Read Mandinka 4 Musa 12 Bible Online

4 Musa 12 - Mandinka bible

4 Musa 12

¹Kabiriŋ ì be Haseroti, Miriyaamu niŋ Haaruna maŋ kuma diimaa fo Musa la kuwo to, a la Kusinka* musoo[10] futuwo kamma la.

²Ì kumata ko, “Fo Yaawe* diyaamuta Musa doroŋ ne ye baŋ? Fo a maŋ diyaamu ntolu fanaa ye baŋ?” Yaawe ye ñiŋ moyi le.

³Musa mu fammajiilaa baa le ti. A ye a faŋ jii le ka tambi moo-wo-moo la ñiŋ duniyaa kono.

⁴Yaawe naata diyaamu Musa niŋ Haaruna niŋ Miriyaamu ye kataba kiliŋ, a ko ì ye ko, “Ali finti naŋ, ali moo saboo bee, ali ye naa Bendulaa Tiriliisi Senuŋo* to.” Bituŋ ì moo saboo naata finti naŋ.

⁵Bituŋ Yaawe jiita naŋ ka bo niŋ minaayi samasimmaa kono la, a loota Tiriliisoo daa to, a ye Haaruna niŋ Miriyaamu kili, bituŋ ì naata ñaato.

⁶A ko ì ye ko, “Ali ali tuloo loo m fokumoolu la: “Niŋ annabiyomoo sotota ali kono, nte Yaawe faŋo le ka m faŋ yitandi a la jeroo to, n ka diyaamu a ye siiboo kono.

⁷Bari n na dookuulaa Musa la karoo la, kuwolu fatata le. Ŋa n na moolu bee karafa ate le ma.

⁸N niŋ ate ka diyaamu le jaharaŋo ñaama, a buka ke niŋ mansaaloolu la. Nte Yaawe faŋo le ye yamfoo dii, a ye m muluŋo je. Alitolu si haañi noo ñaadii ka kuma fo wo ma, m faŋo la dookuulaa?”

⁹Bituŋ Yaawe la kamfaa baa naata ì kaŋ. A ye ì bula, a taata.

¹⁰Biriŋ minaayoo bota Tiriliisoo kunto, Miriyaamu keta balajawutoo ti, a baloo koyita ko perekaanoo. Bituŋ Haaruna ye a ñaa muru a kaŋ, aduŋ a ye a je le Miriyaamu ye balafata kuuraŋo[11] le soto.

¹¹Bituŋ Haaruna ko Musa ye ko, “Hee m maarii, kana ǹ jarabi ŋà junube kuu kalantaŋo meŋ ke.

¹²Kana Miriyaamu ke ko deenaani siibaloo meŋ, biriŋ a be bo la a baamaa wuluuñaŋo kono, a be toliriŋ ne.”

¹³Bituŋ Musa woosiita Yaawe ye ko, “Hee Alla, dukaree a kendeyandi.”

¹⁴Bari Yaawe ko Musa ye le ko, “Fo niŋ a faamaa ye daajiyo tupi a ñaadaa kaŋ, fo a te a maloo kuwo taa la baŋ fo tili woorowula? A fintindi daakaa kono fo tili woorowula, wo koolaa a si naa muru naŋ.”

¹⁵Wo le to Miriyaamu bota daakaa ñiŋ to fo tili woorowula. Moolu maŋ wuli taamoo la kotenke fo biriŋ Miriyaamu muruta naŋ.

¹⁶Wo koolaa le mu moolu naata wuli ka bo Haseroti, ì taata daakaa loo Parani Keñewuloo* kono.