Read Mandinka Mika 1 Bible Online

Mika 1 - Mandinka bible

Mika 1

¹Yaawe* ye ñiŋ kiilaariyaa kumoo le lankenemayandi Mika Moresetinkoo ma Samariya la kuwo to, aniŋ Yerusalaamu. A keta Mansa Yotamu tiloo le la, Mansa Ahasi, aniŋ Mansa Hesekiya, Yahuuda bankoo kaŋ.

²Ali moyiroo ke bankoolu bee, ali bee kewu. Duniyaa niŋ a konokono feŋolu, ali i lamoyi. M Maarii Yaawe faŋo le be seedeyaa la ali la kuwo la, ka bo a taradulaa senuŋo to.

³A fele, Yaawe be naa kaŋ ne ka bo a taradulaa to. A be naa kaŋ duniyaa kono le, a ye taama konko jaŋolu kaŋ.

⁴Konkoolu si yeluŋ a koto, ko niŋ i ye kaañoo laa dimbaa to, aniŋ ko jiyo ka bori jindaa la ñaameŋ, ka wulumbaŋolu fara.

⁵Ñinnu bee be ke la le, Yaakuba koomalankoolu la balaŋo kamma la, aniŋ Banisirayilankoolu la junube baaroolu. Ì la balaŋo sababoo keta jumaa le ti? Fo a maŋ ke Samariya le ti baŋ? Jumaa le keta jalambatoo sababoo ti batudulaa tintiŋolu* kaŋ, Yahuuda? Fo a maŋ ke Yerusalaamu le ti baŋ?

⁶Wo to Yaawe ko, “M be Samariya ke la tumbuŋo le ti, kene kenseŋo. Jee ye ke wayini* yiri tutudulaa ti. M be a beroolu fayi la wulumbaŋolu le kono, ŋa a kenseŋyandi fo a fondamaŋolu to.

⁷A jalaŋ leseriŋolu bee be teyiŋ-teyiŋ na le, tumbuŋo doroŋ ne be tu la jee. Jalaŋ batudulaa naafuloo meŋ sotota cakayaa[1] la, a bee be jani la dimbaa le la. Kaatu cakoolu la joo le mu, a be ke la cakoolu la joo ti banku koteŋ ne kaŋ.”

⁸Ñiŋ kuwo kamma la, n si kumboo, ŋa woosii, n kenseŋo ye loo, n siŋ kenseŋo ye taa. N si woosii ko kunkuwuloo, ŋa sikisiki ko kiikiyaŋo.

⁹Baramoo meŋ ye Samariya maa, a te kendeyaa noo la. Wo kuu kiliŋo le be sumaŋ kaŋ Yahuuda bankoo fanaa la. A futata n na moolu la saatee dundaŋ daa ma le, Yerusalaamu faŋo to.

¹⁰Ali kana a kuwo fo Kati,[2] ali kana a kuwo kumboo jee muumeeke. Alitolu Beti-Ofurankoolu,[3] ali birimintiŋ buutoo kono, ka ali la niikuyaa yitandi.

¹¹Alitolu Safirinkoolu,[4] ali kenseŋo ye taa mutoo kono, ali ye tara maloo kono. Alitolu Saananinkoolu,[5] alitolu te haañi la ka finti banta. Beti-Eseli[6] fele faariŋ woosiikaŋo la, tankoo suturoo wurata a kaŋ, a te ali deemaa noo la kotenke.

¹²Maroti[7] moolu niŋ kijateyoo le be siiriŋ, ì be maakoyiroo batu kaŋ, baawo Yaawe fele, a ye maasiiboo boyi Yerusalaamu kaŋ, a futata a dundaŋ daa faŋo le to.

¹³Alitolu Lakisinkoolu,[8] ali suwoolu siti keleraŋ sareetoolu* bala, ali bori ali jawoolu ma. Banisirayilankoolu ye kuu jawoolu mennu ke, ali fanaalu seyita wolu le kaŋ. Ali ye Dimmusuriŋ* Siyoni* fanaa duŋ wo junube kuu siifaa kiliŋo to.

¹⁴Alitolu Yahuuda moolu, ali ñanta Moreseti-Kati[9] moolu so la feŋ na le, ka ke ali niŋ ì teema sarañooloo ti. Akisibu[10] saatewo be Banisirayila mansoolu neenee la le.

¹⁵Alitolu Maresankoolu,[11] Yaawe be kelejawaroo le naati la ali kaŋ, ka ali la feŋolu bee taa. Banisirayila ñaatonka baalu be bori la le, ì ye taa Adullamu.[12]

¹⁶Yahuuda moolu, ali ali kuŋolu lii sunoo kamma la, ì ye nunku ko duwoo, ali kanudiŋolu[13] la kuwo kamma. Kaatu ì be bo la ali bala le, ì ye tara mutoo kono.