Read Mandinka Amosi 2 Bible Online

Amosi 2 - Mandinka bible

Amosi 2

¹Yaawe* ye ñiŋ ne fo ko, “Mowabinkoolu[8] ye landatambi junube kuwolu le ke. Ì ye Edomu mansakewo kuloolu jani ka a ke lasoo ti. Wo kamma la n te ì jaraboo baayi la muk.

²M be dimbaa le jindi la naŋ Mowabi bankoo kaŋ, ŋa Keriyoti tatoolu jani. Mowabinkoolu ye faa kele jawoo kono, kele wuuroo niŋ kelebinoo kuma waatoo.

³M be ì la maralilaa kasaara la le, aniŋ a la mansakundaa alifaalu bee.” Yaawe le ye a fo.

⁴Yaawe ye ñiŋ ne fo ko, “Yahuuda moolu ye landatambi junube kuwolu le ke. Ì ye nte Yaawe la luwaa soosoo, aduŋ ì maŋ bula n na yaamaroolu nooma. Ì bulata ì la alifaa foloolu la jalambatu siloolu le nooma, wo ye ì filindi. Wo kamma la n te ì jaraboo baayi la muk.

⁵M be dimbaa le jindi la naŋ Yahuuda, ŋa Yerusalaamu tatoolu jani.”

⁶Yaawe ye ñiŋ ne fo ko, “Alitolu Banisirayilankoolu ye landatambi junube kuwolu le ke. Ali ye moo kendoolu waafi joŋolu ti, kaatu ì maŋ ì la juloolu le joo noo. Ali ye fuwaaroolu waafi juloo kamma meŋ maŋ tambi samata soŋo la. Wo kamma la n te ali jaraboo baayi la muk.

⁷Ali ye i tuu fuwaaroolu kuŋolu kaŋ ko niŋ ali be i tuu kaŋ bankoo le kaŋ. Ali buka tooñaa sabatindi ali niŋ moo bataariŋolu teema. Faalu niŋ ì dinkewolu ka deŋ sunkutu kiliŋo la. Ì maŋ n too kuliyaa.

⁸Sadaabodulaa-wo-sadaabodulaa*, ali ye i laa a daala le sitifaanoolu kaŋ, ali ka mennu taa sankayaaraŋo ti. Ali ye alimaani kodoolu saŋ doloo la, ali ye a miŋ ali la batudulaa to.

⁹“Nte le ye Amorinkoolu kasaara ali la kuwo kamma la. Ì be jaŋayaariŋ ñaa-wo-ñaa ko sedari* yiroo, ì be bambandiŋ ko kembu yiroo, ŋa ì bee kasaara kewu.

¹⁰Ŋa ali bondi Misira. Ŋa ali ñaatonkayaa keñewuloo* kono sanji taŋ naani, ka Amorinkoolu la bankoo dii ali la ka ke ali taa ti.

¹¹Ŋa annabiyomoolu tomboŋ ali dinkewolu kono, ŋa ali la fondinkewo doolu ke nasira moolu[9] ti. Fo wo maŋ ke baŋ, alitolu Banisirayilankoolu?” Yaawe le ye a fo.

¹²“Bari ali ye nasira moolu mindi doloo la le, ali balanta annabiyomoolu ma ka ì la kiilaariyaa kumoo bankee.

¹³Wo kamma la m be ali dori la le, ko sareetoo ka feŋo dori bankoo to ñaameŋ niŋ a be faariŋ siimaŋ kunsitoolu la.

¹⁴Hani borinoolaa baa, a te kana noo la. Sembetiyo be ke la sembentaŋo le ti, aduŋ kelejawara fanaa te a faŋ niyo tanka noo la.

¹⁵Kalandiŋ fayilaa te kalandiŋ fayiñaa soto noo la, borinoolaa baa te a faŋ tanka noo la, sako suuborindilaa si a faŋ niyo tanka.

¹⁶Wo luŋo la, hani kelediŋ fatiŋ baa, a be a la kelejooraŋo fayi la le, a ye bori.” Yaawe le ye a fo.