Read Mandinka Yoweli 1 Bible Online

Yoweli 1 - Mandinka bible

Yoweli 1

¹Yaawe* la kumoo, meŋ naata Yoweli kaŋ, Petuweli dinkewo:

²Alitolu alifaalu, ali i lamoyi ñiŋ na. Ali ali tuloo loo, bankoo siilaalu bee! Fo ñiŋ siifaa nene keta ali tiloo la le baŋ, waraŋ ali mumuñolu tiloo la?

³Ali a saata ali diŋolu ye, ali diŋolu fanaa ye a saata ì diŋolu ye, wolu fanaa si a saata jamaani naalaa ye.

⁴Kuntiŋolu mennu ka kunturoo ke, wolu ye too meŋ tu, kuntiŋ koorewolu ye wo domo. Kuntiŋ koorewolu ye too meŋ tu, kuntiŋ podilaalu ye wo domo. Kuntiŋ podilaalu ye too meŋ tu, kuntiŋ tiñaarilaalu ye wo domo.

⁵Ali wuli, alitolu siiratoolu, ali ye kumboo, alitolu wayini* minnaalu bee, ali wayini timiyaariŋo woosii, kaatu ali la a miŋo kuntuta le.

⁶Kuntiŋ kooree baa[1] le boyita n na bankoo kaŋ, ì semboo warata, ì buka yaatee noo, ì ñiŋo mu jata ñiŋo le ti, jata saliŋo be ì la.

⁷Ì ye n na wayini yiroolu kenseŋo londi, ì ye n na sooto suŋolu faraŋ-faraŋ, ì ye ì fatoolu woto ka ì fayi duuma, fo ì buloolu koyita.

⁸Ali woosii ko sunkutoo, meŋ ye booto funtoo duŋ niikuyaa kamma la, ka kewo la saayaa kumboo, a ñanta futuu la meŋ ye.

⁹Siimaŋ sadaa* niŋ miŋ feŋ sadaa kuntuta Yaawe Batudulaa Buŋo* to. Piriisoolu* woosiita, Yaawe la dookuulaalu.

¹⁰Kunkoolu tiñaata, senebankoo kumboota, siimaŋ kesoolu tiñaata, wayini yiridiŋolu jaata, olifu* tuloo ye ǹ tu kooma.

¹¹Alitolu senelaalu, ali sunu, ali lemba, alitolu wayini yiri topatoolaalu. Ali wiiti* niŋ baali* siimaŋo kumboo, siimaŋ katoo danta.

¹²Wayini yiroo jaata, sooto suŋo norota, roomaani* suŋo, tamarewo aniŋ pomu suŋo, yiroolu bee le jaata. Tooñaa, moolu la seewoo danta.

¹³Alitolu piriisoolu, ali booto funtoo duŋ, ali ye woosii, ali kumboo, alitolu Alla la sadaabolaalu. Alitolu, n na Alla la dookuulaalu, ali naa, ali ye suutoo bee ke booto funtoo kono. Siimaŋ sadaa niŋ miŋ feŋ sadaa danta ali la Alla Batudulaa Buŋo to.

¹⁴Ali suŋ sahayaariŋo londi, ali ye beŋo kili. Ali alifaalu bendi Yaawe Batudulaa Buŋo to, ali la Alla, aniŋ bankoo siilaalu bee, ali ye woosii Yaawe ye.

¹⁵Kooroo luŋ, luŋ koleŋ baa! Yaawe la luŋo sutiyaata naŋ ne, luŋo meŋ Alla Tallaa be kasaaroo naati la naŋ.

¹⁶Fo domoroo maŋ daŋ m̀ faŋo ñaa koto baŋ, kontaanoo niŋ seewoo danta ǹ na Alla Batudulaa Buŋo to?

¹⁷Fiifeŋ kesoolu tolita bankoo kono, buntuŋolu kenseŋo loota, maaboridulaalu boyita, kaatu siimaŋ kesoo ye moolu tu kooma le.

¹⁸Beeyaŋolu ŋuntaŋñaa! Ninsi koorewolu ka yaayi, kaatu ì maŋ daañini dulaa soto, hani saajii koorewolu faŋo be toorariŋ.

¹⁹Yaawe, m be woosii kaŋ ite le ye. Dimbaa le ye beeyaŋ daañini dulaa bee jani, dimbaa neŋo ye wuloo yiroo bee jani.

²⁰Hani wulakono daafeŋolu be ñaaniriŋ ite Yaawe la le, kaatu jii siloolu jaata le, dimbaa ye beeyaŋ daañini dulaa bee jani.