Read Mandinka 4 Musa 2 Bible Online

4 Musa 2 - Mandinka bible

4 Musa 2

¹Yaawe* ko Musa niŋ Haaruna ye ko,

²“Banisirayilankoolu ñanta daakaa loo la Bendulaa Tiriliisi Senuŋo* dandaŋolu le la, ì niŋ a teemoo ye saba ñoo la. Moo-wo-moo, a ye tara a la lasiloo bandeeroo koto, a la dimbaayaa la bandeeroo ye tara a bulu.”

³Tilibo kara maafaŋo la, Tiriliisoo ñaatiliŋo la, Yahuuda kelediŋ kafoolu ñanta daakaa loo la wo le to, ì la bandeeroo koto. Yahuuda koomalankoolu la ñaatonkoo mu Naasoni le ti, Amminadabu dinkewo.

⁴A la kelediŋ kafoo moo taata kaañaŋ moo wuli taŋ woorowula niŋ naani aniŋ keme wooro le fee.

⁵Isakari lasiloo moolu la daakaa le be tara la ì daala. Isakari koomalankoolu la ñaatonkoo mu Netaneli le ti, Suwari dinkewo.

⁶A la kelediŋ kafoo moo taata kaañaŋ moo wuli taŋ luulu niŋ naani aniŋ keme naani le fee.

⁷Sebuluni lasiloo moolu le be tara la wolu daala. Sebuluni koomalankoolu la ñaatonkoo mu Eliyabu le ti, Heloni dinkewo.

⁸A la kelediŋ kafoo moo taata kaañaŋ moo wuli taŋ luulu niŋ woorowula aniŋ keme naani le fee.

⁹Kelediŋ kafoolu mennu be Yahuuda daakaa to, moo bee taata kaañaŋ moo wuli keme wuli taŋ seyi niŋ wooro aniŋ keme naani le fee. Itolu le foloo be wutu la.

¹⁰Bulubaa kara maafaŋo la, Rubeni kelediŋ kafoolu la daakaa ñanta tara la wo le to, ì la bandeeroo koto. Rubeni lasiloo moolu la ñaatonkoo mu Elisuri le ti, Sedeyuri dinkewo.

¹¹A la kelediŋ kafoo moo taata kaañaŋ moo wuli taŋ naani niŋ wooro aniŋ keme luulu le fee.

¹²Simeyoni lasiloo moolu la daakaa le be tara la itolu daala. Simeyoni koomalankoolu la ñaatonkoo mu Selumiyeli le ti, Surisadayi dinkewo.

¹³A la kelediŋ kafoo moo taata kaañaŋ moo wuli taŋ luulu niŋ kononto aniŋ keme saba le fee.

¹⁴Kadu lasiloo moolu le be tara la ì daala. Kadu koomalankoolu la ñaatonkoo mu Eliyasafu le ti, Duweli dinkewo.

¹⁵A la kelediŋ kafoo moo taata kaañaŋ moo wuli taŋ naani niŋ luulu keme wooro aniŋ taŋ luulu le fee.

¹⁶Kelediŋ kafoolu mennu be Rubeni daakaa to, moo bee taata kaañaŋ moo wuli keme wuli taŋ luulu niŋ kiliŋ keme naani aniŋ taŋ luulu le fee. Itolu le be bula la kafu foloo nooma.

¹⁷Lewi lasiloo moolu, ì niŋ Bendulaa Tiriliisi Senuŋo be wutu la le ka bo daakaalu teema. Ì be taa le ko ì daakaata ñaameŋ, moo-wo-moo ye tara a la dulaa to, ì la bandeeroo koto.

¹⁸Tilijii kara maafaŋo la, Efurayimu* kelediŋ kafoolu la daakaa ñanta tara la wo le to, ì la bandeeroo koto. Efurayimu koomalankoolu la ñaatonkoo mu Elisama le ti, Ammihudi dinkewo.

¹⁹A la kelediŋ kafoo moo taata kaañaŋ moo wuli taŋ naani aniŋ keme luulu le fee.

²⁰Manase lasiloo moolu le be tara la ì daala. Manase koomalankoolu la ñaatonkoo mu Kamaliyeli le ti, Pedaasuri dinkewo.

²¹A la kelediŋ kafoo moo taata kaañaŋ moo wuli taŋ saba niŋ fula aniŋ keme fula le fee.

²²Benjamini lasiloo moolu le be tara la ì daala. Benjamini koomalankoolu la ñaatonkoo mu Abidani le ti, Kidoni dinkewo.

²³A la kelediŋ kafoo moo taata kaañaŋ moo wuli taŋ saba niŋ luulu aniŋ keme naani le fee.

²⁴Kelediŋ kafoolu mennu be Efurayimu daakaa to, moo bee taata kaañaŋ moo wuli keme niŋ seyi aniŋ keme kiliŋ ne fee. Itolu le be bula la kafu fulanjaŋo nooma.

²⁵Maraa kara maafaŋo la, Dani kelediŋ kafoolu la daakaa ñanta tara la wo le to, ì la bandeeroo koto. Dani koomalankoolu la ñaatonkoo mu Ahiyesa le ti, Ammisadayi dinkewo.

²⁶A la kelediŋ kafoo moo taata kaañaŋ moo wuli taŋ wooro niŋ fula aniŋ keme woorowula le fee.

²⁷Aseri lasiloo moolu la daakaa be tara la itolu le daala. Aseri koomalankoolu la ñaatonkoo mu Pakiyeli le ti, Okirani dinkewo.

²⁸A la kelediŋ kafoo moo taata kaañaŋ moo wuli taŋ naani niŋ kiliŋ aniŋ keme luulu le fee.

²⁹Nafutali lasiloo moolu le be tara la ì daala. Nafutali koomalankoolu la ñaatonkoo mu Ahira le ti, Enani dinkewo.

³⁰A la kelediŋ kafoo moo taata kaañaŋ moo wuli taŋ luulu niŋ saba aniŋ keme naani le fee.

³¹Kelediŋ kafoolu mennu be Dani daakaa to, moo bee taata kaañaŋ moo wuli keme wuli taŋ luulu niŋ woorowula aniŋ keme wooro le fee. Itolu le be labaŋ na wutu la, ka tara ì la bandeeroolu koto.

³²Ñinnu le mu Banisirayilankoolu ti mennu yaateeta, ko ì la dimbaayaalu be ñaameŋ. Ì nankamoo taata kaañaŋ moo wuli keme wooro niŋ saba keme luulu aniŋ taŋ luulu le fee. Ì ye wolu le yaatee daakaalu kono, ko ì kelediŋ kafoolu be ñaameŋ.

³³Lewi lasiloo moolu niŋ Banisirayila moo toomaalu maŋ yaatee ñoo la, ko Yaawe ye Musa yaamari a la ñaameŋ.

³⁴Banisirayilankoolu ye kuwolu bee ke le, ko Yaawe ye Musa yaamari a la ñaameŋ. Ì ye daakaalu loo wo le ñaama ka tara ì la bandeeroolu koto, aduŋ ì wututa wo le fanaa ñaama, moo-wo-moo ka tara a la kaabiiloo la karoo le la, aniŋ a la dimbaayaa.