Read Mandinka Hoseya 8 Bible Online

Hoseya 8 - Mandinka bible

Hoseya 8

¹Yaawe* ko, “Binoo ye fee! Jawoolu ka jii n na bankoo kaŋ ko seeliŋo, kaatu n na moolu ye n niŋ ì la kambeŋo tiñaa le, ì balanta n na yaamaroolu la.

²Banisirayila ka kumboo n ye ko, ‘Hee Alla, ŋà ite le loŋ ǹ na Alla ti.’

³Bari ì ye ì koo dii kuu kendoo la. Wo to, ì jawoolu be ì bayindi la le.

⁴“Ì ye mansoolu londi ì faŋ ye, ì maŋ feŋ fo n ye. Ì ye maralilaalu tomboŋ, ì maŋ n kalamutandi a la. Ì ka ì la sanoo niŋ kodiforoo taa, ka jalaŋolu dadaa ì la, ì la kasaaroo kaŋ.

⁵Alitolu Samariya saatee moolu, ali ali koo dii ali la ninsiriŋ jalaŋo la. N na kamfaa dimbaamaa le ka mala ali kamma. Janniŋ waati jumaa le ali be tara la seneyaabaliyaa daa to?

⁶Ninsi jalaŋo ñiŋ bota Banisirayila le, moo buloo le ye a dadaa, a maŋ ke Alla ti. Samariya la ñiŋ ninsiriŋo be teyiŋ-teyiŋ na le, a ye janjaŋ.

⁷“Moo meŋ ye foñoo fii, turubaadoo le be faliŋ na wo maarii ye. Siimaŋ kaloo meŋ maŋ konomaa, muna wo si wuluu noo baŋ? Hani niŋ siimaŋo sotota fanaa, jawoolu si a bee kunuŋ.

⁸Banisirayila teyita le fokabaŋ, saayiŋ a be banku koteŋolu teema ko feŋ nafantaŋo.

⁹Ì taata le fo Asiriya maakoyiri ñinoo la, ko faloo, meŋ maŋ dali, ì be yaayi la ì faŋ ma. Efurayimu* ye soorifeŋolu bondi ka kanuntewolu soto.

¹⁰Hani ì si ì faŋ waafi banku koteŋolu to, n si ì kafu naŋ ñoo ma. Asiriya mansa ye ì toorandi, fo ì ye ŋuntaŋ.

¹¹“Tooñaa, Efurayimu ye sadaabodulaa* jamaa le loo, ka sadaalu bo ì kaŋ junube kafaroo kamma, bari wo dulaalu naata ke junube baara dulaalu le ti.

¹²Ŋa yaamari jamaa le safee ì ye, bari ì maŋ a muta feŋ ti.

¹³Ì ka beeyaŋ sadaa* le bo, ì ka ì konoolu fandi a suboo la, ì ko, ì ka ì bondi nte le ye. Ì la wo sadaalu maŋ nte Yaawe seewondi. N te ñina la ì la junuboo la, m be ì yankankati la le, ŋa ì murundi Misira.

¹⁴“Banisirayila ñinata a Daamansoo la le, a ye buŋ ñiimaalu loo. Yahuuda ye saatee jamaa tata, bari m be dimbaa le jindi la naŋ ì kaŋ, ka ì la tatoolu jani.”