Read Mandinka Hoseya 4 Bible Online

Hoseya 4 - Mandinka bible

Hoseya 4

¹Alitolu Banisirayilankoolu, ali ali tuloo loo Yaawe* la kumakaŋo la. Yaawe ye Banisirayila siilaalu tuumi ñiŋ ne la ko: “Ñiŋ bankoo kaŋ, foroyaa te keriŋ waraŋ tiliŋo, fo Alla lombaliyaa doroŋ.

²Kaloo, faniyaa, aniŋ moofaa, suuñaaroo niŋ jeenoo be fuumariŋ, yeleboŋ be yeleboŋ nooma.

³Wo le ye a tinna bankoo be kumboo kaŋ, a siilaalu be koririŋ, ì niŋ wulakono daafeŋolu niŋ kunoolu, hani baakono ñewolu be kasaara kaŋ ne.”

⁴Yaawe ko: “Moo kana moo jalayi, waraŋ ka kaŋo laa moo la, nte la tuumiroo be alitolu piriisoolu* le kaŋ.

⁵Suuto tili, ali niŋ annabiyomoolu ka boyi le, m be ali baamaa[12] kasaara la le.

⁶N na moolu kasaarata lombaliyaa kaŋ. Alitolu piriisoolu ye ì baŋ ne ka n loŋ, wo to ŋa m baŋ ali la piriisiyaa to le. Bayiri ali ñinata ali la Alla la Luwaa la, nte fanaa be ñina la ali diŋolu la le.

⁷Ali ka siyaa ñaameŋ, ali ka junuboo ke wo le ñaama, ali ka ali la horomoo faliŋ maloo le la.

⁸Ali ka i daañini n na moolu la sadaa* suboo[13] le la, wo le ye a tinna ali ka tara ñaaniriŋ ì la junube kewo la.

⁹Meŋ laata n na moolu kaŋ, wo le be laa la alitolu piriisoolu fanaa kaŋ. M be ali jarabi la ali la sila jawoolu la le, ŋa ali joo ali kebaaroo la.

¹⁰Ali si domoroo ke, ali konoo te faa la, ali ye cakayaa ke, ali te jiidi la, kaatu ali ye ali koo dii nte Yaawe la le.”

¹¹Yaawe ko: “Cakayaa, wayini* kutoo aniŋ wayini kumuŋo, wolu le ye n na moolu la fahaamuroo taa.

¹²N na moolu ka yaamaroo ñini jalaŋ yiroo le bulu, ì la taamaraŋ dokoo le mu ì la juubeerilaŋo ti, cakayaa maañaa le ye ì filindi. Ì ye ì koo dii ì la Alla la, ì bulata jalaŋolu nooma, wo mu cakayaa le ti.

¹³Ì ka beeyaŋ sadaalu bo konko baalu kaŋ santo, konkoriŋolu kaŋ, ì ka cuuraayoo siisindi sadaa ti, yirisuŋ baalu niŋ yirisuŋ biireeriŋolu fanaa koto, kaatu wolu le ye dubeŋ kendoo soto. “Wo le ye a tinna ali dimmusoolu keta cakoolu ti, ali diŋolu la musoolu, jeenelaalu.

¹⁴N te ali dimmusoolu jarabi la, niŋ ì ye cakayaa ke, n te feŋ ke la ali bitammusoolu fanaa la, niŋ ì ye jeenoo ke. Kaatu kewolu faŋo le niŋ jalaŋ batudulaa cakoolu[14] ka taa kara la, ì niŋ ì ka beeyaŋ sadaalu bo jalaŋ batudulaa to. Hakilintaŋolu ka kasaara teŋ ne.

¹⁵“Ite Banisirayila, i si cakayaa ke ñaa-wo-ñaa, kana Yahuuda duŋ ñiŋ junuboo to. Ite Yahuuda, i dahaa baturoo la Kilikali, kana taa baturoo la Beti-Aweni, i kana i kali nte Yaawe too la.

¹⁶Tooñaa, Banisirayila kuŋo be jaariŋ ne, ko fali balannaa. Silaŋ n si a kanta noo kene fanuŋo to ñaadii le ko saajiiriŋo?

¹⁷Efurayimu* ye a faŋ dii jalaŋolu le la, ali a bula a faŋ ma.

¹⁸Ì la dolo miŋ baa koolaa, ì la niidiyaa ka ke cakayaa le ti, ì ka lafi malu kuwo le la diina horomoo ti.

¹⁹Foñoo le ye ì koora ñoo la ka ì samba, ì la sadaalu be maloo doroŋ ne naati la ì kaŋ.”