ye ali bondi naŋ Misira. M be a ke la le, ali ye daakaa tiriliisoolu* koto kotenke, ko biriŋ ali be keñewuloo* kono.[28]

¹⁰N diyaamuta annabiyomoolu ye, ŋa ì la jeroolu siyandi. Ka bo niŋ annabiyomoolu la, ŋa kuu jamaa misaali ali ye.

¹¹Kileyadinkoolu ka jalaŋolu le batu, moo nafantaŋolu le mu ì ti. Kilikalinkoolu[29] ka ninsituuraalu bo sadaa ti. Ì la sadaabodulaalu* si ke ko bere tuŋolu balaŋ kuŋolu to.”

¹²Yaakuba borita le nuŋ, ka taa Aramu bankoo to, jee to, a ye dookuwo ke ka musoo soto, futuu naafuloo joo keta nuŋ saajii kantoo le ti.

¹³Yaawe ye annabiyomoo[30] le taa, ka Banisirayila bondi naŋ Misira, a ye wo annabiyomoo le taa fanaa, ka ì kanta.

¹⁴Bari Efurayimu ye a Maarii Alla kamfandi jawuke le, a be a la yeleboŋo dunoo laa la a faŋo kuŋo le to, a be a joo la a la nendiroo la le.