Read Mandinka Yoweli 2 Bible Online

Yoweli 2 - Mandinka bible

Yoweli 2

¹Ali binoo fee Siyoni*, n na konko senuŋo*, ali a fee maamandiraŋo ti. Bankoo siilaalu bee ye jarajara, kaatu Yaawe* la luŋo ka naa le, a sutiyaata naŋ ne.

²Luŋ dibiŋ, dibi fiŋ diboo, tawali fiŋo ye dulaa bee dibindi. Ko ñiŋ dibi fiŋo ye konkoolu muuri, kelediŋ jamaa coomanta naŋ, ì niŋ sembe baa, a siifaa ñoŋo nene maŋ soto, a ñoŋo nene te soto la.

³Kelediŋolu[2] ñaatiliŋo la, dimbaa le ka feŋo bee domo, niŋ ì ye ì koo dii, dimbaa neŋo ye janiroo ke. Janniŋ ì ka naa, bankoo be le ko Edeni naakoo, biriŋ ì ye ì koo dii, a keta keñewuloo* ti, feŋ buka kana ì ma.

⁴Suwoo muluŋo le be ì la, ì ka bori ko keleraŋ suwoo.

⁵Ì poditoo konkoolu kaŋ, ka ke le ko keleraŋ sareetoo* maakaŋo, ko dimbaa ka fetifeti ñaameŋ, ka ì daañini siimaŋ kaloo la, ko kelediŋ kafu baa, mennu ranta keloo kamma.

⁶Biriŋ ì coomanta, moo bee kijoo teyita, ñaadaalu bee yelemata.

⁷Ì ka bori le ko kelejawaroolu, ì ka sele tata sansaŋo la ko kelediŋolu. Ì meŋ-wo-meŋ be a taaraŋ buloo le kaŋ, ì buka jenke.

⁸Ì buka ñoo taki, ì meŋ-wo-meŋ ka tara a taaraŋ buloo le kaŋ, ì ka kirimbaasi, kelejooraŋ buka ì balaŋ noo.

⁹Ì ka kirimbaasi saatewo kamma le, ì ye bori a tata sansaŋolu kaŋ santo, ì ye sele ka duŋ buŋolu kono, ì ka duŋ palanteeroolu la le ko suŋo.

¹⁰Bankoo ka jarajara ì ñaatiliŋo la le, saŋo ye maamaŋ, karoo niŋ tiloo ye dibi, looloolu ye i dahaa maloo la.

¹¹Yaawe bumbunta a la kelejawaroolu kunto, waroo meŋ be kafoo la, meŋ bulata a nooma! Mennu ka a la yaamaroo muta, yaatee te wolu la. Tooñaa-tooñaa, Yaawe la luŋo warata le, a be jawuyaa la le kendeke. Jumaa le si a muña noo?

¹²Bari hani saayiŋ, Yaawe ko: “Ali muru n kaŋ ali sondomoo bee la, ali niŋ suŋo, kumboo niŋ woosiyo.”

¹³Ali sondomoolu le ñanta ali la niikuyaa yitandi la,[3] a maŋ ke duŋ feŋ faroo ti. Ali muru Yaawe kaŋ, ali la Alla, kaatu a hiinanteeyaata le, aduŋ a balafaa warata, a buka kamfaa juuna, a la kanu bambaloo maŋ dandulaa soto, aduŋ a buka lafi ka jarabiroo ke.

¹⁴Jumaa le ye a loŋ? A si ke noo, Yaawe ye a hakiloo faliŋ, a si balafaa soto noo ali ye, a ye neema ali ma siimaŋ jamaa la. Bituŋ ali si siimaŋ sadaa* niŋ miŋ feŋ sadaalu bo noo ali la Alla ye kotenke.

¹⁵Ali binoo fee Siyoni, ali suŋ sahayaariŋo londi, ali ye beŋo kili.

¹⁶Ali moolu kafu ñoo ma, ali ye jamaa moolu jankundi. Ali keebaalu bendi ñoo kaŋ, ali ye dindiŋolu kafu ñoo ma, hani suusuu diŋolu. Maañoo si a la laabuŋo bula naŋ, a keemaa ye finti naŋ a la buŋo kono.

¹⁷Piriisoolu*, Yaawe la dookuulaalu, ali kumboo batudulaa pereŋo niŋ sadaajanidulaa* teema. Ali si a fo, “Yaawe, dukaree, hiina i la moolu la. Itolu le mu i taa ti, kana ì ke jutunna feŋo ti, ka ì ke banku koteŋolu ye jelefeŋo ti. Muŋ ne be a tinna la ì be a fo la ko, ‘Ì la Alla lee?’ ”

¹⁸Bituŋ Yaawe la bankoo la kuwo naata ke a ye suula kuwo ti, a ye hiinoo soto a la moolu ye.

¹⁹Bituŋ a ko ì ye ko: “M be siimaŋo kii kaŋ ali ye naŋ ne, wayinoo* aniŋ olifu* tuloo, aduŋ ali be wasa la le. N te ali ke la banku koteŋolu ye jelefeŋo ti kotenke.

²⁰M be kelediŋolu bayi la le, mennu bota naŋ maraa karoo la, ì ye jamfa ali la. M be ì bayi la keñewula kiideeriŋo le kono. Bari mennu be ñaato, m be wolu bayi la Koojii Baa le to, mennu be kooma, ŋa wolu bayi Baa Baa* to, ì furewolu sunkaŋo ye wuli santo. M be ì yankankati la le, kaatu ì ye ì faŋ wara baake le.

²¹“Kunku kenoolu, ali kana sila, ali kontaani, ali ye seewoo, kaatu Yaawe ye kuu baalu le ke!

²²Alitolu beeyaŋolu, ali kana sila, kaatu wuloo ñaamoo bee be jambakereriŋ ne, yiroolu dinta, sooto suŋolu niŋ wayini yiroolu dinta a ñaama.

²³“Siyoni moolu, ali kontaani, ali ye seewoo Yaawe la kuwo la, ali la Alla. A la beteyaa kaŋ, a ye samaajiyo dii ali la, a ye jiyo boŋ ali ye naŋ fo a fuumata, samaa foloo jiyo aniŋ samaa labaŋ jiyo, ko a be nuŋ ñaameŋ.

²⁴Toñonkari dulaalu be faa la siimaŋ kesoo la le, tulu keraŋo niŋ wayini keraŋo ye faa fo ì ka boŋ.

²⁵“Ŋa kelediŋ kafu baa meŋ kii ali kaŋ, kuntiŋ koorewolu, kuntiŋ podilaalu, kuntiŋ tiñaarilaalu, kuntiŋ kunturilaalu, ì ye fiifeŋolu mennu bee domo saŋolu la, m be ì bee le jooseyi la.

²⁶Saayiŋ ali be domotaa soto la le, a jamaa, fo ali ye wasa. Bituŋ ali si nte Yaawe too jayi, ali la Alla, kaatu ŋa kaawakuwolu le ke ali ye. N na moolu nene te bula la malu kuwo kono kotenke.

²⁷Banisirayilankoolu, ali be a loŋ na le ko, m be ali fee le, aniŋ fanaa ko, nte Yaawe le mu ali la Alla ti, doo koteŋ te jee. N na moolu nene te bula la maloo kono kotenke.”

²⁸“Bituŋ wo koolaa, m be n na Nooroo jindi la hadamadiŋolu bee le kaŋ: Ali dinkewolu niŋ ali dimmusoolu si kiilaariyaa kumoolu bankee, ali la keebaalu ye siiboo, ali la fondinkewolu ye jeroo ke.

²⁹Wo luŋolu la, m be n na Nooroo jindi la naŋ, hani jommusoolu niŋ jonkewolu kaŋ ne.

³⁰“Wo waatoo la, kaawakuwolu be ke la duniyaa kono le, aniŋ saŋo santo: yeleboŋo, dimbaa aniŋ siisii baa.

³¹Tiloo be yelema la diboo ti, karoo ye wulee ko yeloo, janniŋ Yaawe la luŋ baa, luŋ koleŋo be naa la.

³²Bari moo-wo-moo, meŋ ye Yaawe too kumandi, wo be kiisa la le. Siyoni Konkoo niŋ Yerusalaamu, moolu be soto la jee le, mennu be kana la, aniŋ moo toomaalu fanaa, Yaawe ye mennu tomboŋ, ko Yaawe ye a laahidi ñaameŋ.”