Read Mandinka 4 Musa 16 Bible Online

4 Musa 16 - Mandinka bible

4 Musa 16

¹Kora mu Lewi lasiloo moo le ti, Isari dinkewo, Kohati koomalankoo, meŋ ye a faŋ wara ka balaŋ Musa ma. A niŋ Rubeni lasiloo moolu le kafuta ñoo ma, mennu mu Eliyabu dinkewolu Datani niŋ Abiramu ti, aniŋ Oni, Peleti dinkewo. Ì ye Banisirayilanka koteŋolu, moo keme fula moo taŋ luulu le kafundi ì ma, mennu mu jamaa la ñaatonkoolu ti, tomboŋ moolu, aniŋ moo too boriŋ baalu.

³Ì benta Musa niŋ Haaruna kamma, ì ko ì ye ko, “Ali ye landatamboo le ke! Ñiŋ jamaa moo bee mu moo senuŋo le ti, moo bee, aduŋ Yaawe* be ì fee le. Muŋ ne ye a tinna alitolu ye ali faŋ selendi Yaawe la moolu kaŋ santo?”

⁴Biriŋ Musa ye ñiŋ moyi, a sujudita ka duwaa.

⁵Bituŋ a ko Kora niŋ a la kafoo moolu ye ko, “Soomandaa, Yaawe be a yitandi la le jumaa le be ate la karoo la, aniŋ jumaa le be seneyaariŋ, aniŋ jumaa le be ke la moo ti meŋ be ate waliŋ noo la. A be moo meŋ tomboŋ na, a be wo le bula la a ye a waliŋ.

⁶Ite Kora, i niŋ i la kafoo moolu, ali cuuraayi siisindiraŋolu taa,

⁷saama, ali ye dimbaa ke ì kono, ali ye cuuraayoolu ke ì kaŋ Yaawe ñaatiliŋo la. Yaawe be moo meŋ tomboŋ na, wo le mu moo senuŋo ti. Alitolu Lewi lasiloo moolu, ali ye landatamboo le ke!”

⁸Bituŋ Musa ko Kora ye ko, “Alitolu Lewi lasiloo moolu, ali i lamoyi saayiŋ!

⁹Banisirayila la Alla ye ali jenkendi kara la ka bo Banisirayila jamaa moolu kono a faŋo le ye. A ye ali katandi a faŋ na ka dookuwo ke a la Tiriliisi Senuŋo* to, aniŋ ka tambi jamaa ñaato ka dookuwo ke ì tooyaa la. Fo alitolu ye wo muta kuundiŋ ne ti baŋ?

¹⁰A ye ali bula le ka a waliŋ, ali niŋ ali baadiŋ Lewi lasiloo bee, hani wo ali be lafiriŋ ka piriisiyaa* fanaa ñini.

¹¹Ite Kora niŋ i la kafoo moolu, ali benta Yaawe le kamma ka a sooki. Jumaa le mu Haaruna ti, fo ali be woosii la a ma?”

¹²Musa ye kiilaa kii Datani niŋ Abiramu, Eliyabu dinkewolu nooma, bari ì kumata ko, “Ntolu te naa!

¹³Ite le ye ntolu bondi naŋ bankoo kaŋ, keekewo niŋ liyo be woyiriŋ daameŋ,[17] ka naa m̀ faa keñewuloo kono. Fo ite ye wo muta kuundiŋo le ti? Saayiŋ i lafita i faŋ ke la ǹ kunna maralilaa le ti.

¹⁴I maŋ ntolu samba naŋ banku kaŋ, keekewo niŋ liyo be woyiriŋ daameŋ. I maŋ kunku kene dii ǹ na, i maŋ wayini* kankaŋ dii ǹ na, ka ke ǹ ye keetaafeŋo ti. I lafita ntolu ñaa le kuu la ka ǹ neenee? Ntolu-wo la karoo la de, ntolu te naa.”

¹⁵Musa kamfaata baake, bituŋ a ko Yaawe ye ko, “Kana ì la sadaa* muta! M maŋ hani faloo le taa moo bulu ì kono, aduŋ n nene maŋ moo toora ì kono.”

¹⁶Bituŋ Musa ko Kora ye ko, “Ite Kora, i niŋ i la kafoo moolu bee si beŋ Yaawe ñaatiliŋo la saama, i niŋ ì bee, aniŋ Haaruna.

¹⁷Kee-wo-kee si a la cuuraayi siisindiraŋo taa, a ye cuuraayoo ke a kono, ka a samba Yaawe ñaatiliŋo la. A bee ñanta ke la cuuraayi siisindiraŋ keme fula aniŋ taŋ luulu le ti. I fanaa niŋ Haaruna si ali la cuuraayi siisindiraŋolu samba.”

¹⁸Bituŋ moo-wo-moo ye a la cuuraayi siisindiraŋo muta, a ye dimbaa ke a kono, aniŋ cuuraayoo, ì niŋ Musa niŋ Haaruna loota Bendulaa Tiriliisoo dundaŋ daa to.

¹⁹Kora ye Banisirayila jamaa bee bendi Musa niŋ Haaruna kamma Bendulaa Tiriliisoo dundaŋ daa to, bituŋ Yaawe la mansabaayaa lankenemata jamaa moo bee ye.

²⁰Yaawe ko Musa niŋ Haaruna ye ko,

²¹“Ali bo ñiŋ moolu kono, ŋa naa ì bee kasaara kataba kiliŋ.”

²²Bituŋ Musa niŋ Haaruna sujudita a ye, ì ko a ye ko, “Hee Alla, ite le mu Daamansoo ti meŋ ka niyo dii hadamadiŋo la. Niŋ moo kiliŋ ye junube kuwo ke, fo i be moo bee le jarabi la a la baŋ?”

²³Bituŋ Yaawe ko Musa ye ko,

²⁴“A fo moolu ye bo Kora niŋ Datani niŋ Abiramu la tiriliisoolu* to.”

²⁵Musa wulita a taata Datani niŋ Abiramu yaa, bituŋ Banisirayila alifaalu bulata a nooma.

²⁶A ye jamaa moolu dandalaa ko, “Ali bo ñiŋ kee kuruŋolu la tiriliisoolu to! Ali buloo kana maa hani ì la feŋ kiliŋ na. Niŋ wo nte, ali niŋ ì bee si koora ñoo la, ì la junube kuwolu kamma la.”

²⁷Bituŋ ì naata jamfa Kora, Datani niŋ Abiramu la tiriliisoolu la. Datani niŋ Abiramu fintita naŋ, ì niŋ ì la musoolu niŋ ì diŋolu ka taa fo ì la dindimmaalu naata loo banta ì la tiriliisoolu dundaŋ daa to.

²⁸Bituŋ Musa kumata ko, “Ali be a loŋ na ñiŋ ne la ko, Yaawe le ye n kii ka ñiŋ kuwolu bee ke, a maŋ ke nte faŋo la kunna miiroo ti:

²⁹Niŋ ñiŋ kewolu faata ko moolu ka faa ñaameŋ, meŋ ka ke moolu la wo doroŋ keta ì la, wo to Yaawe maŋ nte kii naŋ.

³⁰Bari niŋ Yaawe ye kuu kuta fintindi, ka bankoo yele ì fee, ì niŋ ì la sotofeŋolu bee ye kunuŋ, ì ye kende saareŋ ka taa laakira, wo to ali si a loŋ ko, ñiŋ kewolu, ì maŋ Yaawe la kuwo le muta feŋ ti.”

³¹A pareeta diyaamoo la doroŋ, bankoo farata ì fee.

³²Bankoo yeleta ì fee, a ye ì kunuŋ ì niŋ ì la dimbaayaalu, moo-wo-moo tarata Kora la karoo la, aniŋ ì la feŋolu bee.

³³Bankoo soronta ì fee, ì niŋ ì la sotofeŋolu bee kende saarinta bankoo kono ka taa laakira. Ì kasaarata ka bo ì la jamaa moolu kono.

³⁴Ì la wuuroo ye a tinna Banisirayilankoolu mennu bee be ì daala borita. Ì kumata ko, “Bankoo be ntolu fanaa kunuŋ na le!”

³⁵Bituŋ Yaawe ye dimbaa jindi naŋ, a ye ñiŋ kee keme fula niŋ taŋ luuloo bee domo, mennu tarata cuuraayoolu siisindi kaŋ sadaa ti.

³⁶Yaawe ko Musa ye ko,

³⁷“A fo Eleyasa, Piriisi Haaruna dinkewo ye, a ye cuuraayi siisindiraŋolu bondi naŋ seebuutoo kono, a ye ì kemboo fayi jana. Ñiŋ kewolu mennu foota ì niyolu la ì la junube kewo kamma la, ì la cuuraayi siisindiraŋolu seneyaata le, kaatu ì ye ì samba naŋ nte Yaawe le ye. Haaruna si moolu bula ì ye ñiŋ siisindiraŋolu tunkaŋ neefaataalu ti, ka sadaajanidulaa* muuri ì la, ì si ke dandalaaroo ti Banisirayilankoolu ye.”

³⁸

³⁹Bituŋ Eleyasa meŋ mu piriisoo ti, ye ñiŋ moo janiriŋolu la jaawali cuuraayi siisindiraŋolu kafu ñoo ma, ì ye mennu samba, a ye moolu bula ì tunkaŋo la ka sadaajanidulaa muuri ì la,

⁴⁰ko Yaawe ye a yaamari ñaameŋ ka bo niŋ Musa la. Ñiŋ be tara la jee le ka Banisirayilankoolu hakili bulandi ko, niŋ a maŋ ke Haaruna koomalankoolu ti, moo maŋ ñaŋ na naa la ka cuuraayoo siisindi Yaawe ñaatiliŋo la. Niŋ meŋ ye a ke, a si ke ko Kora niŋ a la kafoo moolu.

⁴¹Wo saamoo Banisirayila jamaa moo bee woosiita Musa niŋ Haaruna ma. Ì kumata ì ye ko, “Alitolu le ye Yaawe la moolu faa.”

⁴²Biriŋ ñiŋ moolu benta ñoo kaŋ ka balaŋo tiliŋ Musa niŋ Haaruna la, ì ye ì ñaa tiliŋ Bendulaa Tiriliisi Senuŋo le la. Kataba kiliŋ minaayoo muurita a kaŋ, Yaawe la mansabaayaa lankenemata naŋ.

⁴³Bituŋ Musa niŋ Haaruna taata Bendulaa Tiriliisi Senuŋo ñaatiliŋo la.

⁴⁴Yaawe ko Musa ye ko,

⁴⁵“Bo ñiŋ jamaa moolu kono, ŋa naa ì bee kasaara kataba kiliŋ.” Bituŋ Musa niŋ Haaruna sujudita.

⁴⁶Musa ko Haaruna ye ko, “I la cuuraayi siisindiraŋo taa, i ye dimbaa keñemboo ke a kono ka bo sadaajanidulaa to. I ye cuuraayoo ke a kaŋ, i ye a samba katabake jamaa moolu ye, ka junube kafaroo sii ì ma. Kaatu Yaawe ye a la kamfaa bula naŋ ne fokabaŋ, alibalaa kuuraŋo le datita.”

⁴⁷Bituŋ Haaruna ye a taa ko Musa ye a yaamari ñaameŋ, a borita ka duŋ jamaa moolu kono. Bari alibalaa kuuraŋo datita ì kono le fokabaŋ. Bituŋ a ye cuuraayoo ñiŋ mala, ka junube kafaroo sii moolu ma.

⁴⁸A loota furewolu niŋ moo kendoolu teema, bituŋ alibalaa ñiŋ naata loo.

⁴⁹Bari moo wuli taŋ niŋ naani moo keme woorowula, wolu le faata alibalaa ñiŋ to, wo niŋ moolu maŋ kiliŋ mennu faata Kora la kuwo kamma.

⁵⁰Biriŋ alibalaa kuuraŋo ñiŋ loota, Haaruna muruta Musa kaŋ Bendulaa Tiriliisoo dundaŋ daa to.