Read Mandinka Hoseya 5 Bible Online

Hoseya 5 - Mandinka bible

Hoseya 5

¹Yaawe* ko: “Alitolu piriisoolu*, ali ali tuloo loo ñiŋ na! Banisirayilankoolu, ali ali hakiloo tu ñiŋ to! Mansabuŋo moolu, ali i lamoyi! Kiitiyo be alitolu le kaŋ, kaatu ali keta kutindiŋo le ti Misipa, ali keta jaloo ti ka wanka Tabori Konkoo kunto.

²Ali keta dinka diinondiŋo le ti Sitimu,[15] bari m be ali bee yankankati la le.

³Ŋa Efurayimu* loŋ ne, a ye cakayaa le ke, Banisirayila maŋ tara n ye kumpa to, a ye a faŋ kosondi le.

⁴“Ì la baara jawoolu ye a tinna le, ì maŋ muru noo ì la Alla kaŋ. Ì tarata cakayaa le bulu, ì maŋ Yaawe loŋ.

⁵Banisirayila la faŋ waroo le keta a faŋo seedoo ti, Efurayimu la junuboo, wo le be a boyindi la, Yahuuda niŋ a be boyi la ñoo la le.

⁶Ì niŋ beeyaŋolu si Yaawe waliŋ sadaa* ti, bari a te i danku la ì ma, a ye a koo dii ì la le.

⁷Ì ye foroyaabaliyaa le tiliŋ Yaawe la, kaatu ì ye diŋolu wuluu cakayaa le kono. Ì la Kari Kuta Juuraloo* sadaaboolu le be ì niŋ ì la kunkoolu bee kasaara la.”

⁸Yaawe ko: “Ali binoo fee Kibeya, footaŋo ye fee Rama, maamandiraŋo ye kuma Beti-Aweni, Benjamini, jawoolu be i kooma.

⁹Yankankatoo luŋo la, Efurayimu be ke la tumbuŋo le ti. Banisirayila lasiloolu, ŋa meŋ bankee ali la kuwo to, wo be ke la le.

¹⁰Yahuuda ñaatonkoolu keta le ko, mennu ye naanee kuŋolu bondi. M be n na kamfaa kupi la naŋ ì kaŋ ne ko jiyo.

¹¹Efurayimu be mantooroo kono, ì ye ì dori kiitiyo to, kaatu jalambatoo le mu ì diyaŋñoo ti.

¹²Wo le ye a tinna n keta Efurayimu ye ko tumboo, n keta Yahuuda ye ko baabaa.

¹³“Kabiriŋ Efurayimu ye a je, a saasaata ñaameŋ, Yahuuda ye a je, maadiŋo meŋ be a la, Efurayimu taata Asiriya, a ye kiilaa kii mansakee baa kaŋ. Bari wo maŋ a la maadiŋo jaara noo, sako ka a kendeyandi.

¹⁴M be ke la Efurayimu ye le ko jatoo, ŋa ke Yahuuda ye ko jata mereŋo. Nte faŋo le be ì faraŋ-faraŋ na, n si ì kuruntu, ŋa taa n na siloo la, moo te ì kanandi noo la.

¹⁵M be muru la n noo to le, fo janniŋ ì be ì la boyidaalu je la, ì ye n ñini. Ì la niikuyaa kono, ì be maakoyiroo ñini la m bulu le.”