Read Mandinka 4 Musa 33 Bible Online

4 Musa 33 - Mandinka bible

4 Musa 33

¹Ñinnu le mu dulaalu ti Banisirayilankoolu ye daakaalu loo daameŋ, biriŋ ì wulita naŋ ka bo Misira, ì kafumaalu Musa niŋ Haaruna la ñaatonkayaa koto.

²Yaawe* la yaamaroo kaŋ, Musa naata ñiŋ dulaalu toolu safee ì la taamoo waatoo, ì futata dulaalu mennu to. Wolu le mu:

³Banisirayilankoolu wulita Ramesesi, saŋo kari foloo tili taŋ niŋ luuloo le la, Yaawe Tambi Tumoo Juuraloo* saamoo. Ì niŋ fatiyaa baa le wulita, Misirankoolu bee ñaa la.

⁴Misirankoolu tarata ì dinkee foloolu le baadee kaŋ, Yaawe ye mennu faa. A ye a ke ka kiitii koleŋ baa laa ì la alloolu kaŋ.

⁵Banisirayilankoolu wulita Ramesesi, ì taata daakaa loo Sukoti.

⁶Ì bota Sukoti, ì taata daakaa loo Etamu Keñewuloo* jenjeŋo la.

⁷Ì bota Etamu, ì muruta ka taa Pi-Hahiroti, meŋ ñaa be tilindiŋ Baali-Sefoni la, bituŋ ì ye daakaa loo Mikidoli ñaatiliŋo la.

⁸Ì bota Pi-Hahiroti, ì tambita niŋ baa to la ka taa duŋ keñewuloo kono, biriŋ ì taamata Etamu Keñewuloo kono fo tili saba, ì taata daakaa loo Mara.

⁹Ì bota Mara, ì taata Elimu, daameŋ woyi taŋ niŋ fula le tarata jee, aniŋ tamaree suŋ taŋ woorowula, bituŋ ì ye daakaa loo jee.

¹⁰Ì bota Elimu, ì taata daakaa loo Kulunjumbe Baa daala.

¹¹Ì bota Kulunjumbe Baa to, ì taata daakaa loo Sini Keñewuloo kono.

¹²Ì bota Sini Keñewuloo kono, ì taata daakaa loo Dofuka.

¹³Ì bota Dofuka, ì taata daakaa loo Alusi.

¹⁴Ì bota Alusi, ì taata daakaa loo Refidimu, daameŋ jii maŋ soto moolu ye ka i miŋ.

¹⁵Ì bota Refidimu, ì taata daakaa loo Sinayi Keñewuloo kono.

¹⁶Ì bota Sinayi Keñewuloo kono, ì taata daakaa loo Kiburoti-Hataawa.

¹⁷Ì bota Kiburoti-Hataawa, ì taata daakaa loo Haseroti.

¹⁸Ì bota Haseroti, ì taata daakaa loo Ritima.

¹⁹Ì bota Ritima, ì taata daakaa loo Rimmoni-Peresi.

²⁰Ì bota Rimmoni-Peresi, ì taata daakaa loo Libuna.

²¹Ì bota Libuna, ì taata daakaa loo Risa.

²²Ì bota Risa, ì taata daakaa loo Kehelata.

²³Ì bota Kehelata, ì taata daakaa loo Seferi Konkoo to.

²⁴Ì bota Seferi Konkoo to, ì taata daakaa loo Harada.

²⁵Ì bota Harada, ì taata daakaa loo Makeloti.

²⁶Ì bota Makeloti, ì taata daakaa loo Tahati.

²⁷Ì bota Tahati, ì taata daakaa loo Tera.

²⁸Ì bota Tera, ì taata daakaa loo Mitika.

²⁹Ì bota Mitika, ì taata daakaa loo Hasimona.

³⁰Ì bota Hasimona, ì taata daakaa loo Moseroti.

³¹Ì bota Moseroti, ì taata daakaa loo Bene-Yaakani.

³²Ì bota Bene-Yaakani, ì taata daakaa loo Hori-Hakidikadi.

³³Ì bota Hori-Hakidikadi, ì taata daakaa loo Yotibata.

³⁴Ì bota Yotibata, ì taata daakaa loo Aburona.

³⁵Ì bota Aburona, ì taata daakaa loo Esiyoni-Keberi.

³⁶Ì bota Esiyoni-Keberi, ì taata daakaa loo Kadesi, Cini Keñewuloo kono.

³⁷Ì bota Kadesi, ì taata daakaa loo Hori Konkoo to, Edomu naanewo to.

³⁸Piriisoo* Haaruna taata Hori Konkoo kaŋ Yaawe la yaamaroo kaŋ, daameŋ a beleta jee, Banisirayilankoolu la bonaŋo Misira, sanji taŋ naaninjaŋo kari luulunjaŋo tili foloo.

³⁹Haaruna be bele la Hori Konkoo kaŋ tuma meŋ, wo tumoo a siyo be sanji keme sanji muwaŋ niŋ saba.

⁴⁰Kanaaninkoolu la mansa meŋ be marariŋ Aradi saatewo ma, Nekefu* tundoo kaŋ, Kanaani bankoo kaŋ, ye Banisirayilankoolu la naa moyi le.

⁴¹Ì wulita Hori Konkoo to, ì taata daakaa loo Salimona.

⁴²Ì bota Salimona, ì taata daakaa loo Punoni.

⁴³Ì bota Punoni, ì taata daakaa loo Oboti.

⁴⁴Ì bota Oboti, ì taata daakaa loo Iye-Abarimu, Mowabi naanewo daala.

⁴⁵Ì bota Iye-Abarimu, ì taata daakaa loo Diboni-Kadu.

⁴⁶Ì bota Diboni-Kadu, ì taata daakaa loo Alimoni-Dibulatayimu.

⁴⁷Ì bota Alimoni-Dibulatayimu, ì taata daakaa loo Abarimu Konkoolu to, Nebo ñaatiliŋo la.

⁴⁸Ì bota Abarimu konkoolu to, ì taata daakaa loo Mowabi kene fanuŋo to Yoridani Boloŋo daala, Yeriko be a ye a kankuŋ doo la.

⁴⁹Mowabi kene fanuŋo to, ì ye daakaa loo Yoridani Boloŋo dandaŋo le la ka bo Beti-Yesimoti ka taa wo la Abeli-Sitimu.

⁵⁰Yaawe diyaamuta Musa ye, Mowabi kene fanuŋo to, Yoridani Boloŋo daala, Yeriko be a ye a kankuŋ doo la.

⁵¹A ko Musa ye a fo Banisirayilankoolu ye ko, “Niŋ ali ye Yoridani Boloŋo teyi ka duŋ Kanaani,

⁵²ali si a bankoo moolu bee bayi. Ali ì la jalaŋolu bee tiñaa, ì ye mennu lese aniŋ ì ye mennu tunkaŋ, ali ye ì la batudulaa tintiŋolu* bee boyi.

⁵³Ali bankoo ñiŋ taa, ali ye sii jee, nte le ye ñiŋ bankoo dii ali la ka ke ali taa ti.

⁵⁴Ali bankoo ñiŋ talaa niŋ alikuuroo* la, ko ali la kaabiiloolu nankamoo be laariŋ ñaameŋ. Ali ye nii baa dii kafu baa la, ali ye niindiŋo dii kafundiŋo la. Alikuuroo ye meŋ-wo-meŋ dii meŋ na, wo le be ke la a taa ti. Ali a talaa ko ali bonsuŋ lasiloolu be laariŋ ñaameŋ.

⁵⁵“Bari niŋ ali maŋ bankoo ñiŋ moolu bayi, ali be mennu tu la jee, wolu be naa ke la dooliŋ kesoo le ti ali ñaalu kono, ì ye ke ali ye ŋaniŋolu ti ka ali soo ali karoo to. Ali be sii la bankoo meŋ kaŋ, ì be ali toorandi la jee le.

⁵⁶Wo to ŋa meŋ hame ì kamma, m be a ke la alitolu le la.”