Read Mandinka Hoseya 2 Bible Online

Hoseya 2 - Mandinka bible

Hoseya 2

¹“Ali ali mooñoo Banisirayila kewolu kumandi ‘Ammi’[5] la, ali ye musoolu kili ‘Ruhama’[6] la.”

²“Ali ali baamaa jalayi, a maŋ ke n na musu ti kotenke, m maŋ ke a kee ti. Ali a jalayi, fo a si i dahaa cakayaa la, a ye jeenoo bula.

³Niŋ wo nte, n si a wura, a kenseŋo ye loo, a kenseŋo si loo, ko a wuluuta ñaameŋ. N si a ke ko keñewuloo*, ŋa a ke ko banku jaaroo, ŋa a faa mindoo la.

⁴A diŋolu fanaa, n te balafaa soto la ì ye, kaatu cakadiŋolu le mu.

⁵Kaatu ì baamaa ye cakayaa le ke, ate, meŋ ye ì konoo taa, a ye malubaliyaa le ke. A ka a fo le ko, ‘M be bula la n kanuntewolu nooma le. Itolu le ka domoroo niŋ jiyo dii n na, sitifeŋolu, olifu* tuloo aniŋ wayinoo*.’

⁶Wo le ye a tinna m be a la siloo suki la ŋaniŋo la, ŋa ate faŋo tata sansaŋo la, a kana sila soto.

⁷A si a tuluŋñoolu bayindi, bari a te ì soto noo la, a si ì ñini, bari a te ì je noo la. Bituŋ a si a fo ko, ‘M be taa le, ŋa muru n kee foloo kaŋ, n wo waatimaa le fisiyaata n saayimmaa ti.’

⁸A maŋ a loŋ ko, nte le ka siimaŋ kesoo dii a la, wayinoo niŋ olifu tuloo. A maŋ a kalamuta ko, nte le ye a la sanoo niŋ kodiforoo siyandi, a ka Baali* jalaŋo buuñaa meŋ na.

⁹“Wo to m be n na siimaŋ kesoo taa la a waatoo la le, aniŋ n na wayinoo a sanjaanoo la. M be n na sitifeŋolu buusi la a bulu le, meŋ ye a sutura.

¹⁰Saayiŋ m be a la malu kuwo laa la kenoo le to, a tuluŋñoolu ñaatiliŋo la, moo-wo-moo le te a bondi noo la m bulu.

¹¹M be daŋ ke la a la seewoo la le, ŋa daŋ ke a la feetoolu la, a la Kari Kuta Juuraloolu*, Loobula Luŋ Juuraloolu, ka taa bula a la juurali looriŋolu bee la.

¹²M be a la wayini yiroolu tiñaa la le, aniŋ a la sooto suŋolu, a ka a fo mennu la ko, ‘Ñinnu mu n na joo le ti, n kanuntewolu ye meŋ dii n na.’ M be a ke la le, a la yiri kankaŋolu ye yelema sutoo ti, wulakono daafeŋolu ye ì daañini ì la.

¹³M be a jarabi la Baali jalaŋ feeti luŋolu la le, a ka cuuraayi sadaa* siisindi a ye mennu la. A ka konnaalu niŋ ñarandi feŋ koteŋolu duŋ, ka bula a tuluŋñoolu nooma, a ñinata nte la.” Yaawe* le ye a fo.

¹⁴“Bari m be a saba la naŋ ne, ŋa a samba keñewuloo kono, ŋa kuma diimaa fo a ye.

¹⁵Wo koolaa, m be a la wayini yiri kankaŋolu murundi la a ma le, ŋa Akori Wulumbaŋo[7] ke jikoo bundaa ti. Jee to, a be soŋ na m ma le, ko a la fondinkeeyaa waatoo la, ko waatoo meŋ, a bota naŋ Misira.”

¹⁶Yaawe ko Banisirayila ye ko, “Wo luŋo la, i be n kili la ‘n keemaa’ le la, i te n kili la ‘n na Baali’[8] la kotenke.

¹⁷Kaatu m be Baali jalaŋo too bee bondi la i daa le, a too te fo la kotenke.

¹⁸Wo luŋo la, n niŋ wulakono daafeŋolu be kambeŋo siti la, ka taa kunoolu niŋ kuruntu feŋolu, fo ì kana n na moolu mantoora. Kalabeñoo, hawusaroo* aniŋ keloo be bo la bankoo kaŋ ne, i ye tankoo niŋ kayiroo soto.

¹⁹M be i taa la n na musoo ti le fo abadaa, m be i taa la n na musoo ti tiliŋo le kono, aniŋ tooñaa, kanu bambaloo kono, aniŋ balafaa.

²⁰M be i taa la n na musoo ti foroyaa le kono, aduŋ i be nte Yaawe loŋ na le.”

²¹Yaawe ko: “Wo luŋo la, m be n danku la le, m be n danku la saŋo la le, saŋo ye i danku bankoo ma sanjoo la,

²²bankoo be i danku la siimaŋ kesoolu la le, aniŋ wayinoo niŋ olifu tuloo, wolu fanaa ye i danku Banisirayila[9] la.

²³M be n na moolu fii la m faŋo ye bankoo kaŋ ne, m be balafaa soto la Lo-Ruhama[10] ye le, ŋa a fo Lo-Ammi[11] ye ko, ‘Ali mu n na moolu le ti,’ aduŋ ì si a fo n ye ko, ‘Ite le mu ǹ na Alla ti.’ ”