Read Mandinka 4 Musa 19 Bible Online

4 Musa 19 - Mandinka bible

4 Musa 19

¹Yaawe* ko Musa niŋ Haaruna ye ko:

²Siloo fele nte Yaawe faŋo ye meŋ yaamaroo dii, meŋ be tara la looriŋ seneyandiroo luwaa la karoo la: Ali si a fo Banisirayilankoolu ye, ì ye ninsi wuleŋo samba naŋ meŋ maŋ lanjuuru, aduŋ sootaari te a la, aduŋ yooku* fanaa nene maŋ bula a la.

³Ali ye a dii Piriisi* Eleyasa la. A ñanta samba la daakaa banta le, a ye faa a ñaa la jee.

⁴Bituŋ ate Piriisi Eleyasa si a yeloo doo taa a bulukondiŋo la, a ye a sari Bendulaa Tiriliisi Senuŋo* ñaatiliŋo la siiñaa woorowula.

⁵Ninsoo ñiŋ bee ñanta jani la a ñaa la le, a kuloo, a suboo, a yeloo, aniŋ a nuwolu.

⁶Bituŋ piriisoo si sedari* lookuntoo taa, siisiliŋñaama buloo, aniŋ boorajulu wuleŋo, a ye ì fayi ninsoo ñiŋ kaŋ dimbaa kono.

⁷Niŋ ñiŋ bota a la, piriisoo si jiyo taa, a faŋo ye i kuu, a ye a la duŋ feŋolu kuu. Wo koolaa a si muru noo daakaa to le, bari a be tara la kosoriŋ ne fo janniŋ wulaaroo.

⁸Kewo meŋ ye ñiŋ ninsoo jani, a si jiyo taa, a ye a la duŋ feŋolu kuu, a fanaa ñanta i kuu la le. Bari a fanaa be tara la kosoriŋ ne fo janniŋ wulaaroo.

⁹Kewo kosoo te meŋ bala, wo le ñanta ñiŋ ninsoo seebuutoo kafu la ñoo ma, a ye a ke daakaa banta la, dulaa to meŋ maŋ koso. A be tara la maaboriŋ Banisirayilanka jamaa le ye, ka a ke jiyo kono ì be kali la ì faŋ seneyandi la meŋ na. Seneyandiraŋ jiyo le mu junuboo kamma.

¹⁰Kewo meŋ ye ñiŋ ninsi janiriŋo seebuutoo kafu ñoo ma, a maarii fanaa ñanta a la duŋ feŋolu kuu la le, ate fanaa be tara la kosoriŋ ne fo janniŋ wulaaroo. Ñiŋ be ke la luwaa looriŋo le ti Banisirayilankoolu ye, aniŋ tumarankewolu mennu be ì kono.

¹¹Niŋ moo-wo-moo maata moo furewo la, a maarii be tara la kosoriŋ ne fo tili woorowula.

¹²A maarii ñanta a faŋ seneyandi la niŋ ñiŋ jiyo le la tili sabanjaŋ luŋo la, aniŋ tili woorowulanjaŋ luŋo, i si a je a si seneyaa. Bari niŋ a maŋ a faŋ seneyandi tili sabanjaŋ luŋo niŋ tili woorowulanjaŋ luŋo, a be tara la kosoriŋ ne.

¹³Niŋ moo-wo-moo maata furewo la, moo faariŋo, a maŋ a faŋ seneyandi, a maarii ye Yaawe la Tiriliisi Senuŋo le nondi. Ñiŋ maarii ñanta bondi la Banisirayilankoolu kono le. Niŋ seneyandiraŋ jiyo maŋ sari a kaŋ, a be tu la kosoriŋ ne, a la kosoo be tu la a bala le.

¹⁴Niŋ moo faata tiriliisoo* kono, luwaa meŋ be looriŋ wo karoo la, wo le mu: Moo-wo-moo be wo tiriliisoo kono, aniŋ moo-wo-moo dunta a kono, ì bee le be koso la fo tili woorowula.

¹⁵Keraŋolu mennu be tiriliisoo ñiŋ kono, ì maŋ bitindaŋ soto, wolu fanaa bee le be koso la.

¹⁶Niŋ moo meŋ be banta, a maata moo furewo la, hawusaroo* ye meŋ faa, waraŋ meŋ faata a faŋ ye, waraŋ a ye maa moo kuloo la, waraŋ kaburoo, a maarii be koso la le fo tili woorowula.

¹⁷Ka moo kosoriŋolu seneyandi, ali si seebuutu doo taa ninsoo to meŋ janita ka junuboo kafari, ali ye a ke keraŋo kono, ali ye jii kendoo boŋ a kaŋ.

¹⁸Bituŋ kewo meŋ seneyaata, a si siisiliŋñaama buloo taa, a ye a bula ñiŋ jiyo kono, a ye a sari tiriliisoo kaŋ, aniŋ a jooraŋolu bee, aniŋ moolu fanaa kaŋ mennu be jee. A si a sari moo-wo-moo fanaa kaŋ meŋ maata moo kuloo la, waraŋ kaburoo, waraŋ ì ye moo meŋ faa, waraŋ moo meŋ faata a faŋ ye.

¹⁹Kewo kosoo te meŋ bala, wo le ñanta ñiŋ jiyo sari la moo kosoriŋo kaŋ tili sabanjaŋ luŋo la, aniŋ tili woorowulanjaŋ luŋo la. Tili woorowulanjaŋ luŋo la i ye moo meŋ seneyandi ñanta jiyo taa la le ka i kuu, a ye a la duŋ feŋolu fanaa kuu. Wo wulaaroo faŋo la, a be seneyaa la le.

²⁰Niŋ moo meŋ maŋ seneyaa, aduŋ a maŋ a faŋ seneyandi, a maarii be bondi la Banisirayila jamaa moolu kono le, kaatu a ye Yaawe la Tiriliisi Senuŋo le kosondi, baawo ñiŋ seneyandiraŋ jiyo maŋ sari a maarii kaŋ, wo to a maŋ seneyaa.

²¹Ñiŋ be ke la luwaa looriŋo le ti ì ye. Kewo meŋ ye ñiŋ seneyandiraŋ jiyo sari, a fanaa ñanta a la duŋ feŋolu kuu la le, aduŋ niŋ meŋ ye ñiŋ seneyandiraŋ jiyo maa, a maarii be tara la kosoriŋ ne fo janniŋ wulaaroo.

²²Niŋ ñiŋ moo seneyaabaloo ye feŋ-wo-feŋ maa, wo feŋo fanaa be koso la le, aduŋ niŋ moo-wo-moo fanaa maata wo feŋo la, a maarii be tara la kosoriŋ ne fo janniŋ wulaaroo.